PA’PUDIAN 31
31
Pa’pakatana lan kamaparrisan
31:1-25
1Lu lakona pangala sengo, Pa’pudianna Daud.
2O PUANG, mati’ kunii mentirerung;
da maro’ angku kasirisan!
Rampananna’ tete dio kamaloloamMi.
3Tanannina’ talinga, sia rampananna’ madomi’,
sangapaoi angku pobuntu batu pentirerungangKomi,
4Belanna Kamumo buntu batungku sia tambakukungku,
iamoto rendenna’ sia solanna’ tete dio sangamMi.
5La Midu’dukna’ lan mai porro’ natananan-bunianna’ tau,
belanna Kamumo sanderan matoto’ku.
6Tamamo lisu pala’Mi kunii ussorong penaangku,
mangkamo’ Milendokan, o PUANG,
Puang Matua maruru’!
7Kukagi’gi’, tu to umpenombai apa tang kebattuan sia tae’ patunna,
sia sande’pa’ lako PUANG.
8La umpomela’tekna’ sia umpoparannu kamasokanamMi,
belanna Mitiromo tu kamandasangku,
sia Miissanmo tu kamaparrisanna deatangku.
9Sia tae’ Misorongna’ tama lisu pala’na uali,
sangadinna Mipopellesemo tu lentekku dio malona’na.
10Kamaseina’, o PUANG, belanna lanna’ kamagiangan,
belanna rosso inaa anna malanmo tu matangku, sia langga’ tu sumanga’ku, sia kaleku.
11Belanna samandappi’-dappi’na sunga’ku napobua’ karossoan, sia rondon bala batu tu taun katuoangku napobua’ kasumarroan,
moro’mo tu kamabukuangku natumang salaku,
sia langga’ mintu’ bukungku.
12Tu belanna mintu’ to uneana’ angku ditanda to kadake,
ondongpi dio mai sangbanuangku,
sia napotiramban sitanda-tandangku;
sia minda-minda untirona’ dio lu lalan napallaianna’.
13Napasalaimo’ penaanna tau butung to mate,
sangtintimo’ to kurin tesse.
14Belanna kurangimo tu kada boko’na buda tau,
– kamatakuran tiku lao –;
samaturu’ umpata’paina’ lima,
sia undaka’ lalan ungka’tu sunga’ku.
15Apa mati’ Kalemi kunii sande’, o PUANG!
kukua: Kamumo tu Kapenombangku.
16Iatu toto’ku lan lisu pala’Mi;
rampananna’ dio mai lisu pala’na mintu’ ualingku sia dio mai mintu’ to unnula’ sumpuna’.
17Melo ke Mipaarrangi rupamMi tu taumMi,
sia lendokanna’ tete dio kamasokanamMi.
18O PUANG, da Mieloranna’ kasirisan, belanna meongli’na’ mati’ Kalemi;
melo ke mintu’ to tang mekaaluk kasirisan,
da’ito nakatiro-tiro lan lino to mate.
19Da’ito namamang tu puduk mo’rang,
tu matampo ungkada-kadai to malambu’,
sia madongnga’ sia patelle.
20Tangpada kapuana tu kamasokanamMi,
tu Miparandanan to ungkataku’Komi,
sia iatu Mipogau’namo lako to umpentionganniKomi,
tu nata’pai matanna mintu’ ma’rupa tau.
21Tau iato mai Mionganni dio mai tengko turu’ kadakena tolino,
dio to’ inan narerung oloMi.
Sia Mirinding pala’ lan misa’ lantang,
dio mai lila passigaganna tau.
22Mintu’na kadipudian lu lako PUANG,
belanna Napakitammo’ pa’kamasean kalle-kallean,
lan tondok ditambakuku.
23Tiramban tu penaangku angku ma’kada, kumua:
Disualemo’ dio mai oloMi!
Apa Mitananni sia talinga tu pengkamoyaku,
tongku meongli’ Mati’.
24Kamali’mi tu PUANG e mintu’ to Naala mase;
Narinding pala’ PUANG tu to maruru’,
apa iatu to umpogau’ kamatampoan Napapakkanni kapua.
25Melo ke batta’komi sia kalebu penaammi,
e kamu mintu’ to urrannuan PUANG.
Currently Selected:
PA’PUDIAN 31: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
