Danyɛl 5
5
Jɛk e ra vwarâ duk
1-2Tuhak, Da Vwel Bɛlshazar, hwêy Nɛbukadnɛzar,#5:1-2 hwêy Nɛbukadnɛzar: E ji hâ mwin, Bɛlshazar á sè hwêy tɔ̂ Nɛbukadnɛzar wɛt, ko á sè yi e lɔ negwɔm hak, ko e jeng raane, ba tɔk yila gbɔng gwɔ̀m de a kana re negwɔm à dâ gwɔ̀m wo remo. a rini gu e ji begbɔng o vê nuyel mɛ nzem, ko a sɔ nshî anap tanga yɛn. Jeng de a ga wɔt, a nɔng nu, be vey na neshǐ sɔ de ba yong na dyam shinang na dyam pyɛng de da mɛ Nɛbukadnɛzar á kana hashe yi e Gbɔng Duk Re Fongol e Yɛrusalɛm. A simo, yɛ tanga bemat mɛ, na beha mɛ tanga bejɛn beha mɛ, be sɔ nshî anap na nɛ. 3Jeng de ba vey na neshǐ dyam shinang o mwa hɛn ba sɔ nshî anap e ji nɛ. 4Ba sɔ ko ba somo cī de ba yong na dyam shinang, na dyam pyɛng, na dyam pama, na dyam, na cɔgɔt tanga gwofwa.
5Gbogolok, ba pere di vwɔ̂ mwasi gwo jɛk e ra vwarâ duk lɔ gwɔ̀m bagat na pyɛ tikîs kywa-kya. Ko Da Vwel o a di vwɔ de gwa sé jɛk. 6A tɛ̀ bengyip, bwang bayis mɛ gwa doyo hɛ, bol mɛ ba rɛ̌, ko bakwot mɛ ba tɛs bemɛn. 7A yila na gbɔng fwɔ, be vey a yɛ na bemât tô bes na vê vyoshon tanga bemat de ba tɔk pyɛ́ de ya sé e lɛrɛ. Jeng de ba vey, a yang ɛn, “Mwa mwat de a basa a me basa hemo, na a ha a me cap-hâ hɛ, ê tɛ́ ɛ́ wo netat e ji negwɔm bavwel o. Ba rɔda tɔrɔ hɛ na gworugû negwɔm gworwat, ko bê tɛ̀ a yɛ lwɛlɛ̂ fwɔ gwô dyam shinang.”
8Bemât vo a Da Vwel o redu ba vey, ko vit a hwak de a tɔk basa jɛk o, kɛ a misang a yɛ cap-ha mo. 9Da Vwel o a gwɛ̌ tɛ̀ bengyip ding-ding, ko bwang bayis mɛ ba gwɛ̌ doyo hɛ. Bemât nuyel mɛ arɔng, a sé a yɛn kpɔrɔk.
10Neng-gwɔ̂ Da Vwel o a wok neha hwey mɛ na bemât nuyel mɛ, ko a yel e lɔ̂ nzem o, a ye, “Neken mo ne ros, à darwey! Hwo kwon tik na pyɛ yemo ye bɔrɔk hwo, na bwang bayis mo gwo doyo hɛ wɛt. 11Mwat hwak a sé e ji sevwel mō de a vɔk gabîk cī e ji mɛ. Jeng de da mō Nɛbukadnɛzar á sè re negwɔm, mwat wane a vɔk tɔ́k na netsitsɛng de na sé sede ne cī. Da mō a tɛ̀ ɛ gwɔ̀m mwa bemât vyoshon na vê tô bes, na bemat de ba tɔk pyɛ́ de ya sé e lɛrɛ. 12Be tang mwat o à Danyɛl, ko da mō a vo a yɛ rezâ Bɛltɛshazar. A vɔk tɔk na netsitsɛng zɔng wɛt, ko a tɔk misâng negwi, e misang neha de na kwey cik wɛt, ko e misang pyɛ́ de ya sé e lɛrɛ. Tomo, be yila hɛ. A rɔda misang a hwo pyɛ́ de ya sé e jɛk o.”
