Hosheya 8
8
Dagwi Darwey a gyong BeIsrayɛl yaga cī
1Pɛl in durum!
Ba sé vey na jugu sede kim,
e ra Gbɔng Duk Re Fongol Dagwi Darwey
Yaga bemat hom ba ga kwɔrɔ wuna-na-sira hom,
ko yɛn a ga kyɛ́ ɛn nà gyeng Badu hom.
2Yɛn a sé tosho a me, be tē:
À Dagwi mot, wot a sé bemat mo, wot BeIsrayɛl!
3BeIsrayɛl ba ga kyɛ́ ɛn pyɛ́ ryat.
Yaga ano, vê repugu mɛn bê ro ɛn.
4Yɛn a ga kasa a tó mɛn begwɔ̀m sana rangal me,
yɛn a tɛ̀ bemât nuyel mɛn sana tɔ́k hom.
Yɛn a jut dyam pyɛng na dyam shinang mɛn be yong mɛ cī —
yemo de bê ba wey na yɛ.
5À bemât Samariya, ma kyɛ́ me mus dyam shinang min.
Yey hom ye beseng na yin.
E yɛ̌ jeng de yin ê tɛ́ in haalal ɛ?
6E mwât fwôm vwɔ wo BeIsrayɛl de a yong pyɛ cī mo.
A sé e Dagwi wɛt!
Bê mɔbɔs mus dyam shinang wo Samariya mo cɛk o cɛk o.
7Ka sede yin a tus gul e tô alkama, ko yin ê yɛt bwâl wúla!
Mapâk yara de wa tɛ̀ to wɛt, wô tɛ̀ yéneng wɛt.
Ka wa ka tɛ̀ yéneng, ko bemât yere dyuk bê re yɛ.
8Bwang yére bemat jey ya ga wɔlɔk BeIsrayɛl.
Yɛn a sé e ji mɛn sede gwokywa de be tɔk ra fwom na gwɛ wɛt.
9Yɛn a ga gǎ vɔk e Asirya,
sede madung de wo kyè nju wɛ.
BeƐfrayim ba ga nɔng dyām na be sey mɛ nesa.
10Mwa ano de yɛn e ra ano,
mê tula hɛn yi e yére bemat jey.
Ko yɛn ê hwo ririm,
yi na negbang de Da vwel Asirya ê tak a yɛn.
11BeƐfrayim ba ga gwɛ̌ lɔk begagbang rangâs yas na ne sè nedem talâ-nɛn,
ko na ga tɛ́ ɛn nedem ragas banɛn e negya!
12Mwa ano de ma jɛk a yɛn Badu pyak,
ko yɛn a kyɛ́ ɛn vɛ sede ba sé pyɛ dyuk.
13Yɛn e nása nenɔrɔ̂ yas de ya dal na nerat, na be re banama mo,
ko me, Dagwi Darwey, me kyɛ́ mɛ nenɔrɔ mo.
Mê bare na banɛn mɛn, mê tabak hɛn,
ko mê to toyo na yɛn vɔk e Misra!
14BeIsrayɛl ba ga ye bam a womo de a yong ɛn.
Ba ga lɔk nelɔ begwɔ̀m nerey o.
BeYuda ba ga lɔk nekwɔn dál e bapomo detidetu.
Ko mê tomo kya he hwo e ra bapomo mɛn o,
he re nelɔ nerey mɛn o arɔng.
Currently Selected:
Hosheya 8: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
