1 Bitrus 2
2
Gwofwa neken, tanga bemat de ba tik ɛn jaram yaga Dagwi
1Yaga ano, tík in ragâs kanɛ neves. Yin kwon kwɛlɛng bemat, kɛ yin vɔk nenu-neba, kɛ yin kyɛ́ in nà simo mwat hwak a sɛ̀ pyɛ cak, kɛ yin ha há ves e ra mwat hwak arɔng wɛt. 2Ko vɔk in negwɔn nèy de ba tɔs nɛ mwas zɔng, de ne simo ngas nevasal kayɛ jeng. Ano arɔng, tik na yin a wok cwey nevasal ne mwin de na sé hâ Dagwi de he tɛ̀ in na yin a ras naka vɔk e jeng de Dagwi a rɔda ba sey neken min. 3Ré in nuyel na wok cwey o, sede remo de yin a ga kana wok gwong de Darwey e dura nerat mɛ.
4Yaga ano, vey in na Darwey, yɛ de a sé gwofwa de gwa vɔk neken, gwomo de bemat ba kyɛ́ ɛn gwɛ wɔgɔ, gwa vɔk fwom wɛt. Ko Dagwi a ga kana kasa gwɛ, ko a jut gwɛ gwa sé pyɛ simo sizɔng e bayis mɛ. 5Ko yin arɔng de yin a sé sede beta de ba vɔk neken, tik na Dagwi a jut in na a lɔk mɛ̀ lɔ de Gabik mɛ ha rɔda sangal ɛ̀. E hwomo, yin a rɔda sè bemat de Dagwi a tɛ̀ in jaram na yin a sè bepiris mɛ, na yin a bin nára a yɛ nenɔrɔ wɔgɔ, yin nɔng ɛ bato min mwa. Pyɛ ma yemo de ye pɛngɛ a Dagwi yey yi na Yɛsu Kristi. 6Yaga bà jɛk e Bwok-basa Dagwi wɔgɔ,
“Di, ma tɛ̀ gwofwa e ngamo e Siyɔn:
Ma ga kasa gwɛ, ko gwa sé pyɛ simo sizɔng;
a sé e gwofwa de ma rɔda bomo retîs lɔ e ra gwɛ.
Ko kawɛ mwat de a tɛ̀ gap mɛ e ra Darwey,
yɛ de a sé gwofwa gwane mo,
a rɔda vo rekyen ko tyɔng wɛt.”
7Gwofwa mo gwa sé pyɛ simo sizɔng yaga yin de yin a tɛ̀ gap min e ra Yɛsu Kristi, ko vemo de ba kyɛ́ ɛn nà ra ano yɛn a rɔda di wɔgɔ,
“Gwofwa de bemât lɔk duk ba kyɛ́ ɛn gwɛ wɔgɔ, gwa vɔk fwom wɛt,
e gwɛ de gwa tɛ́ ɛ gbɔng gwofwa râ fwom.”
8Ko bà to jɛk wɔgɔ,
“Gwofwa ma gwomo de gwo tɛ̀sɛ bemat be tiris bol mɛn e ra gwɛ,
e gwɛ à gwogbɔng gwofwa de gwo tɛ̀sɛ bemat be gabsa.”
Bemat be tiris bol e ra gwɛ, yaga yɛn e kyɛ́ ɛn nà raa hâ Dagwi. Ko a sé e pyɛ ma yemo de Dagwi à kana yong ɛ̀ gyam yaga yɛn.
9Ko di, yin a sé yerê bemat de Dagwi a ga kana kasa; yin a sé bepiris, yɛ de a sé Gbɔng Gwɔ̀m; yin a sé yerê bemat de ba tik jaram yaga Dagwi; ko yin a sé bemat de ba sé vê Dagwi pyɛ mɛ. A kasa hin, yaga na yin a bin ha a bemat rehâ gbɔng pyɛ́ ryey de yɛ̀ a ra. E yɛ̀ de a yila hin yi e lwīl, na yin a yel e negbey mɛ de na sé nerat sedesi. 10A raane, yin á kana sè bemât Dagwi wɛt, ko a remo, yin a sé bemat mɛ. A raane, yin á kana di gwong de Dagwi a tosho reyɔm min wɛt, ko a remo, yin a ga di gwɛ.
