PA’PUDIAN 51
51
Passambayang katobaranna Daud
51:1-21
1Lu lakona pangala sengo. Pa’pudianna Daud.
2Tonna bu’tuimi nabi Natan, tonna mangka sigau’ sala Batsyeba.
3Katuru-turuina’, o Puang Matua, sitinaya kamasokanamMi,
sia pa’dei tu salaku sitinaya kakapuanna mamaseMi:
4Pemabaseina’ dio mai kakadakeangku
sia seroi pindanna’ dio mai kasalangku.
5Belanna kutandai tu salaku,
sia iatu kasalangku tontong bang dio lindoku.
6Mati’ Kalemi, ondong mati’ manna Kalemi kuniimo kasalan,
sia umpogau’ apa kadake dio pentiroMi,
kumua amMi sanda tonganna lan bisaramMi,
sia malambu’ lan pa’paolaimMi salu.
7Pada ditibussanammo’ kakadakean,
sia pada natambukna’ kasalan mendadiangku.
8Tonganna Mianga’ tu kamanapparan lan ba’teng
sia lan lu tang dikitanna Minii umpasomboanna’ kakinaan.
9Pamaserona’ supa angku masero pindan,
baseina’, angku mandu mabusa anna ambun makko.
10Parangii polena’ kasendean sia kaparannuan,
anna sila’tekan tu mintu’ buku lampa mangka Minisak-nisak.
11Pasalaimi matamMi tu mintu’ kasalangku,
sia pa’deimi tu mintu’ kakadakeangku.
12Pakombonganna’ lan ba’tengku tu misa’ penaa masero, o Puang Matua,
sia ba’rui lan kaleku tu misa’ penaa kalebu.
13Da amMi sualena’ dio mai oloMi
sia da amMi alai dio mai kaleku tu Penaa Masallo’Mi.
14Pasulei lako kaleku tu kaparannuan kasalamaran lu dio mai Kalemi,
sia penaa mengkaolakumora la ussande’na’.
15Angku ada’i lalanMi tu to sala,
anna mengkatoba’ Mati’ tu to kadake gau’.
16Lendokanna’ dio mai indan rara, o Puang Matua, Puang Matua oto’na kasalamarangku,
la napopela’tek lilaku tu kamaloloamMi.
17O Puang, patiku’bi’i tu randan dipudukku,
napatale’ ambunni tongka’ dililaku tu kadipudiamMi.
18Belanna tae’ Mianga’i tu pemala’ pangrere’,
kenna la susito, manassa la kupemalaran;
sia iatu pemala’ ditunu pu’pu’ tae’ duka naalai penaamMi.
19Iatu pesuru’ naala penaanNa Puang Matua, iamotu penaa rantang;
iatu penaa rantang tang sirua-rua
tae’ Mitiro bitti’i, o Puang Matua.
20Tiroanni melo tu Sion sitinaya kamasorokamMi,
sia pabendanni tu bentengna Yerusalem.
21Iapito amMi porai tu mintu’ pemala’ situru’ tu pato’na.
Iamotu pemala’ ditunu pu’pu’ napurai api;
maneri napemalaran tau tu sapi dao inan kapemalaran lako Kalemi.
Currently Selected:
PA’PUDIAN 51: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
