Yɛzɛkyɛl 40
40
Negwi-ywey na Gbɔng Duk Re Fongol wo nuyel
(Yɛz 40:1—48:35)
Ba wɔ́ na Yɛzɛkyɛl e Yɛrusalɛm
1E shey he kuru baba na hɛ tungun (25) he sesam mot, e susu shey o, e pɔlɔ pwɛl he kuru, e shey he kuru na hɛ naas e bama de ba ga gangas gbɔng repomô Yɛrusalɛm. E tuk o, reto Dagwi Darwey ra hwo e ra me, ko ra wɔ́ na me e hwomo. 2E ji negwi-ywey, Dagwi a wɔ́ na me e vwêl Israyɛl, ko a wɔ̀ tik me e ra rak raku hwak de wa sé lwis vɔk e rak o tyɔng wɛt. Bak rwa batin wɛ wa vɔk yerê lɔk hak sede gbɔng repomo. 3Jeng de a wul na me e hwomo, ma di mwat hwak de a nɛp sede dyam pama, a vɔk rwîk linen tanga cwang masâ pyɛ́ e vwɔ mɛ, ko a sé tumal e rwi ruhup.
4Mwat o a yang me, “À mwasi, bɛrɛng hywɛ na hwo wok naka, na hwo tɛ̀ yey mo e ra mwa pyɛ́ de mê dura a hwo, yaga ba vey na hwo e ngamo na me dura a hwo pyɛ́ yemo, yaga na hwo bin ha a BeIsrayɛl kayɛ pyɛ de hwà di.”
Ruhup rwa rak
5Pyɛ de ma di yɛ à Gbɔng Duk Re Fongol, ko ba gwɔrɔ wɛ na jwa. Nelîs cwang masa de wa sé e vwɔ̂ mwat o na sé bol kuru. A mara netes jwa mo ko na sé bol kuru, nelis wɛ vɔk e rak o na sé bol kuru arɔng. 6A kyè vɔk e ruhup de gwo bɛrɛng rwa rak. A tut e nekwɔn turus, a mara rwi ruhup o, ko gwa sé bol kuru vɔk e rak o. 7Nelîs duk bemât gyéng na sé bol kuru, ko netes o bol kuru arɔng. Netes de na sé e tê beduk o na sé bol rwit. E nuyel beduk bemat gyéng o, gwong gwa sé de nelis o na sé bol kuru, gwa kyè vɔk e ruhup de gwó bɛrɛng Gbɔng Duk Re Fongol. 8A mara lalâ nuyêl ruhup de he bɛrɛng Gbɔng Duk o ko ha sé bol rwit. 9Ano arɔng a mara lalâ ruhup o ko netes o na sé bol kuru na vɛ naas, ko a mara hagat hê yikyik o, ko ha sé bol naas. Lalâ ruhup o he bɛrɛng vey e ji mo. 10Beduk bemât gyéng ba sé betat e kahɛ hagat rwi ruhup gwô rwa rak, nerey vɛ na sé tyɛng, ko netîng vara duk o na sé tyɛng arɔng.
11Ano arɔng, mwat o a mara netês gwong vɔk e ruhup o, nà sé bol kuru baba na vɛ ba (22) mwâ nɛ, ko netês tê rùhup de ba sé pyot o na sé bol kuru na vɛ tyiimin. 12E nuyêl kawɛ duk bemât gyéng, ba lɔk jwa be gwɔrɔ mɛ wɛ, nelis o vɔk e rak o, na netes o na sé bagat bwol gwining na rebit o. Beduk o pyɛ vɛ ba sé bol kuru e kawɛ bak. 13Mwat o a to mara neyikyik yi e mâ duk o wo hagat hemo vɔk e hê duk o wo hagat here, bē ye dɔ mɛ̀ gwong de gwa gas vɛ, ko nelis o na sé bol kuru banaas na vɛ ba (42). 14A mara vàranda duk o de nelis o mwa na sé bol kuru batat na vɛ naas (34), ko lala ha gwɔrɔ vàranda mo e kawɛ bak. 15Mwa nelis kwɔn o yi e rwi ruhup gwô jey vɔk e ruhup gwô duk wo yɛnɛ mo na sé bol kuru rwit na vɛ naas (84). 16Ba vɔk bapɔk e vara de be bɛrɛng jey vè beduk o mwa, ko ba vɔk vɛ e varâ gâs beduk o arɔng. Ba wɔrɔ batîn tyet e varâ beduk o vè ji mo de bé bɛrɛng gwong de gwa yi e ruhup o.