Sangal hin sede besam Dagwi
11À besâ yey hom, yin a sé bekɛnɛt, ko yin a vɔk kwɔ̂n sangal hê tó min e jey yemo wɛt. Yaga ano, ma sé shonong e ra yin, na yin a tik cwey pyɛ́ vyes de babek min be simo yaga ye ra como na neyey min. 12Tik na negwɔn min e ji bemat de ba tɔk Dagwi wɛt ne sè yere nemo de bemat be somo nɛ. Ka sede yɛn a ye, yin e ragas pyɛ́ vyes, ko tik na yɛn a di pyɛ́ ryat de yin a sé ragas. Pyɛ ma yemo de yê tɛ̀ ɛn na yɛn a nɔ̂ng Dagwi nerey jeng de a rɔda ba man na yɛn.
13Dyɛ́ng in bato min na mwa bemat de ba vɔk reto e ra yin e jey yemo, yaga Darwey e simo ano, kɛ a sé Da vwel BeRoma de a vɔk retô mwa, 14kɛ a sé begwɔmna de a tɛ̀sɛ hɛn na yɛn a tabak vemo de be ra pyɛ́ vyes, na be to somo vemo de be ra pyɛ́ ryat. 15Yaga Dagwi e simo na pyɛ́ ryat de yin e ragas ye tɛ̀ betɔn be sǎ yuu, yɛn vemo de be ha e ra yin pyɛ́ de yɛn a tɔk yɛ̄ wɛt. 16Sangal hin sede bemat de ba sé washak. Ko yin kwon jut sangâl newashak o na yin a bang mɛ̀ pyɛ́ vyes wɛt. Ko sangal hin sede besam Dagwi. 17Nɔng in bemât mwa nerey, tɛ̀ in neyey min na begwa min vê raa, vɔk in bengyip Dagwi, ko nɔng în Da vwel BeRoma nerey arɔng.
Raa hin negwɔn Yɛsu Kristi
18À yin bemât fwôm lɔ, dyɛ́ng in bato min na bedanelɔ min, na yin a sap ɛn e ji kayɛ pyɛ. Rá in ano na vemo de ba sé berat, de ba to sé hywɛ zɔng wɛt, ko mwa na vemo de ba vɔk yol arɔng. 19Mwat de e niri na reyɔm de be tak a yɛ, mwa ano de a ra pyɛ cak vyes wɛt, ko e niri, yaga e tɔk, niri mo ha sé pyɛ de Dagwi e simo — e yɛ à mwat de ba rɔda somo hɛ. 20Ko ka sede mwat a ra pyɛ vyes, ko a niri jeng de ba sé dak ɛ yaga pyɛ vyes o, yaga sɛ́ de yin e jut niri mo sede pyɛ de bê somo yɛ arɛt? A sé sey pyɔlɔ̂ fwom vwes mɛ zɔng. Ko mwat de a ra pyɛ ryat, ko be tak a yɛ reyɔm yaga pyɛ ryat o, ko a niri na reyɔm o — e yɛ à mwat de Dagwi a rɔda somo hɛ. 21E yere negwɔn nane mo de Dagwi a ga yila hin, na yin a vɔk nɛ. Yaga Kristi pyɛ mɛ á di reyɔm yaga yin, ko a dura a yin gwong de yin a rɔda raa, yaga na yin a bin kyè e nekyɔ̌n bol mɛ. 22Yɛ á sang ra renɛn wɛt, ko bá tɔk wok hâ kwɛlɛng e nu mɛ wɛt. 23Mwa ano de bemat bá dùsa hɛ, ko á toyo a yɛn na sedusa wɛt. Mwa ano de bá tak a yɛ reyɔm, á shìsa hɛn wɛt, ko á ye yɛndɛng e ra Dagwi de e gas badu e tē. 24Kristi pyɛ mɛ á jut banɛn mot e rebek mɛ e jeng de bá kak ɛ e ra cɔ́gɔt. A ra ano, yaga na wot a bin sè sede bemat de ba ga kushu, vemo de ba tik ragâs banɛn, ko na wot a bin sè beken, na wot a vɔk negwɔn de na sé cik e bayîs Dagwi. A sé yi na baram de á sɔ de ba ga tɛ̀ ot tyang. 25A raane, yin á kyě kyè kpɛɛ sede vyēl de ya ga vusa hɛ, ko a remo, yin a ga to toyo vey na Lwek min de a sé Mwât Gyeng neyey min arɔng.
Currently Selected:
1 Bitrus 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
