1 Bitrus 3

Negwɔn sángal beha na beras

1Ano arɔng, à yin behâ weneng, dyɛ́ng in bato min na beras min. Yaga, ka sede behak e ji mɛn ba sey tsak o na rehâ Dagwi wɛt, ko negwɔn min na rɔda tɛ̀ ɛn, yɛn a doyo na be raa gwông Dagwi. Mwa ano de yin e wunta nu, na yin a basa a yɛn wɛt, 2ko yɛn a rɔda di yerê negwɔn min de na sé jɛrɛ, yɛn a rɔda to di, yin e sap Dagwi naka. 3Yin dopse bare e ra tɔrɔ hin wɛt, sede nezap begwông tak tot min, kɛ tɛ́sɛ nediri pyɛ́ de be yong na dyam shinang, kɛ tɛ́sɛ berugu ve dyām pyak. 4Ko tik na nerat min ne sè yerê nemo de ne yi e neyey min, nɛ à nehywɛ na neyuu min. Yerê nerat o ne sege hɛn wɛt, ko na sé pyɛ simo sizɔng e bayîs Dagwi. 5À sè e gwong gwomo arɔng de beha raane de bà raa Dagwi naka, vemo de bà sɛt yey mɛn mwa e ra yɛ, bà tɔrɔ hɛn. Yɛn à dyɛng bato mɛn na beras mɛn 6sede Sara, de à gyeng ha Abraham, ko à tang ɛ, à da mɛ. Yin a sé nèy mɛ, ka sede yin e ra pyɛ́ de ya sé ryat, ko yin e vɔk bengyip jeng de be shìsa hin wɛt.

7Ano arɔng, à yin beras, vɔk in gabik rat na beha min. Bàre hin, yɛn a vɔk gap sede yin wɛt. Nɔng in hɛn nerey, yaga a sé e yɛn tanga yin mwa hin de Dagwi a nɔng in nɔrɔ̂ neken. Rá in ano, yaga na pyɛ cak ye kwon dul won min wɛt.

Dî reyɔm yaga râ pyɛ́ ryat

8E yɛnɛ mo, tik na mwa hin yin a vɔk báre yerê hining o; wok in nemwishish bemin, ko tɛ̀ in yey min na bemin sede begwa; tosho hin reyɔ̂m bemin, ko dyɛ́ng in bato min na bemin arɔng. 9Yin tala mwat hwak na neves yaga pyɛ́ vyes de a ra wɛt, kɛ na sedusa, yaga a dùsa hin. Ko dura hin a yɛn nerat e negya. Pyɛ ma yemo de Dagwi a yila hin yaga yɛ. Ka sede yin a ra ano, ko yɛ a rɔda tɛ̀ nerat e ra yin. 10Sede remo de bà jɛk e Bwok-basa Dagwi wɔgɔ,

“Kawɛ mwat de e simo a wok netâ sangal mɛ na a vɔk yey pyɛng e jey arɔng,

tik na a hàla hâ há ves,

na a tik kwɛlɛ̂ng bemat arɔng.

11Tik na a hàla râ pyɛ́ vyes,

na a ra pyɛ́ ryat,

ko tik na a tɛ̀ gap mɛ mwa e de jāma sangâl netyang na bemat.

12Yaga Darwey e bɛrɛng vemo de ba sé cik e bayis mɛ,

e wok newon mɛn arɔng,

ko e to wok repugû vemo de be ragas pyɛ́ vyes.”

13E wà de a rɔda mǎ hin, ka sede yin a sé tē ngyɛ́k na yin a ra pyɛ de ya sé ryat arɛt? 14Ko ka sede yin a ka di reyɔm yaga râ pyɛ́ de Dagwi e simo, yin a sé vê yey pyɛng! Yin vɔk bengyip mwat hwak kɛ yin tik pyɛ cak ye bɔrɔk hin arɔng wɛt. 15Ko sap in Kristi e neyey min, na yin a to nɔng ɛ nerey de na sé nemɛ yaga yɛ a sé Darwey. Sè in e yong in jojot, na yin a toyo a kawɛ mwat de a rangal hin na yin a misang a yɛ pyɛ de ya tɛ̀ yin e sɛt yey min e ra Kristi. 16Ko rá in ano na nehywɛ, na yin a nɔ̂ng bemat o nerey arɔng. Tik na barê yey min he sè rat. Yi ano, jeng de bemat be ha há ves e ra negwɔn nerat min nè bemat-raà Kristi, yɛn a rɔda wok rekyên há ves de yɛn e ha. 17Yaga a dal na nerat na mwat a di reyɔm yaga râ pyɛ́ ryat — ka sede a sé simô Dagwi à hane — de mwat a di reyɔm yaga râ pyɛ́ vyes. 18Yaga Kristi pyɛ mɛ a ku yaga banɛn mot zang hining zɔng, ko reku mo ra pere vey yaga mwa jeng. Yɛ mwat de a sé cik a ku yaga bemat de ba sé cik e bayîs Dagwi wɛt, yaga na a bin vey na wot na Dagwi. Bemat ba mɔrɔ rebek mɛ, ko Gabik Dagwi ha to nɔng ɛ neken. 19Ko yi na Gabik o a wɔ̀ shara há mɛ a begabîk vemo de bà sè e ngyang. 20Begabik vane mo bà sè vê bemat de bà kana kyɛ́ ɛn nà raa Dagwi e jeng de Nowa à sè lɔk gbɔng dwa-nshi mɛ, mwa ano de Dagwi o à sè niri e de gyeng ɛn. À sè bemat tyɔng zɔng wɔgɔ, bemat rwit de bà sè e ji dwa-nshi mo, ko Dagwi à séy ɛn yi na nshi mo. 21Nshi mo na sé e tô batisma de wo sey in a remo. Cap-hâ batisma ya sé rehâ kûs serwik yi e rebek mwat wɛt, ko ya sé wɔgɔ, wot a sé ra won na Dagwi na a tɛ̀ barê yey mot he sè rat. Ko batisma mo wo sey in yi na sene Yɛsu Kristi yi e reku. 22Yɛ a ga kyè vɔk e lagwi, ko a sé sangal e ra gwofwa negwɔm e vwɔ yegê Dagwi. E re negwɔm e ra betom-lagwi na mwa vemo de ba vɔk reto tanga nerey e hwomo.

Currently Selected:

1 Bitrus 3: bomBI

Highlight

Copy

Compare