Danyɛl 4
4
Negwi Nɛbukadnɛzar ne neba
1Da Vwel Nɛbukadnɛzar a tomo bwok-rwang vɔk na bemat e mwa yére bemât jey na yére bemasi de ba sé sangal e ji jey mwa. Ba jɛk gwɛ ngan e balem detidetu:
Me mok a yin netyang na rê nuyel!
2Ma vɔk yey pyɛng na me ha a yin e ra pyɛ̂ bes yê langat de Dagwi De A Dal Na Reto Mwa a ga ra a me.
3Ey, pyɛ̂ bes mɛ ya sé ryey o,
ya vɔk reto.
E re negwɔm gbak-gbak,
segwɔm mɛ sê nàra yi e nezamang vɔk e nezamang.
4Me, Nɛbukadnɛzar, má sè sangal na yey pyɛng na netyang e lɔ hom. 5Turuk hak, jeng de ma sè nevwa, ma ranas negwi neves de na nɔng me bengyip. Mwin, ma di pyɛ bengyip sizɔng. 6Ma nɔng nu, be yila a me mwa bemât vo redu e sevwêl Babilɔn, yaga na be ha a me cap-hâ negwi o. 7Jeng de bemât tô bes, na vê vyoshon, na vemo de ba tɔk pyɛ́ de ya sé e lɛrɛ ba vey, ma ha a yɛn negwi hom, ko ba tɔk misang a me nɛ wɛt. 8E yɛnɛ mo, Danyɛl a vey e nuyel hom, ko ma ha a yɛ negwi o. Gabik cī ha ga nɔng ɛ reto, ko ma ga vo a yɛ rezâ Bɛltɛshazar e ra rezâ ci hom Bɛl. 9Ma yang ɛ, “À Bɛltɛshazar, gwɔ̀m bemât vyoshon, ma tɔk, gabik cī ha sé e ji mō. Vit a pyɛ de ya sé e lɛrɛ de hwô tɔk kula wɛt. A remo, misang a me cap-hâ negwi hom. 10Pyɛ́ de ma di jeng de má sè e dyɛngɛ a yet:
“Ma bɛrɛng, ko ma di tîn cɔgɔt lis o e tê jey. 11Ha ras, ha tɛ̀ gap, nû hɛ ha wɔ̀ ra lagwi, ko ba tɔk bɛrɛng hɛ yi e kawɛ bak jey. 12Berang hɛ bá sè berat sizɔng e bɛrɛng, ko ha mara nèy yɔkyɔk de na vey na mwa jey ye re. Ngyāma ye dyɛngɛs e necam hɛ, benon ba lɔkɔs barɛngɛ mɛn e nelang o, ko kayɛ pyɛ cen ya re nèy hɛ.
13“Má sè rɔngɔl e dyɛngɛ, ko ma di tom-lagwi a sé gyirik yi e lagwi, a sé mwât bɛɛ nekanâng jey. 14A hanat na gbɔng fwɔ, a ye, ‘Be gang cɔgɔt o, be cɛrɛng nelang yɛ, be rwagat berang o, be lagam nèy yɛ pyɛt! Be ro ngyāma de ya sé e necam yɛ, na benon yi e nelang yɛ. 15Ko be tik ɛ kpɔk tîn cɔgɔt o na berinis gwɛ e vwel. Be rɔgɔs gwɛ na ngyang de ba yong na dyam tanga dyam pama, na gwo nàra e hwomo e vwel e ji sɔng e hey.
“ ‘Be tik mwat womo mo, a sangal na ngyāma tanga pyɛ́ de ye tabas e hey na mwɛngɛ gwo gabsa e ra yɛ. 16Be tik, a vɔk bare hê bemasi wɛt, ko hê ngyama, ê nàra ano neshey netaama. 17Shɔt a yemo de betom-lagwi, vɛ à bemât bɛɛ nekanâng jey ba yɛrɛ. Yi ano, mwa bemasi e kagwa bê tɔk, Dagwi De A Dal Na Reto Mwa a vɔk mwa segwɔm jey e vwɔ mɛ. E yɛ de e kasa mwat de ê re negwɔm, ka a ka sé womo de a ka vey pyɛ cak wɛt.’ ”
18Negwi a nemo de me, Da Vwel Nɛbukadnɛzar, ma ranas. A remo, à Bɛltɛshazar, misang a me nɛ. E ji segwɔm hom, vit a gwining e ji bemât vô redu de a kyɛm a kulu a me nɛ. Ko hwo, hwà tɔk, yaga gabîk cī ha sé e ji mo.
19Danyɛl kwong, de be to yila hɛ a Bɛltɛshazar, a tumal ziing, yey mɛ ya bɔrɔk hɛ, a bidɛ pyɛ de ê ha. Ko ma yang ɛ, “À Bɛltɛshazar, hwo sap yaga negwi o na cap-hâ nɛ wɛt.”
