Hosheya 4
4
Banɛ̂n BeIsrayɛl
1À yin BeIsrayɛl, wok in hâ Dagwi Darwey,
yaga yɛ a vɔk shɔt na yin de yin a sé na sangal e vwel o.
Yaga vit a tsak o, kɛ dyɛ̂ng to, kɛ tɔ̂k Dagwi e vwel o.
2Bemat o be sisa hɛn, be vɛ́sɛ bɔs, be mɔbɔs bemat,
be shigshi, ko be ragas nejwang,
be ragas yol e kagwa,
ko be lusha nemi sana yɛnɛ.
3Pyɛ ma yane de ya tɛ̀ vwel min he nɔngɔs pyɛ́ wɛt, sede mwât sesin.
Ha sila na lashê yey, ko mwa pyɛ́ cen ye rō yɛ̄.
Ngyāma na benon lagwi
tanga betɔk ji nshi arɔng ba sé kushu.
Dagwi Darwey e dura banɛ̂n bepiris mɛ
4Dagwi Darwey a ye, “Yin tɛ̀ kûn bemin wɛt,
yin dura banɛ̂n bemin wɛt.
Yaga ha hom ha sé e ra yin pyɛ min,
yin bepiris hom.
5Yin e tiris bol nagwi yaga banɛn min,
ko bepiris hom be tiris bol naturuk arɔng,
ko mê wey na neng min, Israyɛl.
6Bemat hom ba sé wey yaga nevît tɔk.
Ba sé wey yaga nevît tɔk min pyɛ min!
Ko me ma tɔk in sede bepiris hom wɛt.
Yaga yin a ye bam à Badu Dagwi min.
Me arɔng mê ye bam nà tɛ̀ nerat e ra nèy min.
7Bepiris hom ba gwɛ̌ hɛn pyak,
ko yɛn a gwɛ̌ ra a me banɛn.
Ko me mê sege gbɔng nerat min
na ne sè pyɛ rekyen.
8Yin e sɛsɛm nenɔrɔ̂ bemat hom,
de be vɛ̀sɛ mɛ yaga banɛn mɛn,
yin e vɔk yey pyɛng
de bemat o be re nuyel na ragas banɛn.
9Bepiris na bemat o mwa hɛn be ragas neves.
Ano, mê tabak hɛn tyɛng mwa hɛn.
10Yɛn ê re pyɛ́, ko yê vey a yɛn wɛt,
Yɛn ê manas na bemɛn ko yɛn ê sɛ̀ nèy wɛt,
yaga yɛn a lashe weneng na me Dagwi Darwey,
na yɛn a re a cī fongol.”
Dagwi Darwey a kyɛ́ ɛ begwông re a cī fongol
11Dagwi Darwey a ye, “Nshî anap tanga siring
na sé ro bemat hom nà vɔk netsitsɛng!
12Yɛn e rangâl kpɔk cɔgɔt pyɛ de yɛn ê ra!
Ko yɛn e raa pyɛ de ya ha a yɛn.
Yɛn a ga ye rɛng sede jwâng hwā.
Yɛn a ga lashe weneng na Dagwi mɛn.
13Yɛn e nása a cī nɔrɔ̂ yas e nekwɔn re fongol mɛn e ra beraku,
ko yɛn e nása nɔrɔ̂ pyɛ̂ nesang hyɔɔlɔl e ra berahwol,
e nɛ̂n batin cɔ́gɔt mwa de ya vɔk necam nerat!
Behwóng min ba ga tɛ́ ɛn bedebeves,
ko behâ nèy min be ragas nejwang.
14Mê tabak behwóng min yaga yɛn a ga tɛ́ ɛn bedebeves,
kɛ behâ nèy min yaga yɛn e ragas nejwang wɛt.
Yaga beras o pyɛ mɛn be kyese na bedebeves,
ko yɛn e kyese nása nɔrɔ̂ nejwang e nekwɔn re fongol mɛn.
Yɛn a sé wey yaga nevît netsitsɛng!
15À yin BeIsrayɛl, mwa ano de yin a ga lashe weneng na me,
ko BeYuda be kwon dopɛ wɛt!
Yin wɔ̀ re fongol e Gilgal, kɛ yin kyè vɔk e Bet-Avɛn wɛt.#4:15 Bet-Avɛn: Retîn ha mo ra sé ‘lɔ̂ banɛn’. Ba jɛk ano na be doyo rezâ Bet-Ɛl de retin o ra sé ‘lɔ̂ Dagwi’.
Yin kwon sisa yin tē,
‘Ma sira na Dagwi Darwey de a sé wo neken.’
16BeIsrayɛl ba vɔk bato gbarak
sede shêp rɔndɔng.
Yi e rɛ̌ de Dagwi ê gyeng ɛn
sede tyīmit e dem hwéy rat ɛ!
17BeƐfrayim ba ga wuna bato mɛn na cī.
Tík in hɛn zɔng!
18E bama de yɛn a ga sɔ nshî anap pyak,
yɛn e tē jik e de ragas nejwang,
yɛn e dal na simô pyɛ rekyen
e ra ye nerey,
19Wúla wô hashe hɛn,
ko yɛn ê vo rekyên nása a cī nenɔrɔ̂ yas.
Currently Selected:
Hosheya 4: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
