Yɛzɛkyɛl 45
45
Bak vwel o wo Dagwi
1Jeng de bê gas vwel o na be nɔ̂ng kayɛ yere nu mo mɛ, bak o gwining bê tik wɛ jɛrɛ yaga Dagwi Darwey. Nelis wɛ̀ nê sè lyōsho kuru ko netes o nê sè lyōsho rwit. Bak o mwa wô sè jɛrɛ yaga Dagwi. 2E ji bak wane mo, bê vɛ́ ɛ kwɔn hak de nelis o na netes o nà sé tyɛng yaga Gbɔng Duk Re Fongol. Kawɛ bak o wô sè bol naga rwit na kuru banaas. Bê gwɔrɔ wɛ na cwɛl de netes o nà sé bol kuru rwit na vɛ naas. 3E ji bak de ba tik jɛrɛ mo, hwô mara bak o hwak de nelis o nà sé lyōsho kuru ko netes o lyōsho nyaas, bê tik wɛ jɛrɛ yaga Gbɔng Duk Re Fongol. 4Bak o wô sè kwɔ̂n jɛrɛ hê sevwel o, wô sè wo bepiris de be ra fwom e Gbɔng Duk Re Fongol, yɛn vemo de be vɛ̀sɛ bagat na Dagwi Darwey na be ra a yɛ fwom. Kwɔn o hê sè yaga lɔk nelɔ mɛn, tanga kwɔ̂n jɛrɛ yaga Gbɔng Duk o. 5Bak o hwak de nelis o na sé lyōsho kuru, ko netes o lyōsho nyaas, wa rɔda sè yaga BeLevi de be ra fwom e Gbɔng Duk Re Fongol, sede nap mɛn yaga lɔk bapomo de yɛn ê sangal ɛ.
6Kwɔn de he raa hemo de ba tik jɛrɛ mo, e bak o wòt de nelis o nà sé lyōsho kuru, ko netes o lyōsho bya, hê sè hê mwa BeIsrayɛl.
Bak vwel o wo gbɔng gwɔ̀m
7Vwel de ha sé e bak kwɔn de ba tik jɛrɛ, na hê nap repomo, hê sè hê gbɔng gwɔ̀m. Hê bɛrɛng kwɔn de ba tik jɛrɛ, na nap repomo e rwa ta na rwa rak. Nelis hɛ nê sè tyɛng na bak gwining wo bebak de ba gas a yére Israyɛl. Hê nára hɛ yi e yɛnɛ̂ kwɔn jɛrɛ e rwa ta na yi e yɛnɛ̂ kwɔn jɛrɛ e rwa rak vɔk e neyɛnɛ vwel o. 8Bak vwel o wô sè numo hê gwɔ̀m e vwêl Israyɛl. Begwɔ̀m bê to mɔt bemat hom wɛt, ko yɛn ê tik BeIsrayɛl be vɔk vwel o tyɛng e yére mɛn.
Pyɛ̂ mara yê tsak o
9Darwey Dagwi Darwey a ye, “Óoo à yin Begwɔ̀m Israyɛl! Mɔ̂t bemat na neves de yin e ragas ba ga vey ano! Ra in shɔt na tsak o, na necik. Tik in rô bemat hom yi e vwel mɛn. Me Darwey Dagwi Darwey ma ha ano.
10“Vɔk in pyɛ̂ mása yê tsak o — pyɛ̂ masâ nedirik, na neshǐ mása de na sé tyɛng, tanga dap arɔng.
11“Kwɛ̀t masâ pyɛ́ na tsung něy, jim mɛn ya sé jining o. Bèkɛt kuru ba sé tyɛng na kwɛngɛ gwining ko betsung kuru ba sé tyɛng na kwɛngɛ gwining arɔng, ano kwɛngɛ gwô sè pyɛ masâ pyɛ́ tanga něy.
12“Masâ nedirik min he sè ngan arɔng: Gera kuru baba be sè tyɛng na shɛkɛl gwining ko shɛkɛl kuru batyiimin be sè tyɛng na mina gwining.”
