Hosheya 6
6
Ba yila BeIsrayɛl na be tosho gabɔk
1“À bemat hom: Tik na wot a toyo
vey na Dagwi Darwey!
Yɛ a ga hama hot
ko ê to tɛ̀ ot tyang.
A ga tɛ̀ a wot baram,
ko ê to rɔgɔs a wot vɛ na be vel.
2E bamâ pɔlɔ ba Dagwi Darwey ê to tɛ̀ ot wɛng-wɛng,
e pɔlɔ hê tat ê to yang ot cik,
yaga na wot a bin to sangal na yɛ.
3Tik na wot a tɔk Dagwi Darwey,
tik na wot a ye ngyɛ́k na wot a tɔk ɛ tsɛng-tsɛng.
Ê vey na wot mwin,
sede gasi he ye gbey.
Ê to vey na wot sede rwâk nabolos,
na wo naswigi de wo yel e vwel naka.”
Dagwi Darwey e dura nevît tsak o bemat o
4Mê ra sɛ́ na hwo à Israyɛl ɛ?
Mê ra sɛ́ na hwo, à Yuda ɛ?
Tɛ̂ yey min ha sé sede wut nagasi,
sede mwɛngɛ de gwó tanga sogo.
5Yaga ano, ma yɛt ɛn na bezarap hom,
ma mɔbɔs hɛn na neha nu hom,
ma yɛt a yɛn shɔt
wɛshɛrɛk sede gbara.
6Me simo tɛ̂ yey hê mwin,
ko nɔrɔ̂ yas wɛt.
Me simo tɔ̂k Dagwi
ko nɔrɔ̂ pyɛ̂ rangas wɛt.
7Jeng de ba sey vwel o e Adam
ko ba hala wuna-na-sira hom.
Yɛn a sey tsak o na me wɛt.
8Repomô Gileyat ra sila na bemat beves,
ra sila na nemi de be lusha.
9Sede remo de begbik be gyeng mwat de ê kwey,
a sé ano de bagyɛng bepiris be ragas.
Yɛn e mɔbɔs bemat e gwông Shɛkɛm,
yɛn e ra neves zá wɛt.
10Ma ga di gbɔng pyɛ̂ byɛm-byɛm e lɔ Israyɛl —
nejwâng BeƐfrayim na neligîs BeIsrayɛl.
11À yin BeYuda arɔng,
ma ga tɛ̀ jeng de mê tabak hin sede jeng bwal.
Kayɛ jeng de mê simo toyo a bemat hom na nerat mɛn.
Currently Selected:
Hosheya 6: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
