Danyɛl 12
12
Bak wo nenaas: Bavîn bemat bê sogo na neken
1E jeng yane mo, Mikayɛl, yɛ gbɔng o wo betom-lagwi, de e dul bemat mō a rɔda dura to mɛ. Jeng o yê sè jeng reyɔm, reyɔm reves de ra ga sang tɛ́ wɛt yimo de bemat mō ba tɛ́ ɛn yerê sevwel vey e remo. Ko bê sey nekên mwa bemat mō de ba ga jɛk baza mɛn e ji bwok-basâ Dagwi. 2Pyak e ji vemo de ba ga kushu bê to sogo na neken, behak na be sey neken gbak-gbak, ko behak na be sè pyɛ byɛs, bê sɔ rekyɛn gbak-gbak. 3Vemo de ba vɔk tɔk ba rɔda nɛp sede newɛshɛrɛ̂k lagwi. Yɛn a ga basa a bemat pyak gwong de gwa sé tɛk, ko yɛn ê nɛp sede netangacɛn gbak-gbak.
4“À Danyɛl, tik yaang pyɛ́ de ma ga ha a hwo. Jɛk yɛ e bwok-basa, na hwo man gwɛ na negang sɛ̌ jeng talâ jey. Bemat pyak bê kyě bɔ́rɔng, ko a sé e ji bwok-basa gwomo de bê sè hwal o.”
Bak wo netungun: Bavîn bemat bê sogo na neken
5Jeng de me, Danyɛl, ma sé rɔɔ bɛrɛng pyɛ́ e negwi-ywey, ma di bemat beba e tumal e vwarâ Gwɔrɔt Tigris, kawɛ e kwogom het. 6Gwining mɛn a rangâl mwat de a tɛ̀ berugû lilen, de a tumal tyɔng wɔ sɛ̀ bak bàto gwɔrɔt o, a ye, “Ê ros vɔk e yɛ̌ jeng de pyɛ̂ langat yemo yê té ɛ?”
7Mwat de a tɛ̀ berugû linen o a nára vɔ mɛ mwa bà vɔk e lagwi, a ye, “Ma sira me na Dagwi wo neken gbak-gbak, pyɛ́ yemo yê jut neshey netat na rebit o. Bê yɛnɛ pyɛ́ yemo, e bama de ba ga yɛnɛ tak a bemât Dagwi.”
8Ma wok pyɛ de a ha, ko ma tɔk yɛ wɛt. Yaga ano, ma rangal, ma ye, “À darwey, e rɛ̌ de pyɛ́ yemo yê yɛnɛ hɛ arɛt?”
9Ko a toyo a me, a ye, “Kyè kwɛngɛl mō, à Danyɛl. Neha de ma ha na sé neha yaang, ko ba rɔda lɛrɛ nɛ sɛ̌ jeng yɛnɛ mo ya vey. 10Dagwi ê mara bemat pyak sede be rugut dyam, yaga na, e tala mo, neyey mɛn ne sè haalal. Bemat beves bê tɔk pyɛ́ mo wɛt, bê re nuyel na ragâs neves, ko vemo de ba vɔk netsitsɛng bê tɔk yɛ̄.
11“Yi e jeng de bê ro mɛ na nása nenɔrɔ ne kahɛ tuk na be tɛ̀ pyɛ sekwit yemo de yê tɛ̀ kwɔ̂n jɛrɛ byɛm-byɛm, nepɔlɔ gu rining na naga beba na kuru shabatat (1,290) nê kwey. 12Vê wɛng a vemo de ba niri sɛ̌ nepɔlɔ gu rining na naga betat na kuru na ne netungun na kwey, 1,335!
13“Ko hwo, à Danyɛl, re nuyel na râ pyɛ́ de ya sé yɛt. E bama mo, hwo pɔnglɔ, ko e yɛnɛ mo, hwô ba sogo, ko hwô sey pyɔlɔ mō.”
Currently Selected:
Danyɛl 12: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
