Danyɛl 6
6
Danyɛl e ji revɔng begukum
1Dariyus a di a jam a yɛ, na a gas sevwel mɛ e bebak vwel naga na kuru baba (120), ko a tɛ̀ begwɔmna e kawɛ bak vwel o. 2A to tɛ̀ bemat betat de bê vɔk reto e ra begwɔmna mo, yaga na be dul pyɛ vyes cak de yê lashe Da Vwel o. Danyɛl á sè hwak e ji betat o.
3Danyɛl a dura tɔ̂k râ fwom de ha dal hê bwang beba mo tanga begwɔmna. Yaga ano, Da Vwel a yong ɛ, na a tɛ̀ ɛ a sè wo bɛrɛng mwa neyɛnɛ segwɔm mɛ. 4Yi ano, bwang beba vane mo tanga begwɔmna ba ye ngyɛ́k, na be sɛ̀ buru na Danyɛl e ji fwom mɛ. Ko ba sɛ̀ pyɛ cak wɛt, yaga a ra fwom mɛ na tsak o, vit a hɛ na buru kɛ nemùt. 5E yɛnɛ mo, yɛn a yâng bemɛn, “Wot ê sɛ̀ pyɛ cak de wot ê tɛ̀ mɛ sekûn Danyɛl wɛt, sɛ̌ wot a jama hɛ na nɛn e raà negwɔn Dagwi mɛ.”
6Ano kwong, ba wuna to mɛn, ba wɔ́ e nuyel Da Vwel, ba yang ɛ, “Neken mō ne ros, à Da Vwel Dariyus! 7Mwa wot bemat de ba vɔk reto e ra begwɔmna, na begwɔmna, na begbɔng begwɔ̀m, na bedagwɔm tanga bwang bemât nuyêl fwom mō wot a ga simo, a jam na hwo tɛ̀ redu de bê tɛ̀ rɛ re se gbing-gbing. À darwey, tik hwo nɔng redu wɔgɔ, a sé kyiri na mwat a ra won na cī kɛ mwat ayi sɛ̌ na hwo zɔng nepɔlɔ kuru batat. Kawɛ mwat de a gyili redu remo, tik be barak hɛ e ji revɔng begukum. 8Tɛ̀ be jɛk redu mo, na hwo tɛ̀ vwɔ. Ano be tɔk sege rɛ wɛt, sede remo de be tɔk sege redu BeMedya na BePɛrsya wɛt.”
9Da Vwel Dariyus a tɛ̀ be ra ano, ko a tɛ̀ vwɔ mɛ e ra redu mo.
10Sede Danyɛl a wok, Da Vwel a ga tɛ̀ vwɔ e ra redu mo, a kyè vɔk e lɔ. E duk rak o wo lɔ mɛ, bapɔk ba sɛ́ de be bɛrɛng wɔ sɛ̀ Yɛrusalɛm. A ye guduruk e vwel, bapɔk e wunta, ko a ra won, a somo Dagwi, sede remo de a ga kana tɔ́k ɛ mɛ zang tat e tuk hining. 11Bemât repugu mɛ ba vey, ba sɛ̀ ɛ a sé ra won, a jama sɛlɛ na Dagwi mɛ. 12Mwa hɛn ba toyo wɔ na Da Vwel, ba yang ɛ, “Neken mō ne ros! À Da Vwel, hwà ga tɛ̀ vwɔ e ra redu wɔgɔ, a sé kyiri na mwat a ra won na ci kɛ na mwat ayi sɛ̌ na hwo zɔng nepɔlɔ kuru batat wɛt arɛt? Ko ka ano wɛt, bê barak hɛ e ji vɔng begukum wɛt arɛt?”
Da Vwel a hanat, a ye, “Ey, redu mo ra sé ano, tyɛng na badu BeMedya na BePɛrsya, vit à sege.”
13Ano kwong, yɛn a yâng Da Vwel, “À darwey, mwat womo, Danyɛl, gwining e ji besam de ba hashe yi e Yuda, e kyɛ́ ɛ nà nɔng o nerey, ko e gyeng redu de hwà tɛ̀ vwɔ mō wɛt. E ra a ci mɛ won kayɛ jeng zang tat tuk hining.”
