Hosheya 5
5
1“Wok in pyɛ́ yemo, à yin bepiris!
Wet in betong, à yin bemat nuyêl Israyɛl!
Wok in, a yin bemat lɔ gwɔ̀m!
Mê ra a yin pyɛ min shɔt!
Yin a ga tɛ̀ bemat be gabsa e sòrô cī e Mizpa,
na segun cī e Raku Tabɔr,
2na vɔng ciwîl cī e Shitim,
ko mê tabak hin mwa.
3Ma tɔk kayɛ pyɛ e ra Ɛfrayim,
ko Israyɛl a tɔk lɛrɛ hɛ yi na me wɛt.
Mwa ano Ɛfrayim a sé ra fwôm nedeneves,
ko Israyɛl a ga tɛ́ ɛ ligis.”
Hosheya a tusa BeIsrayɛl e ra sâp cī
4Neves de bemat o ba ga ra
ne dul ɛn sana toyo vey na Dagwi.
Negwɔn nedeneves nà ga kaba hɛn gak tyɔng wɛt,
yaga ano, yɛn ê to tɔk Dagwi Darwey wɛt.
5Tôs tô BeIsrayɛl he nɔng nuha e ra negwɔn mɛn.
BeƐfrayim bê tiris bol e de ragas banɛn.
BeYuda bê dopɛ e tirîs bol mɛn o arɔng.
6Yɛn ê wɔ̀ jama Dagwi Darwey,
na kara nenɔrɔ̂ vyēl na ne berɔndɔng mɛn,
ko yɛn ê sɛ̀ ɛ́ wɛt,
yaga yɛ a ga gas ɛ na yɛn.
7Yɛn a ga kyɛ́ ɛn nà sey tsak o na Dagwi Darwey,
yaga yɛn a tɔs nèy na beda beduk.
Ko a remo, râ nzem pwɛl pwas nê sè pyɛ wey na yɛn,
yɛn mwa na cāp mɛn.
Como e tê BeYuda na BeIsrayɛl
8Pɛl in bedurum e Gibeya!
Mok in como e Rama!
Dak in sekun e Bet-Avɛn!
À yin BeBɛnyamin, sey in yel!
9Vwêl BeƐfrayim hê tɛ́ ɛ barin,
e tuk de be ba tabak hɛn.
Ma sé ha pyɛ́ de yê ba té mwin
na yére Israyɛl.
10Bemât nuyel Yuda ba ga sey ɛ vwêl BeIsrayɛl
sede vemo de be sek beta yɛnɛ̂ vwel.
Yaga ano, mê shusha shom hom e ra yɛn sede tɛmɛ-nshi.
11Ba ga mɔt Israyɛl, ba ga bugut hɛ na shɔt
yaga a tɛ̀ yey mɛ e ra yapyi.
12Mê wey na Israyɛl sede bekǔt ba re rugu,
ko mê wey na gâp Yuda sede shɔ̄t ya re cɔgɔt.
13Jeng de Israyɛl a di serɔ de sé royo hɛ,
ko Yuda a di baram de a vɔk,
ko Israyɛl a doyo vɔk e Asirya, na a wɔ
jama sɛlɛ̂ Da Vwel mɛn,
ko yɛ mo a tɔk tɛ̀ ɛ tyang,
kɛ a tɛ̀ baram mɛ be vel wɛt.
14Mê hwo e ra BeIsrayɛl sede gukum,
ko mê sè sede hwêy gukum de ha hwo BeYuda arɔng.
Mê hama hɛn cɛk o cɛk o,
ko me kyè.
Mê hashe hɛn me kyè mɛ,
ko vit a mwat de ê tɔk sey ɛ hɛn.
15Mê doyo yi na yɛn vɔk e dem sangal hom,
sɛ̌ yɛn a di buru mɛn,
sɛ̌ yɛn a jama me e reyɔm mɛn.
Currently Selected:
Hosheya 5: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