Pyɛ̂ nɔrɔ yê jeng rê fongol
13“Pyɛ̂ nɔrɔ de yin ê nɔng à yemo: Yin ê nɔng sede shǐ masa hining e ji kwɛngɛ gwining wo alkama, ko yin nɔng sede shǐ masa hining e ji kwɛngɛ gwining wo baale yaga shǐ masa tyiimin ha sé tyɛng na kwɛt. 14Yin ê nɔng sede fùs gwining e ji kwɛngɛ něy pwat, yaga bètus kuru ba sé tyɛng na tsung.
15“Yin ê nɔng tyimit jining e ji tyīmit naga beba de be gyenges e nekwɔn sehwêy Israyɛl.
“Nenɔrɔ ma nemo de yin ê nɔngɔs yaga nɔrɔ̂ nemuk, na hê yas de be rangas burang, tanga hê wuna nesa, na be ra mɛ talâ-nɛn, na be fugut a yɛn mɛ banɛn mɛn. Me Darwey Dagwi Darwey ma nɔng nu ano.
16“Mwa bemât vwel o bê wuna hɛn na gbɔng gwɔ̀m e ji Israyɛl na be nára nenɔrɔ nemo. 17A sé e gbɔng gwɔ̀m o de a vɔk nedirik nɔ̂ng yas de be rangas burang, na pyɛ̂ yeneng yê nɔrɔ̂ wuna nesa, tanga nshi anap yaga nɔrɔ̂ pyɛ̂ sɔ yaga mwa yére bemat Israyɛl e jeng mwa Nzem Pwɛl Pwas, na Tuk Shábat tanga mwa negasi nzem. A rɔda nɔng yas yaga nɔrɔ̂ halâ banɛn, na he pyɛ̂ yeneng, na yas nɔrɔ de be rangas burang, tanga nɔrɔ̂ wunâ nesa na be ra mɛ talâ-nɛn yaga mwa BeIsrayɛl.”
Negasî nzem
(Nusu 12:1-20; Bepiris 23:33-43)
18Darwey Dagwi Darwey a ye, “E tuk hê mɛsɛng hê pwɛl gwo susu mo, hwô nára nɔrɔ̂ bwot mus de wà vɔk ram wɛt na hwo fung mɛ Gbɔng Duk Re Fongol. 19Piris ê vɛ nemî nɔrɔ̂ halâ banɛn o, ko a tɛ̀ nɛ e ra sesêk ri Gbɔng Duk o, na e ra bato-kwɔng banaas vê gàgbang nára nɔrɔ̂ yas, tanga e ra sesêk ruhup de be yel ɛ vɔk e lala ji mo. 20E tuk hê taama hê pwɛl o hwô to ra ano yaga kawɛ mwat de a ra banɛn e gawey kɛ e netɔn. Yi na ra ano, hwô ra a Gbɔng Duk o talâ-nɛn.
21“E tuk he kuru na hɛ naas he pwɛl gwo mɛsɛng o, yin ê hwo ra Nzem Gyilsit Nelɔ BeIsrayɛl. Nepɔlɔ netaama kawɛ mwat ê re kpam-tuk de ba yong sana géy-sing. 22E tuk hê mɛsɛng Nzem o, gbɔng gwɔ̀m ê nára nɔrɔ̂ bwot mus yaga halâ banɛn mɛ na vê mwa bemat vwel o. 23E kahɛ tuk e ji nepɔlɔ netaama ne nzem o, ê nɔng bebot mus betaama, na beturuk betaama, mwa yɛ sana ram, yaga nɔrɔ̂ rangas burang vɔk na Dagwi Darwey. Kahɛ tuk a rɔda nɔng nɔrɔ̂ gam gwining yaga halâ banɛn arɔng. 24A rɔda to nɔng nɔrɔ pyɛ̂ yeneng kwɛt gwining yaga kawɛ mus, na kwɛt gwining yaga kawɛ turuk tanga fùs gwining gwo něy pwat yaga kagwɛ kwɛt.
25“Yaga Nzem Bǔk de be pɛrɛ nɛ e tuk hê kuru na hɛ tungun he pwɛl gwo netungun, e kahɛ tuk hê nepɔlɔ netaama mo, gbɔng gwɔ̀m o a rɔda nára nɔrɔ̂ halâ banɛn na nɔrɔ̂ yas de be rangas burang tanga nɔrɔ̂ pyɛ̂ yeneng na hê něy pwat tyɛng na pyɛ de be dopse ragas.”
Currently Selected:
Yɛzɛkyɛl 45: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
