1 SAMUEL 8
8
Kosoomei `piik laitoryat
1Kingo osit Samuel, konde weeriikyik koek kirwoogik che pou Israel. 2Kainetap taaitanyi ko ki Joel, ne po aeng' ko ki Abijah. Ki kirwoogik tuwai eng' Beer-sheba. 3Ma pendate weeriikyik ortinwekyik, ago kimasta kosup mogornateet eng' ooreet ne ya. Kitaach asoya ak komaas kirwooget.
4Ki iyumgei anyun poisyek tugul che po Israel ak kobwa ole mi Samuel eng' Ramah, 5#NKNg'a 17.14 ak koleenji ineendet, “Keero, kaiositu, ama pendote weeriiguk ortinweguk. Ara anyun cheeng'wech laitoryat ne irwokwech ko uu pororyosyek tugul.” 6Ki ma paibait Samuel kingo mwa icheek kole, “Koonech laitoryat ne irwokwech.” Ki sa `Samuel Kamuktaindet ne Toroor, 7ak koleenji `Kamuktaindet ne Toroor Samuel, “Kas ng'aleegap piik agobo tuguuk tugul che kamwaun, amu ma inyee ne kaeesyo ago kaeesyo anee kole ma egu laitoryat eng' icheek. 8Ko uu poisyonik tugul che ki koyai icheek kobooch peetuut ne ki amutu kotogos eng' Misiri kot koit ra, kobagaaktoa ak kootot kamuktaik alak, koyaun aginye ko uu nooto. 9Kasyi anyun ng'aleekwak, ago iteechi komyee ak iboorchi kiit ne uu laitoryat ne tuun laitorane icheek.”
10Ki mwachi `Samuel pichooto kisoomei eng' ineendet laitoryat ng'aleek tugul che po Kamuktaindet ne Toroor. 11Ki le, “Uu ni laitoryat ne tuun laitoranenok: namei weeriikwok ak kolewenjigei kotononji kariisyekyik koek che laanyei paraisisyekyik ak korwai kondoe kariisyekyik; 12ak kolewenjigei icheeget koek kiptainigap eliphuusyek ak kiptainigap konomusyek, ak kobat mbareenikyik alage, ak koges peekyik ak kotany kariikyik che po lugeet ak tuguugap kariisyekyik. 13Namei tiibiikwok koek che yaei nyamdutik, ak koek che kwanyei ak che peelei magatiinik. 14Rebenak mbareenikwok ak mbareenikwok che po sabibuk ak che po mseituni che korooron eng' tugul ak kogoochi otwogikyik. 15Ibei kebeberta agenge eng' taman ne po kesweekwok ak ne po mbareenikwok che po sabibuk si kogoochi kiboitiinikyik ak otwogikyik. 16Ak korebenak otwogikwok che murenik, otwogikwok che tiibiik, neranikwok che korooron ak sigirokwok yeityo konde koyai poisyonikyik. 17Ibei kora kebeberta agenge eng' taman ne po keechiirekwok ak oegu okweek otwogikyik. 18Ak oriirye eng' peetuunooto amu laitoryandeng'wong' ne olewenjinigei, ago mawolwok Kamuktaindet ne Toroor eng' peetuunooto.”
19Ago ki eesyo piik kogas kateunetap Samuel, ak ki le, “Achicha, kimache laitoryat ne poiywech, 20si keigei ak acheek pororyosyek tugul ak si korwookwech laitoryandennyo ak komandoi kondoenech koyaiywech lugosyekyok.”
21Kingo kas Samuel ng'aleek tugul che po piik, ko ki ipchi komwachi Kamuktaindet ne Toroor ng'aleechooto. 22Ak ki leenji `Kamuktaindet ne Toroor Samuel, “Kasyi ng'aleekwak ak icheeng'ji icheek laitoryat.” Koleenji `Samuel piigap Israel, “Ingwo chii tugul nganasennyi.”
Currently Selected:
1 SAMUEL 8: KALDC
Highlight
Share
Compare
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
