Danyɛl 7
7
Reto Fong Danyɛl
(Dan 7:1—12:13)
Bèngyama benaas de Danyɛl a di e negwi-ywey
1E shey hê susu de Bɛlshazar á sè Da vwel Babilɔn, Danyɛl a ranas negwi, ko a di pyɛ cak e negwi-ywey, jeng de á sè e dyɛngɛ naturuk. A jɛk negwi o, ko pyɛ ma yemo:
2E ji turuk hane mo, ma di gul gwo pɛsɛl yi e mwa rǎ gùl naas, nshî gwogbɔng gworep na tē gundus. 3Bèngyama benaas ba nusu yi e ji nshi mo. Kagwɛ mo gwa sè detu. 4Gwo mɛsɛng gwa sé sede gukum, ko gwa vɔk bafabâk kim. Jeng de má sè bɛrɛng, ba pere lut vɛ. Ba tɛ̀ gwongyama mo gwo tumal e ra bol ba sede mwasi, ba nɔng gwɛ bare yerê hê mwasi.
5Gwongyama mo gwo neba gwa sé sede beyar e tumal e ra bol bamâ gwɛ. Gwa vɔk bekuhagat betat e tê yìn gwɛ, ko ba yang gwɛ, “Ci mɛ! Rē mwa banama de hwô sɛ̀!”
6E bama mo, ma di gwongyama mo gwo netat de gwa sé sede cwey. Gwa vɔk bafabak banaas e ra mâ gwɛ sede vê benon, ko gwa vɔk bato banaas. Ba nɔ̂ng gwɛ gbɔng reto.
7E tala mo, ma di gwongyama gwo nenaas de gwa nusu. Gwa sé pyɛ bengyip na pyɛ té lot, ko gwa vɔk gap hyiw. Yìn gwɛ ba sé rey o ve dyam, gwa tangal mɛ kayɛ pyɛ de gwa sɛ̀. Pyɛ́ de gwa re wɛt, gwa bɔrɔs yɛ. Gwa sé detu na bwang betat o, ko gwa vɔk ngɛngɛ kuru.
8Jeng de má sè bɛrɛng ngɛngɛ mo, ma vɛ̌ di kengɛngɛ ka sé ta e tê vɛ̀. Ko ba lut ngɛngɛ mo tat e ji kuru de ba kana sɛ gyam. Kengɛngɛ kemo mo ka vɔk bayis sede mwasi na nu de ka dak mɛ kaa.
Negwi-ywey e ra shɔ̂t Dagwi
9Sede má sè bɛrɛng, ma di ba tɛ̀ beta negwɔm e kwɔn vɛ.
Mwakûk bemakuk a sangal e ra gwining e ji mo,
berugu mɛ ba pɛngɛ sede nemuk-fwala,
tôt rato mɛ ha pɛngɛ sede kugul,
gwofwa negwɔm mɛ gwa tɛ̀ balêm kya,
ko bol gwofwa mo de gwa sé sede bol kyɛkyɛ, ba tē bwerep.
10Balem kya ba tele sede rɔt yi e nuyel mɛ. Regyɛng bemat de ha tɔk basa vɛ wɛt, ba sé e tumal e nuyel mɛ, na be ra a yɛ fwom. Ko bemât shɔt ba sangal, ba wunta bebok-basa.
11Ma re nuyel na bɛrɛng o, na me di pyɛ de yê sɛ̀ kengɛngɛ de ke ha ke dak kaa. E ji bɛrɛng o, ma di, ba mɔrɔ gwongyama gwo nenaas o, ba barak e ji kya, ba wey na gwɛ. 12Ko bwang bèngyama mo, ba sey ɛ retô vɛ, ko ba simo a vɛ, be re nuyel na sangal vɔk e jeng de bê yɛrɛ a vɛ.
