PA’PUDIAN 83
83
Passambayang malaku pa’tunduan unnea mintu’ ualinna Israel
83:1-19
1Nanian. Pa’pudianna Asaf.
2O Puang Matua, da Mimari’pi bang,
sia da Mima’pakappa sia da Mima’bituk-bituk, o Puang Matua.
3Belanna tiromi, marukka nasangmo tu mintu’ ualimMi,
sia mintu’ to ungkabiri’Komi umbangunan ulunna.
4Sama turu’ untannun tangnga’ kadake unnea taumMi,
sia sipakulu-kulumo la umbali mintu’ to tang Mipairi’i angin.
5Nakua kadanna: Maikomi anta sabu’i nasangi tu tau iato,
da nadadi len misa’ bangsa,
sia da nadikilalai lenpa tu sanganna Israel!
6Inang manassa misa’ penaamo tu tau iato mai untampa tengko situru’,
sia unnarra’ lampa kada la unneaKomi:
7Iamotu mintu’ to ma’ suku Edom sia to Ismael,
Moab sia to Hagar,
8Sia Gebal sia Amon sia Amalek,
tondok Filistin sola mintu’ pa’tondokan Tirus:
9Ia duka tu Asyur sama turu’mo mintu’ tau iato mai,
sia ussande’ mintu’ bati’na Lot. Sela
10Parampoi tu tau iato mai susitu mangka Miparampoan to Midian,
sia susitu lako Sisera, sia susi lako Yabin dio randan salu Kison.
11Tu disabu’imo dio En-Dor,
sia susimo pangangku’.
12Iatu mintu’ to la’bi’na pasusii Oreb sia Zeeb,
sia iatu mintu’ tedong pariu’na pasusii Zebah sia Salmuna.
13Tu mangka ma’kada nakua: Maikomi taalai tapomana’!
Tu inanNa Puang Matua.
14O Kapenombangku, pasusii daun kayu nabaa
angin tu tau iato mai,
sia susi ongkan nairi’ angin.
15Susi api unnimbakan pangala’ tamman,
sia susito dukku api ullalle mintu’ tanete,
16Susi dukamoto la Miula’ sumpu angin bara’Mi tu tau iato mai,
sia patirambanni talimpuru’Mi.
17Todingi siri’,
anna daka’i tu sangamMi, o PUANG.
18Da’ito anna kasirisan tu tau iato mai sia tiramban tontong sae lakona,
sia da’ito anna maila’ sia anna sanggang.
19Anna issanni kumua Kamu manna tu disanga PUANG,
Patodoranna lan mintu’ narande tana kalua’.
Currently Selected:
PA’PUDIAN 83: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
