Amɔs 3
3
1À yin BeIsrayɛl, wet in betong
na hâ Dagwi Darwey e ra yin,
yin mwa hin bemât yere jining de ma vey na yin
yi e sevwêl Misra.
2E ji bemât yére jey mwa,
a sé e yin zɔng de ma wuna me na yin.
Yaga ano arɔng, mê tabak hin pyɛ min yaga banɛn min.
Fwôm zarap Dagwi
3Bemat beba bê hwo kyè vɔk e kwɔn hak
sana yong ɛ̀ a?
4Gukum wó hwo lulum e rehwot
sana vo ngyama a?
Bwôt gukum wô kwonot e kwɔ̂n dyɛngɛ wɛ
sana vo pyɛ de wô re a?
5Kenon kê gaba e segun
sana rene kɛ a?
Segun sê sogo e gwi
sana pyɛ cak ya gaba e sɛ a?
6Durûm como wô tosho e repomo
sana tɛ̀ a bemat o bengyip a?
Reyɔm reves rê hwo e ra repomo
sana yi na Dagwi Darwey a?
7Mwin, Darwey Dagwi Darwey, ê sang ra pyɛ cak
sana dura a bemɛ pyɛ de ya tɛ̀ ano a?
E dura a vê zarap mɛ retin pyɛ mo.
8Gukum wa ga lulum,
e wa de ê sangal tiing sana wok bengyip ɛ?
Darwey Dagwi Darwey a ga hanat,
e wa de e kyɛ́ ɛ nà zarap ɛ?
Samariya
9Ha a bemat de ba sé sangal e nelɔ begwɔ̀m Ashdot na Misra ngan:
“Tula hin mwa e berahwôl Samariya,
na yin a di yerê cɛ́k de ba sé ra e hwomo,
tanga yerê mɔ̂t bemat de be ra ɛ̀ arɔng.”
10Dagwi Darwey a ye,
“Bemat vemo be tɔk ra pyɛ de ya sé ryat wɛt.
Yɛn a bang pyɛ́ de ba seres na yol tanga shigi e nekwɔn dal mɛn.”
11Yaga ano, Darwey Dagwi Darwey a ye:
“Bemât repugu bê gwɔrɔ sevwel min,
bê wey na nelɔ gap min,
bê hashe pyɛ̂ jugu e nekwɔn dal min.”
12Dagwi Darwey a ye,
“Sede remo de lwêk tyīmit e tɔk wɔ sɛ̀ bwang bol ba,
kɛ cɛ̌k fwông tyimit zɔng e nû gukum,
ano arɔng, bemat tyɔng zɔng bê dal e ji BeIsrayɛl de ba sangal e Samariya,
na hagât kwɔ̂n sangal tanga bak gwat mɛn.”
13Yaga ano, Darwey Dagwi Darwey, Dagwi Dâ Jey Mwa a ye,
“Wet in betong na yin tusa yerê Yakɔp.
14E jeng o mê ba tabak BeIsrayɛl yaga banɛn mɛn,
mê gangas nekwɔn nása nenɔrɔ̂ yas ne Bet-Ɛl.
Mê kwɔrɔs ngɛngɛ̂ kahɛ kwɔ̂n narâ nɔrɔ̂ yas o,
ko bê gabsa mwa e vwel.
15Mê gangas nelɔ mɛn ne nabolos tanga ne naswigi,
na nemo de ba tɔrɔ na yìn gbin de ba tsep.
Ano arɔng, bê gangas kahɛ gbɔng lɔ.”
Dagwi Darwey a ye ano.
Currently Selected:
Amɔs 3: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
