Yɛzɛkyɛl 46
46
Gbɔng gwɔ̀m na negasî nzem
1Darwey Dagwi Darwey a ye, “Ruhup lalâ ji mo de gwa sé e rwa rak gwô nàra e banga mwa negasî fwom netyiimin, ko e Tuk Shábat tanga tûk Nzem Pwɛl Pwas bê wunta gwɛ. 2Gbɔng gwɔ̀m a rɔda yi e lala majey vɔk e Gbɔng Duk Re Fongol, ko a tumal e hagât besesêk ruhup o jeng de bepiris ba sé rangas nɔrɔ̂ yas burang yaga yɛ, mwa na hê wunâ nesa. A rɔda re a Dagwi fongol e ruhup o ko e bama mo a nusu yi e hwomo. Bê bang rwi ruhup o wɛt sɛ̌ nahywegelek. 3Kahɛ Tuk Shábat na hê Nzem Pwɛl Pwas mwa bemat o bê ye ngyuk na be re a Dagwi Darwey fongol e nuyêl ruhup o. 4E Tuk Shábat gbɔng gwɔ̀m a rɔda vey nɔ̂ng Dagwi Darwey byôt tyīmit tyiimin na turuk gwining, mwa yɛ sana ram, na ye sè pyɛ̂ nɔrɔ de be rangas burang. 5Na kawɛ turuk o, a rɔda nɔng kwɛt pyɛ̂ yeneng, ko na kayɛ tyimit a rɔda vey na pyɛ de a simo a nɔng. Yaga kagwɛ kwɛt pyɛ̂ yeneng a rɔda nɔng fùs něy pwat. 6E jeng Nzem Pwɛl Pwas, a rɔda nára nɔrɔ̂ bwôt mus, na byôt tyīmit tyiimin tanga turuk de mwa yɛ ya vɔk ram wɛt. 7Na kawɛ mus tanga turuk, ba rɔda nɔng kwɛt pyɛ̂ yeneng ko na kayɛ tyimit, gbɔng gwɔ̀m a rɔda nɔng nɔrɔ̂ kayɛ pyɛ de a simo a nɔng. Yaga kagwɛ kwɛt pyɛ̂ yeneng a rɔda nɔng fùs něy pwat. 8Jeng de gbɔng gwɔ̀m o ê yel e Gbɔng Duk Re Fongol, ê yel yi e rwi ruhup o, ko a rɔda nusu e rwi gwining o.
9“Jeng de bemat be vey re a Dagwi Darwey fongol e kanɛ nzem, vemo de ba yel e rwi rwa bato bê nusu hɛn e gwô rwa batin, e bama de yɛn a ga re fongol, ko vemo de ba yel e rwi rwa batin bê nusu e gwô rwa bato. Vit à mwat de ê nu ɛ e gwong de a yel ɛ, a sé gbing-gbing na a nu ɛ e gwomo de gwo bɛrɛng gwane de a yel ɛ. 10Gbɔng gwɔ̀m o ê yel jeng de bemat o ba yel, ko ê nu ɛ jeng de ba nu ɛn arɔng.
11“E tûk nzem o na e jeng de ba tɛ̀ yaga nɛ, pyɛ̂ yeneng yaga nɔrɔ yê sè kwɛt gwining yaga kawɛ mus na turuk, ko yaga tyimit, mwat o ê nɔng pyɛ de a di ya jam a yɛ. Yaga kagwɛ kwɛt pyɛ̂ yeneng a rɔda nɔng fùs něy pwat.
12“Sede gbɔng gwɔ̀m a simo a nɔ̂ng Dagwi Darwey nɔrɔ̂ simô yêy, kɛ hê yas de bê rangas burang, kɛ hê wunâ nesa, bê wunta a yɛ rwi rwa rak vɔk e lalâ ji mo. A rɔda nára nɔrɔ mo e gwong de e nása nɔrɔ̂ Tuk Shábat, ko bê to bang rwi ruhup o e bama de a ga nusu.”
Nɔrɔ hê kahɛ tuk
13Dagwi Darwey a ye, “Kanɛ nagasi bê nára a Dagwi Darwey nɔrɔ̂ rangas burang hê tyimit ye shey hining de vit a yɛ na ram. Bê nára nɔrɔ hemo kahɛ tuk. 14Ano arɔng, ba rɔda nára nɔrɔ̂ pyɛ̂ yeneng shǐ masa hining kanɛ nagasi, bê suk pyɛ̂ yeneng o na kefus něy pwat. Ba rɔda gyeng redu nára nɔrɔ mo nesheneshey. 15Bê nára a Dagwi Darwey nɔrɔ̂ tyimit byot o, na pyɛ̂ yeneng tanga něy pwat kanɛ nagasi neshey gbak-gbak.”
Gbɔng gwɔ̀m na hâ vwel
16Darwey Dagwi Darwey a nɔng nu ngan: “Ka sede gbɔng gwɔ̀m a nɔ̂ng hak e ji nèy mɛ nɔrɔ̂ vwêl nedanelɔ mɛ, vwel o hê sè hê hwey mɛ mo sede pyɛ nedanelɔ mɛn. 17Ko ka sede gbɔng gwɔ̀m o a nɔ̂ng mwat fwom mɛ hwak nɔrɔ̂ vwel o, vwel o hê to ba tɛ́ ɛ hê gbɔng gwɔ̀m o e Shey Vibis. Vwel o ha sé pyɛ nedanelɔ mɛ ko e yɛ̀ tanga nèy mɛ zɔng de bê vɔk hɛ gbak-gbak. 18A sé kyiri na gbɔng gwɔ̀m o a sey ɛ vwêl mwat hwak. Kahɛ vwel de ê nɔ̂ng nèy mɛ, a sé gbing-gbing he sè e ji hê nedanelɔ mɛ, yi ano, a rɔda mɔt hwak e ji bemat hom yi na sey ɛ vwel mɛ wɛt.”
Beduk kyerês Gbɔng Duk Re Fongol
19E bama mo, mwat o a kwey na me e gwông yél e beduk de be bɛrɛng rwa bato bagat na ruhûp rwa batîn lalâ ji mo. Beduk á vemo de ba tik vɛ jaram yaga bepiris. A nára a me vwɔ e kwɔn hak e rwa tâ beduk o, 20ko a ye, “Kwɔn a hemo de bepiris bê kyeres ɛ banama de ba ga nára nɔrɔ̂ vɛ yaga halâ banɛn, kɛ yaga nɔrɔ̂ yông burû gawey, na be halang ɛ nɔrɔ̂ nemuk arɔng. Bê ra ano e kwɔn o yaga na be jut pyɛ cak ye jɛrɛ vɔk e lala majey de yê mǎ bemat wɛt.”
21E bama mo, a vey na me e lala majey, ko a kyè na me, a gwɔrɔ mɛ bato-kwɔng banaas vê lala mo, ko kahɛ to-kwɔng o ha vɔk kelala mo kemɛ. 22Nelis o na sé bol kuru batyiimin na vɛ rwit ko netes o na sé bol kuru banaas na vɛ rwit. 23Ba gwɔrɔ kakɛ kelala mo na jwa-duk beta, ko ba lɔk revû kya e vwarâ kakɛ̌ mo. 24Mwat o a yang me, “Vemo vɛ à beduk kyeres de bemât fwôm Gbɔng Duk Re Fongol bê kyeres ɛ pyɛ̂ nenɔrɔ de bemat be nɔngɔs.”
Currently Selected:
Yɛzɛkyɛl 46: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
