Amɔs 4
4
1Wet in betong na yin a wok, à yin behâ Samariya,
de yin a mɔsɔ sede berɔndɔ̂ng Bashan e Raku Samariya.
Yin e mɔt bepɛng, ko yin e tak a vemo de ba vɔk vwɔ wɛt.
Yin e nɔngɔ̂s beras min nu, yin e tang ɛn, “Nɔng ot nshî sɔ.”
2Remo de Darwey Dagwi Darwey a sé wo jɛrɛ, a ga kana sira, a ye,
“Jeng ya sé kyè vey mwin,
de bê hwɔlɔ hin na begúk,
bê hwɔlɔ bwang o mwa na guk sede tɔk.
3Bê hashe hin, be pat kawɛ e jey,
e kahɛ kwɔn de jwâ-pomo wa takla.
Ko be bomos hin e jey
vɔk e bak Harmɔn.”
Dagwi Darwey a ye ano.
BeIsrayɛl ba masa pyɛ cak wɛt
4“À yin BeIsrayɛl ka sede pyɛ ma yane de yin e simo,
Vey in e kwɔ̂n rê fongol e Bet-Ɛl!
Ci in na râ banɛn!
Vey in e Gilgal!
Gwɛ̌ ragas hin banɛn!
Vey in na yas nɔrɔ̂ kanɛ nagasi!
Vey in na pyɔlɔ̂ kahɛ tûk tat!
5Vey in na nɔrɔ̂ kpam-tuk wo géy-sing feng a Dagwi!
Dak in kaa na yerê nenɔrɔ̂ yey pyɛng de yin e gwɛ̌ nɔngɔs!”
Darwey Dagwi Darwey a ye ano.
6E me wɛ de me tik nɛ́n min hal e karɛ repomo min,
ko vit a hin na kpam-tuk e kahɛ kwɔn arɔng.
Mwa ano, yin a toyo vey na me wɛt.
Dagwi Darwey a ye ano.
7Me shim in rwak jeng de pyɛ̂ hiri min ye dal na simô wɛ,
me tomo a repomo remo rwak ko me shim rere.
Hwiri gwomo gwó sɛ̀ rwak,
ko gworo gwó bidɛ, gwo ye nɔɔshɔsh.
8Bemat be kyě gǎ yi e repomo remo vɔk e rere e de jamâ nshi,
ko yɛn a sè pyɛ de ya vey a yɛn sɔ wɛt.
Mwa ano, yin a toyo vey na me wɛt.
Dagwi Darwey a ye ano.
9Zang pyak me tɛ̀ rɔ hɛ kaba hirî pyɛ́ min,
batô pyɛ̂ bě be siri, ko nèy anap ne bɔsɔ arɔng.
Rawal wa re batîn cɔgɔ̂t regwi na vê pat min.
Ko mwa ano, yin a toyo vey na me wɛt.
Dagwi Darwey a ye ano.
10Ma tomo tumbang e ra yin,
yerê womo de ma kana tomo e ra Misra.
Ma mɔbɔs bewen min e de como
ko ma hashe bedwa mɛn.
Ma sila bawol min na nesang bavîn bemât como min.
Dagwi Darwey a ye ano.
Ko mwa ano, yin a toyo vey na me wɛt.
11Ma wey na yin
sede ma kana wey na Sɔdɔm tanga Gɔmɔra.
Vemo de ba dal e ji min
ba sè sede cɔgɔt de ba pat yi e kya.
Mwa ano, yin a toyo vey na me wɛt.
Dagwi Darwey a ye ano.
12“Yaga ano, à yin BeIsrayɛl,
di in pyɛ de ma sé kyè wɔ̀ ra a yin.
Ko yaga ma sé kyè wɔ ra ano,
yong in — mê vey na shɔt!
13A sé e Dagwi de a yong beraku tanga gùl.
A tɛ̀ bemat be tɔk barê yey mɛ.
E sege nagwi vɔk e naturuk.
E re negwɔm e ra rak jey.
Reza mɛ à remo ngan:
Dagwi Darwey, Dagwi Dâ Jey Mwa!”
Currently Selected:
Amɔs 4: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
