ROMANIK 10
10
1Che kitupche, mageetap muguleldanyu ak soomennyu eng' Kamuktaindet agobo icheek ko ale kesar icheek. 2Amu abaoryani agobo icheek ale tinyei kagiiletapkei agobo Kamuktaindet, ago ma eng' naet. 3Amu ye ki ma nai icheek imandap Kamuktaindet, ak ye ki cheeng' kogimit nenywa, koma kogas iit imandap Kamuktaindet. 4Amu Kristo kagesunetap Ng'atuutyet agoi imanda eng' age tugul ne iyani.
Po piik tugul yetunet
5 # A.La 18.5 Amu sirei Musa kole chii ne yaei imanda, ne punu Ng'atuutyet, kosabei eng' nooto. 6#NKNg'a 30.12-14 Ago mwaei imanda nooto po kayaneet ko uu ni, “Amemwa eng' muguleldang'ung' ile, ‘Ng'oo ne togostoi kipsengwet?’ (Nooto ko komut Kristo kochoorgei) 7anan, ‘Ng'oo ne wendi kochoortogei kebeberwegap ng'wony che looen?’ ” (Nooto ko komut Kristo kotogos eng' che ki pek.) 8Ago mwaei nee?
“Neegitenen ng'olyoot,
mi kuting'ung' ak mi muguleldang'ung'.”
nooto ko ng'olyootap kayaneet, ne ki amdoi; 9amu nging'aany eng' kuting'ung' ile Jeso ko Kiptaiyat, ak iyani eng' muguleldang'ung' ile ki ing'eet `Kamuktaindet ineendet komang'une che ki pek, kesaruun. 10Amu iyani chii eng' muguleldo agoi imanda; ak ng'aanyei eng' kutit agoi saruunet. 11#Isa 28.16 Amu mwaei sireet kole, “Age tugul ne iyani ineendet koma kigoochin kolilaan.” 12Amu ma mi kabesyet eng' Yahudyot ak Yunanindet; amu Kiptaiyandanooto ko Kiptaiyatap tugul ak aiyeep eng' icheek tugul che kuurei ineendet. 13#Joel 2.32 Amu age tugul ne kuurei kainetap Kiptaiyat, kesaru.
14Kuurtoi ano anyun ineendet `icheek che tomo koyan? Ak iyandoi ano ineendet `icheek che tomo kogas agobo ineendet? Ak kastoi ano ama amdoindet? 15#Isa 52.7 Ak amdoitoi ano, ngo ma kiyookto? Agot ko uu ye siraat kole, “Korooron ne tya keelyegap icheeget che ibu logoiywek che po poiboiyet, che po tuguuk che myach!” 16#Isa 53.1 Ago ki ma kas iit tugul logoiywek che myach. Amu mwaei Isaiah kole, “Kiptaiyat, ki koyan ng'oo ng'aleekyok?” 17Nyoonei anyun kayaneet eng' kaseet, ak nyoonei kaseet eng' ng'olyootap Kristo.
18 # T.Kal 19.4 Ago ateebee ale, tos ki ma kas? Ee, iman,
“Ki wo tweguunennywa koyom emet komugul,
ak ki pa ng'aleekwak agoi ole poochin ng'wony.”
19 # NKNg'a 32.21 Ago amwae ale, tos ki ma nai Israel? Ki sip komwa Musa kole,
“Andeok ng'etkonda eng' nooto ne ma pororyet;
atachok eng' pororyet ne ma tinyei naet.”
20 # Isa 65.1 Ak nyigan miising' Isaiah, ak mwaei kole,
“Ki nyoorwo icheek che ki ma cheeng'a;
ki ataagu eng' icheek che ma teeba.”
21 # Isa 65.2 Ago mwaei agobo Israel kole, “Ki aitoochi eunekyuk eng' peetuut komugul piik che ma kase iit ak che ngelelik.”
Currently Selected:
ROMANIK 10: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
