PA’PUDIAN 38
38
Passambayangna to masaki kapua
38:1-23
1Pa’pudianna Daud. Ke dipennoloanni tu pemala’ kapengkilalan.
2O PUANG, da Mipandasana’ diona kasengkeamMi,
sia da Mipa’dikkina’ diona kamare’dekamMi!
3Belanna iatu mintu’ tinaranMi lambun nasangmo tama kaleku,
sia lendu’ nati’tinku tu limamMi.
4Makuyu langkan tu kaleku tu belanna kasengkeamMi,
sia tae’mo memun tu mintu’ bukungku natumang kasalangku.
5Belanna mintu’ kakadakeangku ungkabu’mo botto ulungku,
sangtinti misa’ pamaan magasa tu untondon maro’na’.
6Mintu’ bangkeku bubosi sia ma’nana,
natumang kabagangku.
7Tikongko-kongkona’ sia bukku’ tonganmo’,
kiallo-kiallo butungna’ to sidudung pote.
8Belanna mapa’dik tu aakku,
sia makuyu langkan tu kaleku.
9Iate aku te bo’yo’ tonganna’ sia bonnongna’,
sia urrantangna’ sarro belanna karossoanna penaangku.
10O Puang, mintu’ kamamalirangku Mitiro nasang,
sia iatu sarroku tae’ nakarerungan dio mai Kalemi.
11Ma’baramba tu penaangku, sia tae’mo kamabukuangku,
sia ia duka tu kamarorronganna matangku pa’demo.
12Mintu’ tu to kukamali’ sia sangmuaneku untoyangammo kalena, dio mai kamandasangku,
sia mintu’na duka sangdadiangku urrandanammo kalena.
13Iatu to la ungka’tu sunga’ku natanannina’ poya,
sia iatu to undakaranna’ kasanggangan umbisara la kuposabu’na,
sia untannun tangnga’ kadake kiallo-kiallo.
14Apa aku te butung to taru, tang parangi,
sia sangtintina’ to mamang tang tiku’bi’ tu pudukna;
15Ondongpi aku te butungna’ to tang parangi,
sia tang naissan ma’pabali.
16Belanna Kamumo kutayan, o PUANG;
manassa la Mipebaliina’, o PUANG, Kapenombangku.
17Belanna kukua: Da naposendei tau iato mai tu kamandasangku,
sia iake tilende’i tu lentekku, da napakapua penaanna lako kaleku
18Belanna madomi’mo’ la tobang,
sia iatu kamasussangku dio bangmo tingayoku.
19Belanna la untuarasanna’ kakadakeangku,
sia rosso penaangku natumang kasalangku.
20Apa mintu’ ualingku malaga’ sia matoto’,
sia budamo tu to ungkabiri’ punala bangna’,
21Sia to umpapakkanni kakadakean tu kameloan,
sia naeamo’, belanna untuntunna’ kameloan.
22O PUANG, da Mitampena’,
o Kapenombangku, da Mitoyanganna’!
23Madomi’Komi untunduina’,
o Puang, oto’na kasalamarangku.
Currently Selected:
PA’PUDIAN 38: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