14Jeng de Da Vwel a wok ano, yey mɛ ya beseng hɛ. A simo a sey Danyɛl, ko a wosho e de jamâ begwong o vɔk e gabâ gwi.
15Jeng de gwi gwa gaba, bemat vane mo ba toyo na Da Vwel, ba yang ɛ, “Neken mō ne ros, à darwey. Hwà tɔk, e ra badu vê BeMedya na vê BePɛrsya be tɔk sege redu kɛ kyìri de Da Vwel a tɛ̀ vwɔ mɛ wɛt.”
16Ano kwong, Da Vwel a nɔng nu, be vey na Danyɛl, na be wɔ̀ barak hɛ e ji revɔng begukum! Ko a yâng Danyɛl, “Tik na Dagwi de hwo re a yɛ fongol na tsak o, a sey o.”
17Ko ba vey na gwofwa, ba bang mɛ nû revɔng o. Da Vwel kwong a rusu ɛ tô-gwɔ̀m mɛ na hê bemât vô redu mɛ. Yi ano, vit a mwat de ê tɔk sey Danyɛl. 18E bama mo, Da Vwel a toyo wɔ e lɔ mɛ, ko a re pyɛ́ wɛt, a simo mwat hwak a yel na yɛ wɛt, a pɔl bɛɛ̀ jey.
19Ras de gasi ha ye gbey, a sogo, a kyè dey-dey vɔk e revɔng begukum o. 20Sede a vey bagat, a yila na yêy lashe, a ye, “À Danyɛl, sam Dagwi wo neken! Dagwi de hwó re a yɛ fongol na tsak o a ga kyɛm a sey o yi e begukum o bɛ?”
21Ko Danyɛl a hanat, a ye, “Neken mō ne ros, à darwey! 22Dagwi a tɔk, vit a me na renɛn, ko a tomo tom-lagwi mɛ, na a bang nenu begukum o, ko ba tɔk mǎ mɛ wɛt. Ma ga sang buru a hwo na pyɛ cak arɔng wɛt, à darwey.”
23Da Vwel o a sila na yey pyɛng sizɔng, a nɔng nu be pat Danyɛl yi e ji revɔng o. Ba pat ɛ, ko ba di vit a ram e rebek mɛ ko tyɔng, yaga a tɛ̀ gap mɛ e ra Dagwi mɛ. 24Ano kwong, Da Vwel a nɔng nu, be vos mwa bemat de ba tɛ̀ kûn Danyɛl o, ko ba barak hɛn, yɛn na beha mɛn na nèy mɛn e ji revɔng o. Gyam be wul tîn revɔng o, begukum ba hwo e ra yɛn, ba kwɔrɔs bekup mɛn cɛk o cɛk o.
25Da Vwel Dariyus a jɛk bwok-rwang vɔk na bemat e mwa yére bemât jey na yére bemasi de ba sé sangal e ji jey mwa. Ba jɛk gwɛ e balem detidetu ngan:
“Ma mok a yin netyang na rê nuyel!
26“Ma sé nɔng nu wɔgɔ, mwa e neyɛnɛ̂ bavwel segwɔm hom, gbing-gbing kawɛ mwat a tele hɛ Dagwi wo Danyɛl, ko a nɔng ɛ nerey arɔng.
“Yɛ a sé Dagwi wo neken,
ê nàra nesheneshey.
Bê sang wey na segwɔm mɛ wɛt,
ko reto mɛ rê nàra gbak-gbak.
27E seres bemat, e tɛsɛ hɛn washak,
e ragas pyɛ̂ langat na yê bes e lagwi na e jey arɔng.
E yɛ de a sey Danyɛl yi e nû begukum.”
28Mwa pyɛ́ ya kyè a Danyɛl tyang e jeng de Dariyus á sè Da Vwel, na e jeng Kɔrɛsh WoPɛrsya arɔng.
Currently Selected:
Danyɛl 6: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