Lalâ rwa jey
17Mwat o a vey na me e lalâ jey, ba lɔk beduk e hwomo, ko ba lɔk gàgbang ba gwɔrɔ mɛ lala mo, ba lɔk ɛ beduk kuru batat e nuyêl gàgbang o. 18Gàgbang o wa raa tyɛng vɔk e hagât rùhup o, ko wà sé e nɛk e ra wo ji mo.
19Ko a mara neyikyik de na sé e tê ruhup majey de gwa sé e vwel o vɔk e gwo lalâ ji mo, ko nà sé bol naga na kuru batyiimin na vɛ rwit.
Ruhup rwa bato
20Ano arɔng, mwat o a mara nelis na netes ruhup lala majey de gwo bɛrɛng rwa bato. 21Beduk betat vê bemat gyéng e kahɛ hagât gwong yel o, na varâ duk de bà gas vɛ̀, tanga ruhup o mwa, mása mɛn ha sé tyɛng na hê nekwɔn yere nining o nè rwa rak. Nelîs gwong o na sé bol kuru rwit na vɛ naas, ko netes o na sé bol kuru banaas na vɛ ba.
22Nerêy bapɔk duk o, na ne lala mo, tanga ne wɔ́rɔ batin tyet o na sé tyɛng na vê ruhûp rwa rak. Nekwɔn turus na sé netaama vɔk e ruhup o, ko duk wò yɛnɛ̂ ruhup o wó bɛrɛng lala mo. 23E hagât ruhûp rwa bato ruhup hwak gwa sé de be kwey ɛ vɔk e lala ji mo. Mwat o a mara nelis yi e rwi gwomo vɔk e gworo, ko na sé bol naga na kuru batyiimin na vɛ rwit.
Ruhup rwa batin
24Mwat o a kyè na me vɔk e rwa batin, ko e hwomo, rwi ruhup o hwak gwa sɛ́. A mara vara duk o ve ji mo, na beduk bahagât gwong o, ko mwa ba sé sede vê bwang rùhup o. 25Beduk bahagat o mwa yi e ruhup o ba vɔk bapɔk tyɛng sede bwang o. Nelis o mwa na sé bol kuru rwit na vɛ naas ko netes o na sé bol kuru banaas na vɛ ba. 26Nekwɔn turus na sé netaama vɔk e ruhup o, ko duk wo yɛnɛ̂ ruhup o wó bɛrɛng lala mo. Ba wɔrɔ batin tyet e vara duk o ve ji mo, e kahɛ hagat o. 27E hagat ruhup rwa batin arɔng, ruhup hwak gwa sé de be kwey ɛ vɔk e lala ji mo. A mara nelis o yi e rwi gwomo vɔk e gworo ko na sé bol naga na kuru batyiimin na vɛ rwit.
Ruhup rwa batin gwo lala ji mo
28Ano, mwat o a wɔ́ na me e lalâ ji mo, hê ruhup rwa batin. A mara rwi ruhup rwa batin o ko gwa sé tyɛng na rùhup lala majey. 29Beduk bemat gyéng, na rùhup majey tanga vara ji mo, nerey o na sé tyɛng na ne bwang o. 30Ba gwɔrɔ ruhup o na varâ ji mo na bapɔk. Nelis vɛ̀ na sé bol kuru rwit na vɛ naas ko netes o na sé bol kuru banaas na vɛ ba. 31Vara ji mo be bɛrɛng lala majey, ko ba wɔrɔ batin tyet e varâ beduk gwông ruhup o. Gwong o gwa vɔk nekwɔn turus rwit vɔk e ruhup o.
Ruhup rwa rak gwo lala ji mo
32Mwat o a kwey na me e rwi ruhup rwa rak vɔk e lala ji mo. A mara ruhup o, ko gwa sé tyɛng na bwang o. 33Beduk bemât gyéng, na ruhup majey tanga varâ ji mo ba sé tyɛng na vɛ bwang o. Ba gwɔrɔ ruhup o na varâ ji mo na bapɔk. Nelis o na sé bol kuru rwit na vɛ naas, ko netes o na sé bol kuru banaas na vɛ ba. 34Varâ ji mo be bɛrɛng lala majey. Ba wɔrɔ batin tyet e varâ beduk gwong ruhup o e kahɛ hagat. Gwong o gwa vɔk nekwɔn turus rwit vɔk e ruhup o.