Ko a toyo a me, a ye, “À darwey, ma yâng simo ka negwi o na cap-hâ nɛ ne sè yaga bemât repugu mō, ko ná hwo wɛt! 20Hwà ga di tîn cɔgɔt de ha ras, ha tɛ̀ gap sɛ̌ ha wɔ̀ ra lagwi, ko ba tɔk bɛrɛng yɛ yi e kawɛ bak jey. 21Berang hɛ bá sè berat sizɔng e bɛrɛng, ha mara nèy yɔkyɔk de na vey na mwa jey ye re. Ngyāma ya dyɛngɛs e necam hɛ, benon ba lɔkɔs barɛngɛ mɛn e nelang o. 22À darwey, hwo wɛ a tîn cɔgɔt o! Hwà sila na nerey tanga gap. Nerey mō na wul lagwi, segwɔm mō arɔng sa wul vɔk e neyɛnɛ jey mwa.
23“Hwà di tom-lagwi a sé gyirik yi e lagwi a sé mwât bɛɛ nekanâng jey. A ye, be gang tîn cɔgɔt o, be wey na hɛ, ko be tik kpɔk tin o na berinis gwɛ e vwel. Be rɔgɔs gwɛ na ngyang dyam tanga dyam pama, na gwo nàra e hwomo e vwel e ji sɔng e hey. Tik mwɛngɛ gwo gabsa e ra mwat womo mo, ko tik a sangal tanga ngyāma neshey netaama.
24“À darwey, Dagwi De A Dal Na Reto Mwa a ga yɛrɛ redu e ra pyɛ de yê sɛ̀ o. 25Ba rɔda ró o na sangal e ji bemasi, ko hwô sangal tanga ngyāma. Hwô re sɔng sede rɔndɔng, ko hwô pɔlɔs e tê-dyɛng, kwɔn de mwɛngɛ gwô gabsa e ra hwo neshey netaama. E bama mo, hwô de tɔk, Dagwi De A Dal Na Reto Mwa yɛ wɛ a vɔk mwa segwɔm jey e vwɔ mɛ, ko e kasa bemat de bê re negwɔm o. 26Ba nɔng nu be tik kpɔk tîn cɔgɔt o na berinîs gwɛ e vwel. Hemo he dura, hwà rɔda to ba re negwɔm e bama de hwà ga tɔk, Dagwi de e re negwɔm yi e lagwi a vɔk jey mwa e vwɔ mɛ. 27Yaga ano, à darwey, raa redu de mê vo a hwo: Tik ragâs banɛn, na hwo ra pyɛ́ de ya sé cik. Gas o yi e negwɔn neves, ko hwo wok nemwishish bepɛng. Ka ano wɛt, yey pyɛng mō yê ros wɛt.”
28Mwa pyɛ́ de Danyɛl a ha mo, ya tē. 29Á sè e bamâ shey hining, jeng de má sè gwɔrɔ e ragyip lɔ hom e Babilɔn, 30ma ye, “Ányeyêy! Di, yere nerey de Babilɔn wa vɔk! E me wɛ, ma lɔk rɛ, na re sè gbɔng repomô negwɔm hom. A sé na gap hom de ma lɔk rɛ, na me dura mɛ reto hom na nerey hom!”
31Ma ga kana bang nu wɛt, ko ma pere wok fwɔ yi e lagwi, gwo tē, “À Da Vwel Nɛbukadnɛzar, ba ga sey ɛ segwɔm mō yi na hwo! 32Ba rɔda ró o na sangal e ji bemasi, ko hwô sangal tanga ngyāma. Hwô re sɔng sede rɔndɔng neshey netaama. E bama mo, hwô de tɔk, Dagwi De A Dal Na Reto Mwa yɛ wɛ a vɔk mwa segwɔm jey e vwɔ mɛ, ko e kasa bemat de bê re negwɔm o.”
33Há mo ha pere sila hɛ: Ba ró me yi e ji bemasi, ko ma re sɔng sede rɔndɔng. Mwɛngɛ gwa gabsa e ra rebek hom, setot hom sa ras sede bafabâk kim, ko bekwǒk beken bol na vɔ hom ba ras sede ve gwonon.
34E bama de neshey netaama na kwey, ma bɛrɛng vɔk e lagwi, ko nehywɛ hom na ga to ɛn e ji hom. Ma ye:
Ma feng a Dagwi De A Dal Na Reto Mwa,
me somo hɛ, me nɔng ɛ nerey,
yɛ de a sé kwen nesheneshey!
E re negwɔm gbak-gbak,
segwɔm mɛ sê nàra yi e nezamang vɔk e nezamang.
35Mwa bemasî jey ba sé pyɛ cak e nuyel mɛ wɛt.
E ra pyɛ de ya jam a yɛ zɔng
na vemo de ba sé sangal e lagwi,
tanga vemo de ba sé sangal e ji jey.
Vit a mwat de e dul ɛ,
kɛ a wunta nu na a rangal hɛ,
“E sɛ́ de hwà ra ɛ?”
36E ji jeng o, nehywɛ hom na toyo. Ma to sɛ̀ gbɔng reto na nerêy Da Vwel. Bemât nuyêl fwom na bemât vô redu hom ba vey sey me, ko ba to nɔng me nerêy segwɔm de na dal ne susu mo.
37A remo, me Nɛbukadnɛzar, ma sé somo Gbɔng Gwɔ̀m de a re negwɔm yi e lagwi, me nɔng ɛ nerey! Mwa pyɛ de e ra ya sé tyɛng, tomong mɛ ba sé tsak o arɔng, ko kawɛ mwat de e tos to mɛ, yɛ e tɛ̀ ɛ, a dyɛng to.
Currently Selected:
Danyɛl 4: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
