Amɔs 8
8
Shap nèy cɔgɔt de na ga vel
1Darwey Dagwi a to dura a me pyɛ cak.
Ma di shap nèy regwi de na ga vel.
2Ko a rangal me, a ye, “À Amɔs, e sé de hwà di ɛ?”
Ma toyo a yɛ, “E shap nèy regwi de na ga vel.”
Dagwi Darwey a yang me, “Jeng ya ga vey na me tabak bemat hom BeIsrayɛl.
Mê to sege yey hom e ra tabak mɛn wɛt.
3E jeng o, lɛlɛ yey pyɛng de be ragas e lɔ gwɔ̀m bê tɛ́ ɛn lɛlɛ sesin.
Bavîn bemat bê sè kagwa.
Bê wok pyɛ cak wɛt.”
Darwey Dagwi Darwey a ye ano.
Jeng BeIsrayɛl ya ga vey
4Wok in, yin de yin e bɔrɔs vê mɛrɛk,
ko yin e simo wey na bepɛ̂ng vwel o.
5Yin e tâng bato min,
“E yɛ̌ jeng de Nzem Pwɛl Pwas nê tala hɛn,
na wot a hwo rɛsɛl pyɛ̂ yeneng mot,
na Tuk Shábat he kwey,
na wot a to hwo rɛsɛl alkama mot ɛ?
Wot ê mɔndɔng neshǐ masâ pyɛ́ mo, na wot a gwɛ nepyak dyām.
Wot ê yong pyɛ̂ masâ nedirik na wot a mɔt mɛ bemat.
6Wot ê sey vê mɛrɛk na dyam pyɛng,
ko bepɛng na kedyam sêy bekpatak zɔng.
Wot ê bunus pyɛ̂ yeneng o na byɛmɛ mo na wot a rɛsɛl.”
7Dagwi Darwey a ga kana sira na to mɛ de Yakɔp e ra mɛ kaa.
“Mwin mê sang ye bam a tom ves mɛn wɛt.
8Yaga ano, vwel o hê digis e ra pyɛ́ yemo,
ko kawɛ mwat de a sé e ji hɛ ê ra sesin.
Vwel o mwa hê tut sede Gwɔrɔt Nil,
hê turus he gyiris sede Gwɔrɔt Nil gwo Misra.
9E jeng o, gwi gwô gaba e tê-gwi,
jey yê tɛ́ ɛ mwangalang nagwi.”
Darwey Dagwi Darwey a ha ano.
10“Mê tɛ̀ nezap nzem min ne tɛ́ ɛn jeng sesin,
me tɛ̀ lɛlɛ yey pyɛng min be tɛ́ ɛn vè sesin.
Mê tɛ̀ a yin mwa berugû sesin,
ko me tɛ̀ yin wulsa bato min arɔng.
Mê tɛ̀ a sè sede bé tosho hwey wen hining zɔng.
Tuk o hê reneng a yin vɔk e yɛnɛ̂ hɛ.
11Jeng ye kyè vey mwin de mê tomo na vyong e vwel o,
vyông kpam-tuk, kɛ yêy hwɔshɔ̂ nshî sɔ wɛt,
vyông wôk hâ Dagwi Darwey e negya.
Darwey Dagwi Darwey a ha ano.
12Bemat bê kyě gǎ yi e gbɔng rep womo vɔk e woro,
yi e rwa bato vɔk e rwa rak.
Yɛn ê kyě tele kagwa be jama hâ Dagwi Darwey,
ko yɛn ê sɛ hɛ wɛt.
13E jeng o, kavɛ bewen na bezɛrɛ behwong de be wok na netyang na gap,
bê kushu jwàt-jwat na yêy hwɔshɔ.
14Vemo de ba sisa na Ashima, dagwî Samariya,
kɛ ba tē, ‘Ma sira na dagwî Dan’,
na ‘Ma sira na rezâ pyɛ sekwît Bɛɛr-Sheba’,
bemat o bê gabsa, ko bê sang to sogso wɛt.”
Currently Selected:
Amɔs 8: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
