Habakuk 2
2
1Mê tumal e kwɔ̂n bɛrɛng nekanang hom,
na me sè e kwɔ̂n dûl repomo.
Mê gyeng na me wok pyɛ de Dagwi Darwey ê ha a me,
tanga pyɛ de ê toyo a me mɛ
yaga gwɔrɔng de ma ga ra a yɛ.
Dagwi Darwey a toyo a Habakuk
2Dagwi Darwey a toyo a me ngan:
“Jɛk pyɛ de mê dura a hwo wɛshɛrɛk e ra beta bagasak,
yaga na be tɔk basa yɛ naka.
3Yaga jeng de pyɛ de ma dura mo yê sila ya rɔngɔl e ngyen.
Di, jeng o ya sé kyè vey sila dey-dey, yê sè bɔs wɛt.
Ê sè a hwo sede jeng o ye kyè dey wɛt,
ko tik na hwo gyeng yɛ,
yê vey mwin, ko yê rɛn ɛ wɛt.
4Di, bemat de ba sé beves bê dal wɛt,
ko vemo de ba sé cik bê nàra beken, yi na sêy tsak o mɛn.”
Gawey e ra vemo de ba kyɛ́ ɛn Dagwi
5Gawey e ra bemât kwɛlɛng, bemât dak kaa,
be tɔk ye jop e kwɔn hining wɛt.
Pyɛ́ ye vey a yɛn wɛt, sede sak.
Yɛn a sé sede reku de re sirik wɛt.
Yɛn e tula á to mɛn yére bemât jey mwa,
ko yɛn e yɛt bemat o mwa sede bwal mɛn.
6Mwa yére bemât jey bê ha cīnat neha e ra yɛn
bê lɛ̄lɛ hɛn ngan:
“Gawey e ra yin de yin a ga hashe
pyɛ́ de ya sé myin wɛt.
Vɔk e yɛ̌ jeng de yin ê re nuyel na tɛ́ in bedaberey
yi na tɛ́sɛ bemat be talsa hin pyɛ́ de yin a hwɔpɔs a yɛn ɛ?”
7Remo-remo bemat de yin e rangal hɛn badu,
bê sogo e ra yin na shom.
Vemo de be rangal hin badu bê sene
ko be tɛ̀ yin vow na bengyip.
Yin ê tɛ́ in pyɛ̂ jugu mɛn!
8Yin a ga hashe pyɛ̂ yére bemât jey pyak,
ko bwang bemât repugu min o de ba dal,
bê hashe pyɛ́ min,
yaga nepyak bemat de yin a mɔbɔs,
na yaga yol de yin a ra a jey mwa,
na bapomo mɛn tanga bemat de ba sé sangal e ji vɛ.
9Gawey e ra yin de yin a ga tɛ̀ belɔ min be tɛ́ ɛn bedaberey
na nejik mɔ̂t bemat,
ko yin a ga lɔk nelɔ min e rak o
yaga na yin a hywit in yi e pyɛ de yê mǎ hin!
10Yin a ga vey a belɔ min na rekyen,
yi na wey na yére bemât jey pyak,
yin a ga vey na gawey e ra bato min arɔng.
11Beta nelɔ mo mwa bê dak sekun na yin,
ko cɔ́gɔt-kâk nelɔ mo yê dopɛ e de sekun o.
12Gawey e ra yin de yin a bomo retîs repomo min e ra neves,
ko yin a lɔk rɛ na nemî bemat.
13A sé e Dagwi Darwey Wo Reto Mwa
de a tɛ̀ bemat be sɔ reyɔ̂m fwom,
ko kya he re kayɛ pyɛ de yɛn a ga ra,
ko yére bemât jey yé yɔ́m ɛ zɔng wɛt a?
14Ko jey mwa ya rɔda sila na tɔ̂k gbɔng nerât Dagwi Darwey,
sede nshi na sila gworep.
15Gawey e ra yin de yin e tɛ̀sɛ bemât vwara min be sɔ nshî anap.
Yin e shusha a yɛn nɛ sɛ̌ na vo ɛn,
na yin a bɛrɛng nekpimit mɛn.
16Ko di, yin ê vo rekyen sizɔng e tô vɔ̂k gbɔng nerey.
Sɔ in, na yin feng, kyě tē in dèndes.
Dagwi Darwey ê tɛ̀ yin sɔ keshi.
A sé jeng o myin na yin sɔ keshi tabak ke Dagwi Darwey.
Ko gbɔng nerey min nê tɛ́ ɛn a yin rekyen.
17Bê tow in sede cɔ́gɔt Lɛbanɔn,
ko be yɛt in sede ngyāma,
yaga nepyak bemat de yin a mɔbɔs,
na yol de yin a ra a jey mwa,
na bapomo mɛn tanga bemat de ba sé sangal e ji vɛ.
18Ci ya vɔk nerât sɛ́,
a remo de mwat a yong yɛ na vwɔ mɛ ɛ?
Ya sé pyɛ de ba yong na dyam,
pyɛ de ye basa a bemat hâ mwin wɛt.
Yaga mwat de a yong yɛ e tɛ̀ gap mɛ e ra pyɛ de a yong o,
mwa ano de ye tɔk ha wɛt!
19Gawey e ra yin de yin e yâng cɔgɔt, “Sene!”
Kɛ yin yâng gwofwa, “Sogo!”
Ci yê tɔk basa a yin pyɛ cak a?
Di, ba ga lolom yɛ na dyam shinang kɛ dyam pyɛng,
ko mwa ano, vit a nesong e ji yɛ.
20Dagwi Darwey a sé e Gbɔng Duk Re Fongol mɛ wo jɛrɛ,
tik na kawɛ mwat e jey a sǎ yuu e nuyel mɛ!
Currently Selected:
Habakuk 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
