PA’PUDIAN 81
81
E to Israel, patananni tu talingammi sia perangii Kapenombammi
81:1-17
1Lu lakona pangala sengo. Unturu’ baenan sengo: Gitit. Pa’pudianna Asaf.
2Ra’ban-ra’bankomi umpenanian Puang Matua, tu tapopamuntu,
pela’tekanni tu Kapenombanna Yakub.
3Menanikomi, sia pannonii tu ganda’-ganda’,
sia katapi merio’-rio’ oninna sia dandi.
4Pannonianni tarompe’ pua tu allo madatunta ke bunga’ sombonai bulan
sia iake malimbunnai bulan.
5Belanna iatu iannato iamo aluk dipondokan to Israel,
sia atoranna Kapenombanna Yakub.
6Iatu iannato Napantok napobatu silambi’ bati’na Yusuf,
tonna sun tu Puang umpasulei tana Mesir.
Urrangimo’ misa’ kada tang kupebuyu’, nakua:
7Akumo ussondokan panglemba dao mai palempengna,
anna tilendok lu limanna dio mai pangrengnge’.
8Aku urrinding pala’ko tommu meongli’ lan attu kapussakkan,
sia Aku umbaliko guntu’ lan mai massalebu’na;
Kusandakmoko dio Meriba. Sela
9E taungKu, patananni tu talingammu, la Kumotokkiko lila pa’pakilala;
e to Israel, ke la moraiko umperangiiNa’!
10Da muden umpekalangka’i deata to senga’,
sia da mupenombai deata to salian lembang.
11Akumo, PUANG, Kapenombammu,
tu mangka ussolangko sun lan mai tana Mesir;
popengangai tu sadangmu angKu ponnoi.
12Apa iatu taungKu noka umperangiiNa’,
sia tae’ naporaiNa’ to Israel.
13Iamoto angKu popa’elo’nai lan katoroge’geranna;
naurungan unturu’ bang lalan tangnga’na.
14Kenna perangiiNa’ taungKu,
sia kenna turu’i to Israel tu pepasanKu!
15Manassa ta’pa Kupatunduk madomi’ tu mai ualinna,
sia Kupasulei limangKu tu mai to unneai.
16Mintu’ to ungkabiri’ PUANG, anna tang mengkaola lako Kalena, anna angga’-angga’i bang,
sia iatu kamasolanganna to mabiri’ la tontong sae lakona.
17Manassa tau iato mai la Napakande mapulu’na gandung,
sia la Kupedia’i tani’ lan mai sapak batu.
Currently Selected:
PA’PUDIAN 81: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