13E bama mo, ma di e negwi-ywey naturuk hane mo, pyɛ cen cak sede mwasi. A sé kyè vey, bale ba gwɔrɔ hɛ, ko ba wɔ́ na yɛ na Mwakûk bemakuk o. 14Mwakûk bemakuk o a tɛ̀ ɛ a sè gbɔng gwɔ̀m, ko a nɔng ɛ reto na gbɔng nerey, yaga na mwa bemât yére bemât jey na yére bemasi de be ha balem detidetu be ra a yɛ fwom. Reto mɛ rê nàra gbak-gbak, bê sang wey na negwɔm mɛ wɛt.
Cap-hâ negwi-ywey o
15Me, Danyɛl, ma tɛ̀ bengyip sizɔng, yey hom ya bɔrɔk hɛ, yaga pyɛ́ de ma di e negwi-ywey. 16Ma wɔ na gwining e ji vemo de ba sé e tumal e hwomo, ma ra won na yɛ, na a misang a me pyɛ́ mo mwa. 17“Bèngyama benaas de hwà di ba sé e tô negwɔm nenaas de na rɔda nusu e jey, hak e bamâ hak. 18Ko e yɛnɛ mo, Dagwi De A Dal Na Reto Mwa ê nɔng bemat de ba sé bemɛ segwɔm, ko bê vɔk sɛ neshey gbak-gbak.”
19Ko ma simo me gwɛ tɔk e ra gwongyama gwo naas o, de gwa sé detu na bwang betat o. Gwa sé pyɛ bengyip sizɔng na yìn dyam tanga bekwǒk bol ve dyam pama. Gwa tangal kayɛ pyɛ de gwa sɛ̀. Pyɛ́ de gwa re wɛt, gwa bɔrɔs yɛ. 20Ko ma to simo na me tɔk e ra ngɛngɛ kuru e ratô gwɛ, a kat mɛ ngwɛngɛ gwining de gwa nusu e bama, ko gwa sey ɛ kwɔ̂n ngɛngɛ tat vane mo. Gwɛ a gwomo de gwa vɔk bayis na nu de ha dak kaa. E bɛrɛng hom, gwa sé sede gwa dal bwang o na nerey. 21Ma kana bɛrɛng ngwɛngɛ mo de gwa tó como na bemât Dagwi, gwa sè di wɛng e ra yɛn. 22Ko Mwakûk bemakuk a vey, a yɛrɛ shɔt, ko a gang a bemât Dagwi De A Dal Na Reto Mwa segwɔm, yaga jeng ya ga vey.
23Yɛ womo de ma rangal hɛ, a misang a me, a ye, “Gwongyama gwo nenaas o gwa sé e tô segwɔm sê nenaas de sê nusu e jey, ko sê sè detu na bwang segwɔm mwa. Sê wey na mwa yére bemât jey, sê hama yɛ ko sê bɔrɔs yɛ e vwel. 24Ngɛngɛ kuru ba sé e tô begbɔng begwɔ̀m kuru de bê re negwɔm nane mo, hwak e bamâ hwak. E bama mo, hwak à gbɔng gwɔ̀m ê nusu, ê se detu na bwang vê susu mo.
“A rɔda gang begbɔng begwɔ̀m betat o. 25Ê ha neha repugu e ra Dagwi De A Dal Na Reto Mwa, ko ê tak a bemat mɛ. Ê ye ngyɛ́k na a wey na badu Dagwi mwa na nzem de be ra a yɛ detidetu. Bemât Dagwi bê se e nɛn mɛ neshey netat na rebit o. 26E bama mo, bê ra a yɛ shɔt e hwomo e lagwi. Bê sey ɛ segwɔm mɛ, ko bê wey na yɛ hywiri.
27“Dagwi De A Dal Na Reto Mwa ê de nɔ̂ng bemat mɛ segwɔm mwa yére bemât jey. Segwɔm o sê dal mwa na reto na nerey, sê nàra gbak-gbak. Bemât mwa segwɔm o bê gyeng hâ bemat mɛ mo, ko bê ra a yɛn fwom.”
28Yɛnɛ̂ pyɛ́ de ma di e negwi-ywey a yemo. Me, Danyɛl, ma ye lot sizɔng, bwang bayis hom gwa pere sege hɛ, ko ma tik pyɛ́ yemo mo mwa e yey hom.
Currently Selected:
Danyɛl 7: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