Ruhup rwa bato gwo lala ji mo
35Ano arɔng, mwat o a kwey na me vɔk e rwi ruhup rwa bato, a mara gwɛ, ko gwa sé tyɛng na bwang o. 36Beduk bemat gyéng, na ruhup majey, tanga varâ ji mo ba sé tyɛng na bwang o. Ba gwɔrɔ ruhup o na vara ji mo na bapɔk. Nelis o nà sé bol kuru rwit na vɛ naas, ko netes o nà sé bol kuru banaas na vɛ ba. 37Varâ ji mo be bɛrɛng lala majey. Ba wɔrɔ batin tyet e varâ beduk gwong ruhup o e kahɛ hagat. Gwong o gwa vɔk nekwɔn turus rwit vɔk e ruhup o.
Bwang beduk o behak bagat na ruhup rwa bato
38E lala majey ba lɔk duk hwak de rwi mo gwa sé e vwarâ ruhup rwa bato de be kwey ɛ vɔk e lala ji mo. A sé e hwomo de be kus ɛ banama yas de be rangas burang yaga nɔrɔ vɔk na Dagwi. 39E hwomo e vwarâ ji mo gwo ruhup o ba vɔk betebut beba e kahɛ hagat, yaga yɛt nɔrɔ yas de be rangas burang, na ye nɔrɔ̂ banɛn tanga ye nɔrɔ̂ yaga yông burû gawey. 40E majey duk o, e gwông yel gwo ruhup rwa bato, ba vɔk betebut beba, ko e hagat o het, e yɛnɛ̂ vwarâ ji mo gwo ruhup o ba vɔk betebut beba arɔng. 41Ba vɔk betebut benaas e ji mo, ko ba vɔk betebut benaas e majey o arɔng. Mwa vɛ ba sé rwit de bê dopse yɛt ɛ yas de bê nára nɔrɔ̂ yɛ vɔk na Dagwi. 42Ba to vɔk betebut benaas de ba yong na beta bagasak, nelis na netês kagwɛ mo nà sé bol ba na rebit o, ko nelis o vɔk e rak o na sé bwol gwining na rebit o. Be tikis pyɛ̂ yɛt yas de be nára nɔrɔ̂ rangas burang, na yê bwang nenɔrɔ e ra betebut o. 43Ba tɛ̀ begúk be gwɔrɔ mɛ ji duk o, nelîs vɛ na sé sede nára beken vwɔ mwat. Mwa banama de bê nása sede nɔrɔ̂ rangas be tikis vɛ e ra betebut o.
44Ano arɔng, mwat o a vey na me e lala ji mo, beduk ba sé beba e lala mo — gwining e hagat ruhup rwa bato, gwó bɛrɛng rwa batin, ko hwak e hagat ruhup rwa batin, gwó bɛrɛng rwa bato. 45A yang me, “Duk de wó bɛrɛng rwa batin wa sé yaga bepiris de ba vɔk nedirîk tom Gbɔng Duk Re Fongol, 46ko duk de wó bɛrɛng rwa bato wa sé yaga bepiris de ba vɔk nedirîk tom kwɔn nása nenɔrɔ. Yɛn vɛ à yerê Zadɔk. E yɛn vɛ zɔng vê yerê Levi de ba simo a yɛn na be yel e kwɔn Dagwi Darwey na be ra a yɛ fwom.”
Lala ji mo na Gbɔng Duk Re Fongol
47Mwat o a masa lala ji mo, ko ha sé bol naga na kuru batyiimin na vɛ rwit e kawɛ bak wɔgɔ, ba sé tyɛng. Kwɔn nása nenɔrɔ ha sé e nuyel Gbɔng Duk Re Fongol.
48Mwat o a wɔ́ na me e duk ruhup Gbɔng Duk Re Fongol. A mara wɛ ko nelis o na sé bol shatat, ko netes o na sé bol kuru baba na vɛ naas, ko netês kagwɛ vwara gwô hagat o na sé bol tungun. 49Nelis kwɔn yel e ruhup o na sé bol kuru batat na vɛ naas ko netes o na sé bol kuru baba. Nekwɔn bɔrɔs na sé kuru vɔk e ruhup o, ko na vɔk sesek ba, gwining e kahɛ hagat.
Currently Selected:
Yɛzɛkyɛl 40: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
