Danyɛl 11

Hâ tom-lagwi vɔk na Danyɛl

1Me pyɛ hom ma ga sɛlɛ hɛ e shêy susu hê negwɔm Dariyus wo Medya.

Bak wo mɛsɛng o: Begbɔng begwɔ̀m benaas na vemo de ba raa hɛn

2A remo, mê há a hwo tsak ô pyɛ́ de ye kyè wɔ té e nuyel. Bê to sɛ̀ begbɔng begwɔ̀m behak betat, hwak e ra hwak, de bê sogo e Pɛrsya. Wo nenaas o a rɔda dal ɛn na nedanerey vitvit, ko jeng de a ga tɛ̀ gap yi na nedanerey mɛ mo, ê tɔgɔs bemat mwa na be hwo e ra segwɔm Giris. 3E bama mo, gbɔng gwɔ̀m sugâ como hwak ê sogo, ê re negwɔm e ra gbɔng vwel yɔkyɔk, ko ê ra pyɛ de yey mɛ ya di zɔng. 4Ko jeng de segwɔm mɛ mo sa ga lɔk ɛ mwamwa, sê gaba, sê gas ɛ zang naas e ra naas, ko mwa nɛ nê sè e vwɔ̂ yére mɛ wɛt, ko nê vɔk retô yerê gbɔng gwɔ̀m sugâ como mo wɛt.

5Gbɔng gwɔ̀m rwa batin ê gwɛsɛ gap. Ko hwak e ji bemât nuyêl como mɛ ê sogo nehywɛ, ko ê sey ɛ bwarwêy segwɔm o. 6E bama neshey nehak gbɔng gwɔ̀m rwa batin na wo rwa bato bê wuna hɛn e nesa. Gbɔng gwɔ̀m rwa batin ê nɔng hwóng mɛ e weneng na gbɔng gwɔ̀m rwa bato, na be dura mɛ wunâ nesa mo. Ko retô hwong o rê ros wɛt. Yɛ na da mɛ, na rwas mɛ tanga bemât fwom de ba dop na yɛ ba rɔda wey na yɛn mwa.

7Hwak e ji yerê hwong o ê vey re negwɔm ne rwa batin. Ê hwo e ra bemât comô gbɔng gwɔ̀m rwa bato, ê yel e kwɔ̂n dal mɛ, ko a re ɛn na como. 8Ê hashe cī mɛn na pyɛ́ ryat ye dyam shinang na dyam pyɛng de ba ra mɛ fwom yaga cī mɛn wɔ e Misra. Ko ê ra a gbɔng gwɔ̀m rwa bato pyɛ cak wɛt. Ko bê jut neshey, 9ko gbɔng gwɔ̀m rwa bato ê wɔ hwo e vwêl gbɔng gwɔ̀m rwa batin, ko ê toyo wɔ e sevwel mɛ.

10Nèy bewen mɛ na rɔda yong ɛn yaga como, nê tula gwakû regyɛng bemât como. Bê vey sede tɛmɛ-nshi, bê hwo e ra bemât repugu mɛn sɛ̌ ba wɔ wul kwɔ̂n dâl gbɔng gwɔ̀m rwa batin. 11Gbɔng gwɔ̀m o ê sogo na shom, na a wɔ tó como na gbɔng gwɔ̀m rwa bato, ko ê re como mo, mwa ano de a vɔk gwogyɛng bemât como. 12Gbɔng gwɔ̀m rwa batin ê dak kaa, yaga a ga wey na bemât como, gu e ra gu. Ko mwa ano, wɛng me hê nàra pyak wɛt. 13Gbɔng gwɔ̀m rwa bato ê to gwɛ̌ nepyak regyɛng bemât como de na dal ne mɛsɛng o, ko e bamâ neshey nehak ê to toyo na bemât como mo na pyɛ̂ como yɔkyɔk.

14E jeng yane, bemat pyak bê sogo e ra gbɔng gwɔ̀m rwa batin. Ko di, à Danyɛl, bemât paa neshágarak yi e bemat mō, bemat bê wuna bato mɛn na yɛn, na be bin tɛ̀, pyɛ̂ negwi-ywey o ye té. Ko bê di wɛng wɛt. 15Gbɔng gwɔ̀m rwa bato ê vey, ê hwo e ra gbɔng repomo de ba gwɔrɔ na jwâ-pomo, ko ê lɔk nekwɔn kweres wo tut e ra jwâ-pomo mo, na a tɔk re rɛ. Ê re rɛ. Bemât comô gbɔng gwɔ̀m rwa batin mwa na besuga mɛn bê tɔk tumal wɛt. 16Ko gbɔng gwɔ̀m rwa bato ê tɔk ra pyɛ de e simo, yaga vit a mwat de ê tumal a yɛ. Ê sey ɛ vwel de ha dal na nerat arɔng, ko ê wey na hɛ. 17Ê yong ɛ na a sey ɛ segwɔm sê rwa bato. Ê wuna nesa na gbɔng gwɔ̀m rwa batin, ê nɔng ɛ hwóng mɛ e weneng, yaga na a ra gwong yé gup a segwɔm sá mɛ mo. Ko netsitsɛng mɛ mo nê re wɛt.

