1 Bitrus 4

Negwɔn de ba ga sege nɛ

1Yin a tɔk, Kristi á di reyɔm e rebek mɛ. Yaga ano, a sé gbing-gbing na yin a yong in na báre yerê mɛ mo. Yaga kawɛ mwat de a ga di reyɔm e rebek mɛ a ga gas ɛ na râ banɛn. 2Yaga ano, e ngamo nuyel, tik na bwang jeng sangal min e jey ye sè tyɛng na pyɛ de Dagwi e simo, ko yin raa cwey pyɛ́ vyes de babek min be simo wɛt. 3A raane, yin á kana lashe jeng pyak e de râ pyɛ́ de bemat de ba tɔk Dagwi wɛt be simo râ yɛ̄. Yà ga vey ano! Yin á wey na jeng min e de vɔk gwōt, na raà cwey pyɛ́ de babek min be simo, tanga sefeng; yin á ragas nzem neves, yin á tulsa hin e nekwɔn nehak yaga sɔ̂ siring, ko yin á to sap cī, pyɛ de Dagwi e kyɛ́ ɛ yɛ zakzak. 4Ko a remo, bemat de ba tɔk Dagwi wɛt be langat hɛn jeng de yɛn e di, yin e to raa begwong de ba sé beves sizɔng wɛt, yin e to ragas pyɛ́ kpɛɛ yerê myɛ́n arɔng wɛt, ko yaga ano, yɛn e lashe baza min. 5Ko mwin, jeng ye kyè vey de yɛn a rɔda ba ha e nuyêl Dagwi e ra pyɛ de yɛn a ga ra, yɛ womo de a ga yong ɛ na a ra a vemo de ba sé na neken mwa na vemo de ba ga kushu shɔt. 6À kana ra a vemo de bà kushu shɔt e jeng de bà sè beken e jey yemo, tyɛng sede remo de e ra a bemât mwa shɔt. Ko bá shara a yɛn Yɛgɛt Yat e bama de bà kushu, yaga na yɛn a bin vɔk neken sede Dagwi e ji sangal mɛn hê gabik.

Nenɔrɔ̂ Dagwi vey na wot

7Jeng ya ga vey bagat de pyɛ̂ mwa ye kyè wɔ̀ tala hɛ. Yaga ano, gyéng in bato min, na yin a yɛklɛ hin, yaga na yin a tɔk ra won. 8Ko pyɛ de ya dal mwa na nerey ya sé ngan: Tɛ̀ in yey na bemin na gap min mwa, yaga tɛ̂ yey he tɛ̀ be hala banɛn pyak. 9Séy in bemín naka e nelɔ min sana neha gwɔrɔng. 10Dagwi a ga nɔng kawɛ e ji min nɔrɔ mɛ detu, na a ra fwom na hɛ. Yaga ano, tik na kawɛ mwat a ra fwom na nɔrɔ mɛ mo sede gbɔng mwât fwom rwat, na a sɛlɛ mɛ̀ bemɛn. 11Kawɛ mwat de ba nɔng ɛ nɔrɔ̂ há, tik na a ha neha Dagwi. Kawɛ mwat de e ra a bemat fwom, tik na a ra gwɛ na gap de Dagwi e nɔngɔs hɛ. Yi ano, bê nɔ̂ng Dagwi nerey yi na Yɛsu Kristi e ji pyɛ̂ mwa. E yɛ de gbɔng nerat na reto na sé nemɛ gbak-gbak! Ano.

Dî reyɔ̂m mwat-raa

12À besâ yey hom, yin kwon langat hin na yerê mara de he tɛ̀ in na yin a di reyɔm. Yin bare wɛt wɔgɔ, pyɛ mo de ya té na yin ya sé cɛnɛt o. 13Ko vɔk in yey pyɛng, yaga yin a sé wuna hin e ji reyɔm de Kristi á di. Ka sede yin a ra ano, ko yin a rɔda ba vɔk yey pyɛng vit a yere mo jeng de ba rɔda ba dura gbɔng nerat mɛ wɛshɛrɛk. 14Yin a sé vê yey pyɛng, ka sede be tabas a yin nengyas, yaga yin a sé bemat-raà Kristi. Hemo he dura, Gabik de ha vɔk gbɔng nerey hɛ a, Gabik Dagwi, ha sé sangal na yin. 15Ka sede hwak e ji min a sé di reyɔm, ko he kwon sè yaga yɛ a sé mwât mɔbɔs bemat, kɛ gbik, kɛ mwât kwɔrɔs badu bahak, kɛ mwat de e kyě yeles e neha bemat behak wɛt. 16Ko ka sede a sé di reyɔm, yaga a sé raa Kristi, ko a vo rekyên rɛ wɛt, a feng a Dagwi, yaga be tang ɛ, à mwat-raà Kristi.

17Jeng ya ga vey de Dagwi a rɔda hwo ra shɔt, ko bemat mɛ ba sé vê susu mo de ba rɔda tānga ra a yɛn yɛ. Ka sede be susu shɔt o na wot, ko ya rɔda sè a vemo de ba sey tsak o na Yɛgɛt Yat yi na Dagwi wɛt gbang sizɔng. 18Sede remo de bà jɛk e Bwok-basa Dagwi wɔgɔ,

“A sé gbang na be sey bemat de ba sé cik e bayîs Dagwi,

ko e sɛ́ de ya rɔda té na bemât banɛn de be kyɛ́ ɛn nà raa Dagwi arɛt?”

19Yaga ano, vemo de be di reyɔm, yaga Dagwi e simo ano, tik na yɛn a re nuyel na tomong rat mɛn, na yɛn a nɔng bato mɛn kyuruk vɔk na Dagwi de a yong ɛn, yɛ de e gyeng há mɛ kayɛ jeng.

Currently Selected:

1 Bitrus 4: bomBI

Highlight

Copy

Compare