Amɔs 1
1
1Neha Amɔs, hwak e ji belêk tyīmit kerepomô Tekowa à nemo. Dagwi á dura a yɛ pyɛ́ yemo mwa e ra BeIsrayɛl e jeng de Uziya a sè gbɔng gwɔ̀m Yuda ko Yɛrɔbɔwam hwêy Yɛhɔwash á sè gbɔng gwɔ̀m Israyɛl neshey neba gyam digîs jey de há té. 2Amɔs a ye,
“Dagwi Darwey ê lumla yi e Siyɔn.
Fwɔ mɛ gwô takla yi e Yɛrusalɛm.
Nekwɔn gyengês yas na sé hworok,
kɔ sɔng de gwa sé liplip e ra Raku Karmɛl gwa sé ye nɔɔshɔsh.”
Shɔt Dagwi e ra yére de ya sé bagat na BeIsrayɛl
Sirya
3Dagwi Darwey a ye,
“Bemât Damaskus ba re nuyel na ragas banɛn, e ra banɛn,
ko mê tik nà tabak hɛn wɛt.
Yɛn a dak bemat hom vê Gileyat
Sede be dak pyɛ́ e gazu na gwocwang bāpyông dyam.
4Yaga ano mê tɛ̀ kya e ra lɔ̂ negwɔm Hazayɛl,
ko hê re nekwɔn dâl Gbɔng Gwɔ̀m Bɛn-Hadat.
5Mê kwɔrɔs ri Damaskus
ko mê ro bemat de ba sangal e Nɛk Avɛn mwa,
Ko mê kwɔrɔs gwelê gwɔ̀m Bet-Ɛdɛn arɔng.
Ko mê hashe bemât Sirya vɔk e de sesam e vwêl Kir.”
Dagwi Darwey a ye ano.
Filistya
6Dagwi Darwey a ye,
“Bemât Gaza ba re nuyel na ragas banɛn e ra banɛn,
ko mê tik nà tabak hɛn wɛt.
Yɛn a hashe mwa bemât yere jining
ko ba wɔ rów a BeƐdɔm sede besam.
7Yaga ano, mê tɛ̀ kya e ra bejwâ-pomô Gaza,
na he re nekwɔn dal mɛn.
8Mê ro bemat tanga bapomô Ashdot na Ashkɛlɔn.
Mê tabak bemât Ɛkrɔn, ko mwa bwang BeFilisti bê kushu arɔng.”
Darwey Dagwi Darwey a ye ano.
Tur
9Dagwi Darwey a ye,
“Bemât Tur ba re nuyel na ragas banɛn e ra banɛn,
ko mê tik nà tabak hɛn wɛt.
Yɛn a hashe mwa bemât yere jining vɔk e de sesam e vwêl Ɛdɔm,
ko yɛn a kyɛ́ ɛn nà gyeng redu
sangâl netyâng begwa.
10Yaga ano, mê tɛ̀ kya e ra bejwâ-pomô Tur
na he re nekwɔn dal mɛn.”
Ɛdɔm
11Dagwi Darwey a ye,
“Bemât Ɛdɔm ba re nuyel na ragas banɛn e ra banɛn,
ko mê tik nà tabak hɛn wɛt.
Yɛn a ra jamâ begwa mɛn BeIsrayɛl na wal
ko ba wok nemwishish mɛn wɛt.
Yɛn a ra shom na yɛn vit a yere mo,
ko yɛn a tik, repugu mo re ye rɔ̀s wɛt.
12Yaga ano, mê tɛ̀ kya e ra repomô Teman,
na he re nekwɔn dal ne Bɔsra.”
Amɔn
13Dagwi Darwey a ye,
“Bemât Amɔn ba re nuyel na ragas banɛn e ra banɛn,
ko mê tik nà tabak hɛn wɛt.
E como de ba ragas na be gwɛ̌ yɛnɛ̂ vwel mɛn,
yɛn a vugus behâ Gileyat de ba vɔk nejim.
14Yaga ano, mê tɛ̀ kya e ra jwâ-pomô Raba,
na he re nekwɔn dal mɛn.
Como mo yê vey na dâk sekun,
ko wula wô vey na rwâk gwogul.
15Bê kyè na gbɔng gwɔ̀m mɛn na bemât fwom mɛ
vɔk e de sesam e vwel hak.”
Dagwi Darwey a ye ano.
Currently Selected:
Amɔs 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
