PA’PUDIAN 39
39
Passambayang umpalaku karapasan penaa untiro a’gan tang marendeng
39:1-14
1Lu lakona pangala sengo; lako Yedutun. Pa’pudianna Daud.
2Nakua kadangku: La makaritutuna’ lan mintu’ lalanku,
da angku pogau’ kasalan natumang lilaku;
la kusanga’ tu pudukku,
ke sitingayopa’ to tang mekaaluk.
3Kupakari’pi bangmo tu kaleku tang ma’kada sia kupakappa,
ma’loko-loko bangna’ sisayuran melona,
apa sakerangngan-rangnganna karossoangku.
4Re’dekmi tu penaangku lan,
marassanmo’ ma’tangnga’-tangnga’ dukkumi tu api;
manera’ umbungka’ sadangku, ma’kada:
5O PUANG, paissananna’ tu lampakku,
sia sangapara lambe’na tu sunga’ku,
angku issanni tumba katangmarendenganna a’gangku.
6Manassa iatu sunga’ku sangdangkanri mangka Milampak,
sia iatu katuoangku butung bayo-bayo bangri dio oloMi;
ondongpi mintu’ tau bendan,
susi bangri damo’. Sela
7Iatu mintu’ tau timbayo bangri susi bayo-bayo;
ussara’i punala bang kalena,
untombon ianan, apa tae’ naissanni minda la umpomaruai.
8Na totemo, apapara tu la kutayan, o Puang?
Mati’ri Kalemi nanii kapa’rannuanangku.
9Rampananna’ dio mai mintu’ salaku,
sia da Mipatulangdanna’ napotombonan dollok to baga.
10Ma’loko-lokomo’, tae’mo kubungka’ len pudukku,
belanna Kamumo umpogau’i.
11Patoyangna’ dio mai parri’ bu’tu lu mai Kalemi,
masangna’ belanna natemme’ limamMi.
12Iake Mipandasai tu tau,
belanna natumang kakelokanna,
misanggang tu kameloanna susito nakande busung,
manassa iatu mintu’ tolino susi bangri damo’. Sela
13Perangiimi tu passambayangku, o PUANG, sia tananni talingamMi tu pengkamoyaku,
sia da Mipa’loko-lokoi tu tangi’ tang marangangku,
belanna iate aku te misa’na’ to sae dio Kalemi,
sia to mentiruran susi mintu’ to doloku.
14Saile randenna’, angku parannu paimanpa,
kumane messala indete sia pa’de.
Currently Selected:
PA’PUDIAN 39: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
