Yɛzɛkyɛl 41
41
1E bamâ hane, mwat o a kyè na me vɔk e duk wo tē wo Gbɔng Duk o, e kwɔn Duk Jɛrɛ. A mara gwong wɔ yel e ji wɛ, nelis o na sé bol kuru, 2ko netes o bol kuru na vɛ rwit, netîng vara mo e kawɛ bak na sé bol rwit. Nelis duk o na sé bol kuru batyiimin na vɛ rwit ko netes o bol kuru batat na vɛ naas.
3Ano arɔng a wɔ̀ yel e duk wo ji mo mwa. A mara gwong yel e wɛ, nelis o na sé bol tat ko netes o bol kuru, netîng vara mo bol kuru na vɛ ba. 4A mara duk o pyɛ wɛ, ko nelis o na netes o mwa na sé bol kuru batat na vɛ naas. Duk o wa sé e nuyel duk wo tē. Ko a yang me, “Duk Jɛrɛ Wo Jɛrɛ à womo.”
Beduk de ba lɔk e ra vara Gbɔng Duk Re Fongol
5Mwat o a mara netîng vara ji mo vè lɔk Gbɔng Duk Re Fongol, ko na sé bol kuru. Ba lɔk neduk nesɛl o de netes o na sé bol taama, ba gwɔrɔ mɛ mwa vara Gbɔng Duk o. 6Neduk o na sé turus ba yi e duk vwel o vɔk e rak o, ko kahɛ tut ha vɔk neduk kuru batat. Varâ Gbɔng Duk o ne kahɛ tut rak o ba radɛn ve vwel mɛn na neting, yaga na be lɔk neduk o e ra vɛ, sana lashe vara Gbɔng Duk o. 7Yi ano, ka sede ba di varâ Gbɔng Duk o e jey, bà sé sede neting o mwâ nɛ na sé tyɛng pere wɔ̀ tā e rak o. Ba lɔk nekwɔn turus vɔk e neduk rak o e ra vwarâ jey gwo Gbɔng Duk o. Nekwɔn turus o na sé e majêy neduk o, yaga ano, bé tɔk kyè yi e neduk vwel o vɔk e ne tē, pere vɔk e ne rak o arɔng. 8Ba bomo retîs Gbɔng Duk o e ra retîs beta de ra sé bol kuru yi e vwel, ko ba lɔk neduk de na gwɔrɔ Gbɔng Duk o e ra retis rane mo. 9Netîng vara jey ve neduk de na gwɔrɔ Gbɔng Duk o na sé bol rwit. Ba lɔk pyɛ cak e tê vara neduk o, 10na bwang beduk lala mo wɛt. Lala de ha sé e tē mɛn ha sé bol kuru batat na vɛ naas. 11Rwi duk gwining gwa sé vɔk e neduk ne rwa batô Gbɔng Duk o, ko hwak gwa sé vɔk e neduk ne rwa batin. Retîs beta de ba lɔk ɛ̀ Gbɔng Duk o mwa na neduk o ra nusu e jey bol rwit.
Duk wo rwa ta
12E yɛnɛ̂ lala de ha sé e rwa tâ Gbɔng Duk o, ba lɔk duk hwak de nelis wɛ na sé bol naga na kuru batungun, ko netes o bol naga gwining kuru rining na vɛ tyiimin. Netîng vara duk o mwa na sé bol shatat.
Ba mara nerêy Gbɔng Duk Re Fongol
13Mwat o a mara nelis Gbɔng Duk Re Fongol ko na sé bol naga na kuru batyiimin na vɛ rwit. A mara yi e vwara bamâ Gbɔng Duk o, a kwey mɛ lala bamâ wɛ vɔk e vwara bamâ duk de wa sé e yɛnɛ mo e rwa ta, ko nelis o na sé bol naga na kuru batyiimin na vɛ rwit. 14Nelis o de na kwey e nuyel Gbɔng Duk o mwa na nelala ne kahɛ hagat o, na sé bol naga na kuru batyiimin na vɛ rwit arɔng.
15E yɛnɛ mo, mwat o a mara nelis duk rwa ta, mwa na neduk kahɛ hagat o ko na sé bol naga na kuru batyiimin na vɛ rwit.
Jî Gbɔng Duk Re Fongol o
Ruhup yel e Gbɔng Duk Re Fongol o, na Duk Jɛrɛ, na Duk Jɛrɛ Wo Jɛrɛ, 16ba bang vara mo na nebak cɔgɔt de ba hyulum ne naka yi e vwel vɔk e bapɔk — ko ba tɔk bang bapɔk o — na beduk betat vê bahagat o ba tɔrɔ mwa vɛ na nebak cɔgɔt o arɔng. 17Vara jî Gbɔng Duk o yi e vwel pere vɔk e ra rak ri duk o ba bang vɛ mwa na wɔrɔ̂ 18batin tyet na pyɛ́ cen. Ba sɔ́sɔ̀k batin tyet o na pyɛ́ cen o ba gwɔrɔ mɛ vara beduk o. Kayɛ pyɛ cen o ya vɔk bwang bayis baba: 19Bwang bayîs mwasi de gwo bɛrɛng tîn tyet hê hagat hemo, na bwang bayîs gukum de gwo bɛrɛng tîn tyet hê hagat here. Ba ra ano ba pere wɔ̀ gwɔrɔ mɛ varâ Gbɔng Duk o, 20yi e vwel vɔk e ra rak ri duk o.
21Nelis na netês sesêk ri Duk Jɛrɛ mo na sé tyɛng.
E nuyel ruhup Duk Jɛrɛ Wo Jɛrɛ ba tik ɛ pyɛ cak de ya sé sede 22gàgbang nása nenɔrɔ vɔk na Dagwi de ba yong na cɔgɔt. Kwɔn o ha sé bol tungun vɔk e rak o, ko netes na nelis o na sé bol naas. Bato-kwɔng o, na retis o, na vara mo mwa ba yong na cɔgɔt. Mwat o a yang me, “Womo wɛ a tebut nuyêl Dagwi Darwey.”
23Rwi duk wuma bā gwa sé e yɛnɛ̂ gwong wɔ̀ yel e Duk Jɛrɛ, ko hwak yerê gwɛ gwa sé arɔng e yɛnɛ̂ gwong wɔ̀ yel e Duk Jɛrɛ Wo Jɛrɛ. 24Mwa vɛ ba manas vɛ bibeba ko ba wuma vɛ e tē bebak beba. 25Ba wɔrɔ batîn tyet na pyɛ́ cen e ra ri Duk Jɛrɛ, tyɛng sede remo de ba ra e vara ruhup o. Ba bang rwi ruhup o na cɔgɔt tyɛng ano arɔng. 26E vara bahagât ruhup o, ba tɛ̀sɛ bapɔk, ko ba tɔrɔ vara mo na wɔrɔ̂ batin tyet.
Currently Selected:
Yɛzɛkyɛl 41: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