18E bama mo, ê doyo, na a hwo e ra yére bemât jey de ya sé e rekwogom gworep, ê re pyak e ji mɛn na como. Ko gbɔng o wo bemât como hwak dūk o, ê di wɛng e ra yɛ, ko ê tɛ̀ yɛnɛ̂ paà kwas mɛ. 19Gbɔng gwɔ̀m rwa bato mo ê toyo e nekwɔn dal ne vwel mɛ, ko ê di gawey, hemo hê se yɛnɛ mɛ.

20Gbɔng gwɔ̀m de ê tut e ra negwɔm o, ê tomo mwât seres dyâm vwel, na a gwɛ mɛ nepyak nedanerey e ji yɛnɛ̂ segwɔm mɛ. Ko e ji jeng tyɔng, ba rɔda mɔrɔ gbɔng gwɔ̀m wane mo yaang, ko ê sè na como wɛt.

Bak wo neba: Gbɔng gwɔ̀m vwes yi e rwa bato

21Hwak à gbɔng gwɔ̀m de a vey pyɛ cak wɛt, yɛ a ka sé wo lɔ gwɔ̀m wɛt, ê pere tulu, ê sey ɛ negwɔm o e gwông netsitsɛng. 22Ê yishing bagyɛng bemât como vê gap, ko ê wey na mwat nuyel bemat Dagwi. 23A rɔda kwɛlɛng yére bemât jey cak yi na wuna hɛ na sira tanga yɛ. Ê gwɛsɛ ɛ gap, mwa ano de bemat tyɔng zɔng bê raa bama mɛ. 24A rɔda hwo e ra bak vwel de wa dal na nerey hák. E hwomo ê ra pyɛ de hwak e ji bedabeda mɛ ba ga sang ra wɛt, ê gas a bemat de ba raa hɛ pyɛ́ de ba hashe e de jugu mo. Ê to yong begwong de ê wɔ hwo e ra nekwɔn dal, ko ê ros e de ra mo wɛt.

25Ê tula gbɔng regyɛng bemât como, ko na yey ting ê wɔ̀ hwo e ra gbɔng gwɔ̀m rwa batin. Gbɔng gwɔ̀m o ê yong ɛ arɔng, ê wuna gwogyɛ̀ng bemât como, ko ê kyɛm a tó como mo wɛt, yaga ba ga yong a yɛ begwong beves. 26Mwin, e bemat de ba sé bagat na yɛ de bê tɛ̀ ɛ a gaba. Bê shara regyêng bemât como mɛ, ko bê mɔbɔs pyak e ji mɛn.

27Begbɔng begwɔ̀m vemo beba bê sangal be re pyɛ́ e tebut gwining o, ko e ji neyey mɛn bê bare pyɛ́ vyes vɔk na bemɛn. Yɛn ê yɛt a bemɛn nebɔs, ko pyɛ́ de bê yong yê tɛ̀ to wɛt, yaga jeng de Dagwi a yɛrɛ ya ga vey e ngyen wɛt. 28Gbɔng gwɔ̀m rwa bato a rɔda toyo wɔ e vwel mɛ na pyɛ́ pyak de a ga hashe yi e de como. Ko e gwong mɛ, ê ra pyɛ de a tɛ̀ e yey mɛ e ra bemât Dagwi na negwɔn raa mɛn.

