Amɔs 2
2
Mowap
1Dagwi Darwey a ye,
“BeMowap ba re nuyel na ragas banɛn e ra banɛn,
ko mê tik nà tabak hɛn wɛt.
Yɛn a nɔ̂ng bekup gbɔng gwɔ̀m Ɛdɔm nerey wɛt,
ko yɛn a rangas vɛ̀ be tɛ́ ɛn fongol.
2Mê tɛ̀ kya e BeMowap
na he re nekwɔn dâl Kɛriyɔt.
BeMowap bê weres na môk como,
na dâk sekun, tanga pɛsɛl bedurum arɔng.
3Mê mɔrɔ mwat de a sé re negwɔm e ra Mowap
tanga mwa bemât nuyêl vwel o.”
Dagwi Darwey a ye ano.
Yuda
4Dagwi Darwey a ye,
“BeYuda ba re nuyel na ragas banɛn e ra banɛn,
ko mê tik nà tabak hɛn wɛt.
Yɛn a byɛs basa hom,
ko yɛn a kyɛ́ ɛn nà gyeng Badu hom arɔng.
Yɛn a ga ye rɛng e de raà bedagwî bɔs,
vemo de bedabeda mɛn bá kana raa vɛ.
5Yaga ano, mê tɛ̀ kya e ra Yuda,
na he re nekwɔn dâl Yɛrusalɛm.”
Israyɛl
6Dagwi Darwey a ye,
“BeIsrayɛl ba re nuyel na ragas banɛn e ra banɛn,
ko mê tik nà tabak hɛn wɛt.
Yɛn a rɛsɛl bemat berat e sesam e nû dyam pyɛng de be rangal hɛn,
ko bepɛng e nû kedyam sêy bekpatak zɔng.
7Yɛn e bɔrɔs batô bepɛng sede fongôl vwel,
ko be tɛ̀ vê mɛrɛk be ye rɛng.
Mwat na da mɛ be dyɛngɛs na hwong gwining,
na be tɛ̀ reza hom rê jɛrɛ ligis.
8E kahɛ kwɔ̂n rê fongol,
bemat be dyɛngɛs e ra pyɛ̂ banga de ba nɔng e selek.
E beduk rê fongôl bedagwi mɛn,
yɛn e sɔrɔs nshî anap de yɛn a seres ɛ̀ sede pyɛ tala.
9Ko di in, à bemat hom, a sé yaga yin de ma wey na BeAmɔr vit.
Yɛn á sè belis sede batîn cɔ́gɔt sida,
ko yɛn á vɔk gap sede batîn cɔ́gɔt ouk.
Ma ga wey na nèy o e rak o,
na berinis o e nɛn o.
10Ma nusu na yin e sevwêl Misra
ma kyè e nuyel min e hey neshey kuru banaas,
ko ma nɔng in vwêl BeAmɔr na he tɛ́ ɛ min.
11Ma kasa nehak e ji nèy min sede bezarap hom,
ko ma kasa bewen min behak sede vê jaram yaga me arɔng.
À yin BeIsrayɛl, a sé mwin wɛt a?”
Dagwi Darwey, a ha ano.
12“Ko di, yin a tɛ̀ vê jaram o be sɔ nshî anap,
ko yin a nɔ̂ng vê zarap hom nu, yɛn a kwon ha ha hom wɛt.
13A remo mê yɛklɛ hin vit à shòmta,
sede gwopyɛ gangâs pyɛ́,
sede pyɛ́ dirik e ra gwopyɛ mo.
14Vê tele hyiw bê hywit ɛn wɛt,
vê gap bê tɛ́ ɛn mɛrɛk.
Vê tó como bê tɔk sey neken mɛn wɛt.
15Vê tabâs ket bê tɔk tumal e como wɛt,
ko vê tele tyɔng wɛt bê tɔk sey neken mɛn wɛt.
Vê bedwa bê tɔk ra sesuga na be wɔ dal wɛt.
16E jeng o, besuga bê bomos pyɛ̂ como mɛn be tele hal.”
Dagwi Darwey a ye ano.
Currently Selected:
Amɔs 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
