Amɔs 7
7
Pyɛ́ tyat e ji negwi-ywey
Rawal
1Darwey Dagwi Darwey a dura a me pyɛ́ e negwi-ywey,
Ma di de a sé yong rawal de wa ye ship,
mwas de ba sé yɛnɛ yɛ̂t sehwêy gbɔng gwɔ̀m
ko hwey pas o ha ga to hwo ras.
2Rawal o wa hwo re kagwɛ sɔng,
Ko ma hwo ye,
“À Darwey Dagwi Darwey, me ra won na hwo,
hala a bemat mo banɛn mɛn!
Yɛn ê dal e rɛ?
Yɛn a sé tyɔng zɔng.”
3Dagwi Darwey a sege yey mɛ, ko a ye,
“Pyɛ de hwà ga kana di mo yê té wɛt.”
Kya
4Darwey Dagwi Darwey a to dura a me pyɛ cak.
Ma di de a sé yóng ɛ na a tabak bemat mɛ na kya.
Kya mo ha hwo re nshî nɛ̂n vwel,
ko ha hwo re vwel o mwa arɔng.
5Ma yang ɛ,
“Óoo à Darwey Dagwi Darwey, me ra won na hwo, tik ano!
Bemat mo bê dal e rɛ?
Yɛn a sé tyɔng zɔng.”
6Dagwi Darwey a to sege yey mɛ, ko a ye,
“Pyɛ yemo yê to té wɛt arɔng.”
Rwîk masâ duk
7Dagwi Darwey a to dura a me pyɛ cak gbak,
Ma di ɛ a tumal e hagât vwarâ duk,
ko a vɔk rwîk masâ duk e vwɔ.
8A rangal me, a ye, “À Amɔs, hwà di sé ɛ?”
Ma toyo a yɛ, ma ye, “E rwîk masâ duk.”
ko a yang me, “Ma sé ra fwom na gwɛ na me dura wɔgɔ,
bemat hom ba sé sede vwarâ duk de ba lɔk gwɛ cik wɛt.
Mê sege yey hom e ra tabak hɛn e remo wɛt.
9Mê wey na nekwɔn rê fongôl Yishak.
Mê tik nekwɔn jɛrɛ nɛ Israyɛl e barin.
Mê hwo e ra lɔ Gbɔng Gwɔ̀m Yɛrɔbɔwam na como.”
Sekûn Amaziya
10Amaziya, piris e Bet-Ɛl
a hwo tomo a Gbɔng Gwɔ̀m Yɛrɔbɔwam wo Israyɛl rehâ pyɛ de ya ga té, a ye,
“Amɔs a sé yóng a hwo neves e ji BeIsrayɛl.
Neha mɛ na sé ne wôk mwat wɛt.
11E tē, ‘Yɛrɔbɔwam ê wey e de como,
ko ê hashe BeIsrayɛl yi e vwel mɛn vɔk e de sesam!’ ”
12Amaziya a hwo yâng Amɔs,
“À zarap Dagwi,
To o vɔk e vwêl mo e Yuda.
Tik na hwo sɛ̀ pyɔlɔ̂ fwom mo e hwomo.
13Hwo to zarap yi na Dagwi e ngamo e Bet-Ɛl wɛt.
Kwɔ̂n rê fongol gbɔng gwɔ̀m à hemo,
ha sé Gbɔng Duk Re Fongol wo gbɔng gwɔ̀m pyɛ mɛ.”
14Amɔs a toyo a yɛ, a ye, “Ma sé zarap, kɛ hwêy zarap wɛt.
Ma sé lwêk tyīmit, na mwât bɛrɛng batîn regwi.
15Ko Dagwi Darwey a jut me yi e de fwom hom gwô lwêk tyīmit,
ko a nɔng me nu na me vey zarap a bemat mɛ BeIsrayɛl.
16Yaga ano, wet betong na pyɛ de Dagwi Darwey a ha,
remo de hwà yang me, me tik zarap yi na Dagwi e ra BeIsrayɛl,
me to shara a yerê Yishak hâ Dagwi arɔng wɛt.
17Ko tik na hwo wok pyɛ de Dagwi Darwey a ha e ra hwo,
‘Hwâ lɔ mo ê sè devwes e gbɔng repomo,
ko ê mɔbɔs nèy mo bewen na behwong e como.
Bê mara vwel mo ko be gas a bemat behak hɛ,
ko hwo pyɛ mo hwô ku e vwêl bemat de be sap cī.
Bê hashe BeIsrayɛl mwin vɔk e de sesam,
be kyè na yɛn yikyik yi e vwel mɛn.’ ”
Currently Selected:
Amɔs 7: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
