Hosheya 7
7
1Kayɛ jeng de me simo tɛ̀ ɛn tyang,
ko me bɛrɛng banɛ̂n BeƐfrayim,
tanga nevês bemât Samariya zɔng.
Yɛn e vɛ́sɛ a me bɔs,
begbik e ji nelɔ bemât shigi e jey.
2Ko yɛn e tɔk wɛt wɔgɔ,
me bare na mwa tomong ves mɛn.
Banɛn mɛn ba ga gwɔrɔ hɛn,
ko me bɛrɛng hɛn mwa kyɛrɛng.
3Yɛn e pɛngɛ a gbɔng gwɔ̀m yey na neves,
yɛn e pɛngɛ a bemât nuyel yey na bɔs arɔng.
4Mwa hɛn ba sé bemât nejwang,
yɛn a sé sede kya pep hê mwât halâng kpam-tuk.
E to ka jama na a rùga hɛ wɛt,
yi e jeng tugut o vɔk e jeng sogo fugum.
5E tûk nzem gbɔng gwɔ̀m mot,
gwɔ̀m o na bemât nuyel mɛ mwa
ba feng nshî anap ko ba tɛ́ ɛn shagarak.
6Neyey mɛn na fus sede kya pep hê mwât halang,
e de yông pyɛ́ vyes.
Yɛn e pɔl e de té puu na shom,
ko nagasi, shom o ye takla sede balêm kya.
7Mwa hɛn ba sé pep sede kyâ mwât halang,
yɛn e re bemât nuyel mɛn.
Mwa begbɔng begwɔ̀m mɛn ba ga gabsa
ko vit a hwak de ê ra wôn sɛlɛ.
Israyɛl a wuna nesa na yére dyuk
8BeƐfrayim ba ga súk ɛn na yére dyuk,
ba ga tɛ́ ɛn sede pyɛ̂ halang de ba ga doyo yɛ wɛt.
9Yére dyuk ya ga re gap mɛn,
ko yɛn a tɔk ano wɛt.
Shɔlɔ ya ga hwo e bato mɛn,
ko yɛn a tɔk ano wɛt.
10Tos tô BeIsrayɛl he nɔng nuha e ra yɛn.
Mwa ano vit a hwak de a ga toyo vey na Dagwi Darwey, Dagwi mɛn,
kɛ a jama hɛ e ji reyɔm remo mwa.
11Ɛfrayim a sé sede gwobɔp gwotɔn o,
sana netsitsɛng.
Yɛn e yila sɛlɛ̂ Misra,
ko be de kyè vɔk e Asirya.
12Kahɛ kwɔn de yɛn a wɔ́,
mê bomo segun hom e ra yɛn.
Mê gyirik hɛn vey e vwel sede benon lagwi.
Mê vos ɛn jeng de ma wok yɛn a tula hɛn.
13Gawey e ra yɛn, yaga yɛn a ga ye rɛng,
Bê wey na yɛn yaga yɛn a sogo nehywɛ e ra me!
E me de ma viri hɛn,
ko yɛn e vɛ́sɛ bɔs e ra me.
14Yɛn e tosho a me na yey mɛn wɛt.
Jeng de yɛn e dak bèkun e ra gàt mɛn,
Ko yɛn e yɛt babek mɛn yaga pyɛ̂ yeneng, na nshî anap de na sé vit,
yɛn a sé sogo nehywɛ e ra me.
15Me de ma masa a bemât como mɛn ko ma gwɛ̌ a yɛn gap,
ko mwa ano yɛn e yong neves e ra me.
16Yɛn a doyo vɔk na yapyi.
Yɛn a tɛ́ ɛn vit à nerat sede gbàng de wa ye net.
Bemât nuyel mɛn be sǎ e de dâk kaa,
ko bê wey na yɛn na wal,
ko BeMisra bê shɛgɛsh hɛn.
Currently Selected:
Hosheya 7: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