13Ba pere vey na Danyɛl e nuyel Da Vwel, ko Da Vwel o a yang ɛ, “Ko sɛ̌ hwo wɛ à Danyɛl WoYuda de da hom a vey mɛ yi e sevwêl Yuda! 14Ma ga wok, gabîk cī ha sé e ji mō, ko hwà sila na tɔk na netsitsɛng. 15Ba ga vey na bemât vo redu na bemât tô bes, na be basa jɛk hemo, be ha a me cap-hâ hɛ, ko ba tɔk wɛt. 16Ko ma wok, hwó tɔk ra hwâl pyɛ́ de ya sé gbang, hwó tɔk misang pyɛ́ de ya sɛ́ e lɛrɛ arɔng. Ka sede hwà tɔk basa a me jɛk hemo, na hwo ha a me cap-hâ hɛ, hwô tɛ́ o wo netat e ji segwɔm bavwel o. Ba rɔda tɔrɔ hwo na gworugû negwɔm gworwat, ko bê tɛ̀ a hwo lwɛlɛ̂ fwɔ gwô dyam shinang.”
17Danyɛl a toyo a yɛ, a ye, “À darwey, vɔk nenɔrɔ mō kɛ hwo nɔng rɔ̀n ow. Ko ma rɔda basa a hwo pyɛ de ba jɛk, na me ha a hwo cap-hâ yɛ. 18Dagwi De A Dal Na Reto Mwa a tɛ̀ da mō Nɛbukadnɛzar gbɔng Da Vwel de a vɔk nerey na gbɔng nerat. 19Yi ano, bemat e mwa yére bemât jey na yére bemasi de be ha balem detidetu ba vow e nuyel mɛ. Sede a simo ê wey na mwat, ê wey mɛ zɔng, ko mwat de e simo tik ɛ kwen ê tik ɛ kwen. Sede a simo, ê tɔk nɔ̂ng mwat nerey kɛ ê lol a mwat nerey ow. 20Ko jeng de a hwo tos to mɛ, a tɛ̀ yey mɛ gbarak, ba pat ɛ yi e negwɔm o, ba gas ɛ na nerey mɛ. 21Báre mɛ ha tɛ́ ɛ sede hê ngyama, ko ba ró ɛ yi e ji bemasi, a sangal na bemadung hey, a re sɔng sede rɔndɔng, a pɔlɔs e tê-dyɛng, kwɔn de mwɛngɛ gwa gabsa e ra yɛ. A re nuyel e ji negwɔn nemo mo sɛ̌ jeng de a tɔk, Dagwi De A Dal Na Reto Mwa, yɛ wɛ a vɔk mwa segwɔm jey e vwɔ mɛ, ko e kasa bemat de bê re negwɔm o.
22“Ko hwo sɔ mɛ, à Da Vwel Bɛlshazar, hwà tɔk pyɛ́ yemo mwa, ko hwà dyɛng to mō wɛt. 23Hwà ga ra a Darwey de e re negwɔm yi e lagwi, hwà jut neshǐ sɔ yi e Gbɔng Duk Re a yɛ Fongol. Hwo na bemât nuyel mō, na beha mō tanga bejɛn beha mō, yin a sɔ ɛ nshî anap, ko yin a somo cī de ba yong na dyam shinang, na dyam pyɛng, na dyam pama, na dyam, na cɔgɔt tanga gwofwa. Yɛ a pyɛ́ de ye tɔk bɛrɛng kɛ wok wɛt, ya tɔk pyɛ cak wɛt. Ko hwà nɔ̂ng Dagwi de a vɔk neken mō e vwɔ mɛ nerey wɛt, yɛ de e kyè na hwo. 24Yaga ano de a tomo vwɔ gwomo gwo jɛk e ra vwarâ duk.
25“Batîn ha de gwa jɛk vɛ à: MENE MENE TEKEL U-FARSIN. 26Cap-hâ batîn ha ma vemo ngan:
“MENE wɔgɔ, Dagwi a ga bara nepɔlɔ̂ segwɔm mō, na ga tala hɛn.
27TEKEL wɔgɔ, a ga mara hwo e ra pyɛ mara, ko hwà ga radɛ hwo.
28U-FARSIN wɔgɔ, a ga gas segwɔm mō, ko a ga nɔng sɛ na BeMedya tanga BePɛrsya.”
29Bɛlshazar, a pere nɔ̂ng bemât fwom mɛ nu, be tɔrɔ Danyɛl na gworugû negwɔm gworwat, na be tɛ̀ a yɛ lwɛlɛ̂ fwɔ gwô dyam shinang, ko a tɛ̀ ɛ wo netat e ji segwɔm bavwel o.
30Naturuk nane mo, ba mɔrɔ Bɛlshazar, Da vwel Babilɔn, 31ko Dariyus WoMedya a sey ɛ segwɔm o. E jeng o, a vɔk neshey kuru batyiimin na nɛ neba (62).
Currently Selected:
Danyɛl 5: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