29E jeng de Dagwi a ga tik ɛ ê to wɔ̀ hwo e ra sevwêl rwa batin. Ko e jeng yemo, pyɛ mo yê tá a yɛ wɛt. 30Bemât como ba rɔda vey e ji bedwa-nshi yi e rwa ta. Bê sogo e ra yɛ, bê dul ɛ. A rɔda toyo na shom, ê gang shom mɛ e ra bemât Dagwi na negwɔn raa mɛn, ko ê wuna to na vemo de ba ga hala negwɔn raà Dagwi o. 31Ê tomo na bemât como mɛ, na be yel, be tɛ̀ Gbɔng Duk Re Fongol de ba rɔnɔ na jwa-duk ligis. Ba rɔda ro mɛ na nása nenɔrɔ ne kahɛ tuk, ko bê tɛ̀ pyɛ sekwit yemo de yê tɛ̀ kwɔn o byɛm-byɛm! 32Ko yi na mɛlɛm, gbɔng gwɔ̀m o ê tɛ̀ vemo de ba ga hala negwɔn raà Dagwi, be raa hɛ. Ko vemo de be raa Dagwi, bê tumal gak, bê gyeng badu mɛ.

33Bemat vemo de ba vɔk tɔk bê misang a behak pyak pyɛ ra. Ko vɔk e jeng cak, bê wey na behak e ji mɛn na wal, ko behak bê rangas hɛn, ko behak bê sey ɛ pyɛ́ mɛn, bê tɛ̀ ɛn e ngyang. 34E jeng tak a yɛn o, bê sɛ̀ sɛlɛ tyɔng zɔng. Ko pyak e ji bemat vemo de be raa hɛn be raa raà bayis zɔng. 35E ji vemo de ba vɔk tɔk, bê mɔbɔs behak. Yi ano, Dagwi ê tɛ̀ bwang bemat be tɛ́ ɛn haalal, na be yong bato mɛn gyam jeng yɛnɛ mo de Dagwi a ga tik ɛ.

36Gbɔng gwɔ̀m rwa bato mo ê ra pyɛ́ de yey mɛ ye simo. Ê dak kaa wɔgɔ, a dal cī mwa, ê ha neha neves e ra Dagwi De A Dal Na Reto Mwa. Ko ê di wɛng sɛ̌ jeng de Dagwi a to vɔk shom na bemat mɛ wɛt, yaga kayɛ pyɛ yê té tyɛng na pyɛ de Dagwi a ga yong ɛ. 37Pyɛ mɛ cak ya sé na cī de bedabeda mɛ ba re a yɛ fongol tanga cī de beha be tɛ̀ yey na yɛ wɛt. Mwin, ê tɛ̀ to mɛ e ra cī mwa, bê ka nɔ̂ng cak nerey wɛt. 38E tô cī mo, ê sap ci yemo de ye dulus nekwɔn dal, yemo de bedabeda mɛ ba ga sang tɔk wɛt. E nɔngɔ̂s yɛ nenɔrɔ̂ dyam shinang, na dyam pyɛng, na dyéngere ryat sizɔng tanga pyɛ́ de ya sé yê dyām pyak. 39Na sɛlɛ̂ cī dyuk yemo, ê tɔk di wɛng e ra nekwɔn dal de na dal na gap. E nɔ̂ng bemat de be sap ci mɛ mo nerey, ê tɛ̀ ɛn bemat nuyêl bemat pyak, ê gas a yɛn bebak bavwel, be tɛ́ ɛn pyɔlɔ mɛn.

Bak wo netat: Jeng yɛnɛ mo

40E jeng yɛnɛ mo, gbɔng gwɔ̀m rwa batin ê hwo e ra gbɔng gwɔ̀m rwa bato. Ko wo rwa bato mo ê hwo e ra yɛ na gap mɛ mwa, ê ra fwom na bekyɛkyɛ̂ bedwa, na bedwa tanga bedwa-nshi pyak, ko a rɔda yel e bavwel pyak sede tɛmɛ-nshi, ê re ɛn na como. 41A rɔda yel e ji vwel de ha dal na nerat, ko ê mɔbɔs bemat, gu e ra gu, ko BeƐdɔm na BeMowap tanga bemât nuyêl BeAmɔn bê hywit ɛn.

42Gbɔng gwɔ̀m rwa bato ê re nuyel na sey ɛ bavwel pyak mwa na Misra. 43A rɔda sey ɛ nedanerey hɛ ne dyam shinang na dyam pyɛng tanga bwang pyɛ́ cak de ya vɔk nerat sizɔng. A rɔda re bavwêl Libya tanga Kush na como. 44Ko jeng de ê wok, bemât repugu yi e rwa rak na rwa bato ba yel e vwel mɛ, ê tɛ̀ shom sizɔng, ko ê toyo, na a mɔbɔs bemat pyak. 45A rɔda tɛ̀ bǔk rat mɛ e tê Gworep Tē na Raku Siyɔn, ko ê ku, vit a mwat hwak de a rɔda sɛlɛ hɛ.

Currently Selected:

Danyɛl 11: bomBI

Highlight

Copy

Compare