Amɔs 9
9
Dagwi Darwey ê wey na BeIsrayɛl
1Ma di Dagwi Darwey e tumal e hagât gàgbang nása nɔrɔ̂ yas ko a ye:
“Tow rà rak sesêk Gbɔng Duk Re Fongol na gap,
na retîs duk o re digis,
zagat hin vɛ̀ e ra batô bemat o mwa.
Ko bwang bemat o mê mɔbɔs e como,
vit a mwat de ê tele a dal,
vit a mwat de ê hywit ɛ arɔng.
2Ka yɛn a ka cing vɔk e kwɔ̂n bevuvwel,
ko e hwomo mê jut ɛn na vwɔ hom.
Ka yɛn a ka turus e rak o vɔk e lagwi,
yi e hwomo mê hwɔlɔ hɛn vey e vwel.
3Ka yɛn a ka wɔ̀ lɛrɛ hɛn e ra rak Raku Karmɛl
yi e hwomo mê wɔ̀ jama hɛn, na me vos ɛn.
Ka yɛn a ka lɛrɛ hɛn yi na me e nɛ̂n gworep,
yi e hwomo mê nɔ̂ng gwomazɛrɛ nu ko gwo roros hɛn.
4Ka yɛn a ka kyè vɔk e de sesam e vwêl vê repugu mɛn,
mê tɛ̀ be mɔbɔs hɛn.
Mê tɛ̀ bayis hom e ra yɛn
yaga gawey, ko yaga nerat wɛt.”
5Darwey Dagwi Darwey, Dâ Jey Mwa,
e rá vwel, ko he ye ywey,
mwa bemât hɛ be tosho.
Jey o mwa ye turus, ko ye to gyiris
sede nshî Gwɔrɔt Nil gwo Misra.
6Dagwi Darwey a lɔk lɔ mɛ e lagwi,
ko a ye gup à jey na lagwi o.
E tɛ̀ nshî gworep ne vey,
ko e shusha nɛ e ra jey o.
Reza mɛ à Dagwi Darwey!
7Dagwi Darwey a ye,
“À yin BeIsrayɛl, yin a sé sede BeEtiyopya na me wɛt a?
Ma vey na BeFilisti yi e Kaftor,
ko ma vey na BeSirya yi e Kir,
sede remo de ma vey na yin yi e Misra arɔng.
8Me, Darwey Dagwi Darwey ma sé bɛrɛng segwɔm Israyɛl, sê banɛn
ko mê wey na yɛn e jey.
Ko mwa ano, mê wey na lɔ Israyɛl mwa wɛt.
9Mê nɔng nu na be wolom BeIsrayɛl sede pyɛ̂ yeneng.
Mê wolom hɛn e ji yére bemat jey,
ko vit à pyɛ vyes de yê nàra.
10Bemât banɛn mwa de ba sé e ji bemat hom
bê mɔbɔs hɛn e como —
yɛn vemo mwa de be tē,
‘Pyɛ vyes cak yê vey bagat na wot wɛt.’ ”
Dagwi Darwey a rɔda to sey segwɔm BeIsrayɛl
11Dagwi Darwey a ye,
“E jeng o mê to lɔk lɔ Davit de ha kana gaba.
Mê to varas varâ duk o.
Mê yong nekwɔn de na gabsa.
Mê to lɔk hɛ,
na he to sè sede remo de há sè yimo.
12Ano kwong, BeIsrayɛl bê re bwang vwêl Ɛdɔm
mwa na yére bemât jey de bá kana sè benang me.”
Dagwi Darwey a ha ano,
yɛ de ê tɛ̀ pyɛ́ yemo ye té.
13Dagwi Darwey a ye,
“Jeng ye kyè vey,
de mwât hôw cap ê man na mwât bwal,
ko mwât pirî nshî anap ê man na mwât zêp anap o arɔng.
Nshî anap ne rɔkrɔk nê nunus yi e bě beraku mwa,
ko nê tele e bě berahwol mwa arɔng.
14Mê toyo na bemat hom e vwel mɛn.
Yɛn ê to lɔk barîn bapomo mɛn na yɛn a sangal ɛ.
Yɛn ê tus bě anap, na yɛn a sɔ nshi mo.
Yɛn ê tus cɔ́gɔt e bě mɛn, na yɛn a re nèy o arɔng.
15Mê tus bemat hom e ra vwel de ma nɔng ɛn,
ko bê sang to luyu hɛn yi e hɛ wɛt.”
Dagwi Darwey, Dagwi mō a ye ano.
Currently Selected:
Amɔs 9: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
