2 Bitrus 1
1
1Bwok-rwang gwomo yi e vwɔ hom Simɔn Bitrus, sam Yɛsu Kristi, ko ma sé tom mɛ arɔng.
Vɔk na yin de yin a sey tsak o na Kristi. Yerê sey tsak o min o ha sé pyɛ simo sizɔng tyɛng sede mot. A sé yaga Yɛsu Kristi e gas badu e tē de a nɔng ot mwa gwong na wot a sey tsak o na yɛ. Yɛ Yɛsu Kristi mo a sé Dagwi mot, a to sé Mwât Sey ot:
2Tik na Dagwi a dura a yin nerat mɛ shɛrɛk, na a gwɛ̌ tɛ̀ yey min ye dyɛng. Hemo hê té jeng de yin e gwɛ̌ tɔk ɛ tanga Yɛsu Darwey mot.
Yíla tanga kasa Dagwi
3Yi na gbɔng reto mɛ, Darwey mot a nɔng ot kayɛ pyɛ de wot e simo, yaga na sangal mot e jey he dura, wot e raa Dagwi naka. Gwong de a ra ano a gwot ngan: A tɛ̀ ot na wot a tɔk yɛ womo de a yila hot, na wot a sangal tanga yɛ e ji gbɔng nerey mɛ na nerat mɛ. 4A sé e gwong á gwane de a ga nɔng ot pyɛ́ ryey o sedesi de ya sé yê simo sizɔng, yēmo de à kana sira a wot e ra yɛ̄. A nɔng ot yɛ̄, yaga na, yi na yɛ̄, yin a hywit in yi e pyɛ́ vyes yê jey yemo de bemat be wok cwey yɛ̄. Ko a ra ano, yaga na yin a bin vɔk negwɔn yerê ne Dagwi.
5Yaga ano, sede remo de yin a sey tsak o na Yɛsu Kristi, yē in ngyɛ́k sizɔng na yin a vɔk negwɔn nerat arɔng. Sede remo de yin a vɔk negwɔn nerat o, tik na yin a vɔk tɔ́k; 6sede remo de yin a vɔk tɔ́k o, yē in ngyɛ́k na yin a gyeng bato min; sede remo de yin e gyeng bato min o, tik na yin a niri; sede remo de yin a niri mo, yē in ngyɛ́k na yin a raa Dagwi naka; 7sede remo de yin a raa Dagwi naka, tik na yin a tɛ̀ yey na begwa min; ko sede remo de yin a tɛ̀ yey na begwa min o, yē in ngyɛ́k na yin a tɛ̀ yey na bemât mwa arɔng. 8Yere negwɔn á nemo de yin e simo. Ka sede yin a vɔk nɛ pyak, ko na rɔda tɛ̀ tɔ́k min hê Darwey mot Yɛsu Kristi he sè yapyi wɛt, ko neken min na rɔda sè sede pyɛ́ de ya mara naka. 9Ko kawɛ mwat de a vɔk negwɔn nemo mo wɛt e bɛrɛng yɛt wɛt, e tɔk di arɔng wɛt, ko a ga ye bam wɔgɔ, ba ga fugut banɛn mɛ de á kana ragas raane.
10À begwa, yin a sé bemat de Dagwi a yila hin, na a to kasa hin. Yaga ano, yē in ngyɛ́k ding-ding na negwɔn min ne dura tsɛng-tsɛng yíla na kasa min o. Ka sede yin a ra ano, ko yin a rɔda ye bugurɛk ko tyɔng wɛt. 11Ko Dagwi a rɔda wunta a yin gwong pyot, na yin a yel e Segwɔm Darwey mot Yɛsu Kristi, Mwat Sey ot, semo de sa rɔda nàra gbak-gbak.
12Yaga ano, me simo na me bare a yin kayɛ jeng na pyɛ́ yemo, mwa ano de yin á kana tɔk yɛ̄, ko yin a sé tumal gak e ra tsak há de yin a ga kana sey hɛ. 13Ma di, a sé tyɛng e jeng de ma rɔngɔl na neken, na me dopse tɛ̀ in na yin a bare na pyɛ́ yemo. 14Yaga ma tɔk, ma ga vey bagât gas me na rebek remo, sede remo de Darwey mot Yɛsu Kristi a dura a me tɛɛrɛ. 15Yaga ano, ma rɔda ye ngyɛ́k zá wɛt na me sɛ̀ a yin gwong de gwô tɛ̀, yin a rɔda bare na pyɛ́ yemo kayɛ jeng e bamâ reku hom.
Bemat de bá di gbɔng nerât Kristi
16Jeng de wot á ha a yin rehâ vêy Darwey mot Yɛsu Kristi na reto, wot á ha a yin rɛ sede yá de bemat ba yong zɔng wɛt. Ko wot á di gbɔng nerey mɛ na bayis mot 17jeng de Dagwi Da á nɔng ɛ nerey na gbɔng nerat. Wot á wok fwɔ de gwa yi na womo de a vɔk gbɔng nerat de na dal mwa, gwa ye, “Hwêy yey hom à hemo, yey hom ya pɛngɛ na hɛ sizɔng!” 18Jeng de wot á sè tanga yɛ e ra raku wo jɛrɛ mo, wot pyɛ mot wot á wok fwɔ mo de gwa yi e lagwi.
19Yaga ano, wot e gwɛ̌ sey tsak o na reha de bezarap Dagwi bà kana ha. Ko a rɔda sè a yin naka na yin a tɛ̀ nehywɛ min e ra reha mo, yaga ra sé sede kywa-kya de wo lolo e dem de ha sé mwangalang sɛ̌ gasi ha ye gbey ko negbêy dàt nê tɛ̀ neyey min ne vɔk negbey. 20Ko gbɔng pyɛ de yin a tɔk a yet ngan: Vit a mwat de e tɔk ra fwom na tɔ́k mɛ pyɛ mɛ na a misang neha de bezarap Dagwi bà ha, nemo de ba jɛk e Bwok-basa Dagwi arɔng. 21Yaga vit a há yere hê bezarap Dagwi de hà ga sang yi na simô mwasi zɔng. Ko à sè e Gabik Jɛrɛ de hà sɛ̀ reto e ra bemat vane mo, hà tɛ̀ ɛn na yɛn a ha reha de ra yi na Dagwi.
Currently Selected:
2 Bitrus 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
