ROMANIK 1

Kagateet

1Paulo, otwogindetap Jeso Kristo, ne ki kiguur koek kayooktoindet, ne ki kitabaanji logoiywek che myach che po Kamuktaindet, 2che kisip koaror eng' maotikyik eng' siruutik che tiliileen, 3logoiywek che myach agobo Weeriinnyi, ne ki kisich eng' kesweegap Daudi eng' poorto, 4ne ki kimwaita keele Weeriitap Kamuktaindet eng' kimnateet, ko uu Kabuuset ne po tiliilindo, eng' ng'eetyeetap che ki pek; Jeso Kristo Kiptaiyandennyo, 5ki kitaach eng' ineendet myeeindo ak kayooktoet, agoi kasetap iit ne po kayaneet eng' pororyosyek tugul amu kainennyi: 6ki kiguurok ak okweek eng' icheeget obunji Jeso Kristo: 7eng' okweek tugul che omite Rome, chamanigap Kamuktaindet, che ki kiguur koek che tiliileen: Ingotep kobootok myeeindo ak kaalyeet ne punu Kamuktaindet Kwandanyo ak Kiptaiyat Jeso Kristo.

Saaet ne po mwaetap kongoi

8Ne po tai, amwachini Kamuktaindet nenyu kongoi eng' Jeso Kristo agobo okweek tugul, amu kimwaitoi kayaneng'wong' eng' ng'wony komugul. 9Amu Kamuktaindet paoryandennyu, ne aoote eng' saboondanyu eng' logoiywek che myach che po Weeriinnyi, ale masise amwa agobo okweek kotugul eng' saautikyuk, 10asoome ale, tamangap kobiitwa poroindo nguno ko neegit, Anyoonjok eng' mageetap Kamuktaindet. 11Amu atinye emosto ageerok, si agoonok konunet age ne po saboon, si kobiit kigimitok; 12nooto ko si kobiit kigaigaige anee ak okweek eng' kwenung'wong', chii tugul eng' kayaneet ne po age, neng'wong' ak nenyu.

13 # Poi 19.21 Ak ma mache oegu che mongen, che kitupche, ale, ki amach konyil che chaang' Anyoonjok (ak kigeraanya agoi kora), si kobiit anyoor logoek alak agot eng' okweek, agot ko uu eng' Pororyosyechuun alak ak icheek. 14Aa ne kiyaachei eng' Yunanik ak che ma Yunanik, eng' che utaatiin ak che perber. 15Nooto anyun, ko uu ye amuuchi, ko aa choboot aamwok logoiywek che myach ak okweek che omite Rome.

Kimnateet ne tinyei Logoiywek che Myach

16 # Mar 8.38 Ma lilanjini anyun logoiywek che myach; amu niito ko kimnateetap Kamuktaindet ne koonu yetunet eng' age tugul ne iyani; eng' Yahudyot korook ak eng' Yunanindet agine. 17#Hab 2.4 King'aanyei eng' niito imandap Kamuktaindet kobun kayaneet agoi kayaneet; ko uu ye siraat kole, “Ineendet ne po imanda ko sabei eng' kayaneet.”

18Ki keng'aany nereegegap Kamuktaindet kobun kipsengwet agobo pistoet tugul ak yaityet tugul ne po piik, che kirindoi imanit eng' yaityet; 19amu tuguugap Kamuktaindet che naotin ko taagunotiin eng' icheek; ki kong'aang'ji Kamuktaindet icheek. 20Amu ki keerei komyee tuguukyik che ma taagu kobooch yaetap ng'wony che naoksei eng' tuguuk che yaotin, agot kimnateennyi ne po koigeny ak ineendet iman ko Kamuktaindet; si ma ek icheek che tinyei lotania; Kiguitos ak kotaagu komyee kimnateet ne po koigeny ak piteetap Kamuktaindet che nga ma taagu kobooch yaetap ng'wony, kiguitos ak kotaagu eng' tuguuk che ki yai Ineendet; si ma ek icheek che tinyei lotania; 21#Eph 4.17-18 amu kingo kagonai Kamuktaindet, koma kolas ko uu Kamuktaindet, anan koweekyi kongoi; ago ki perberitu eng' kabwaatutikwak, ak ki imenitu mugulelwekwak che ma tinyei naet. 22Kingo leen kondegei kole utaatiin, koberberitu, 23#NKNg'a 4.16-18 ak kowal toroornatetap Kamuktaindet ne ma ng'emaksei kogergeit ak itoondap chiito ne ng'emaksei, ak ne po toriitik, ak tyong'ik che po keelyek ang'wan, ak tuguuk che ichuutegei.

24Nooto anyun ki pagaakyi Kamuktaindet icheek magutigap mugulelwekwak koosup murwoonindo, si koteweer poorwekwak icheegei eng' icheegei: 25amu ki wal imanitap Kamuktaindet kowale lembeita, ak kolas ak koot kiit ne ki kiyai kosiir Yaindet, ne iberuurot koigeny. Amen.

26Amu niito ki pagaakyi Kamuktaindet icheek maguutik che po teweernateet. Ki wal kobogorisyekwak piteet ne nyolu koek ne ma nyolu. 27Ak ko uu nooto ak icheek murenik, ki pagaakta piteet ne nyolu ne po kobogorisyek, ak kogasegei icheegei mageet ne lalei, koyachingei murenik eng' murenik nooto ne ma nyolu, ak taachei icheegei melekto ne yamegei ak yaityennywa.

28Ak ko uu ye ki eesyo kotebee Kamuktaindet naennywa, kobagakyi Kamuktaindet icheek kabwaatutik che ki kong'emogis, si koyai tuguuchooto che ma nyolu; 29ko nyiitaat tuguuk tugul che ma po iman, sogornateet, kasetap myat, yaityet; nyiitaat ng'etkonda, rumisyet, pooryeet, keniisyet, suryet; chaamik, 30che po chemererosyek, che wechei Kamuktaindet, che kolgoleen, che menotik, che ichougei, taunigap tuguuk che yaacheen, che ma kase iit sigiik, 31che ma tinyei kaguiyet, putigap kayomisutik, che ma tinyei chamyet, che ma tinyei rireenetapkei: 32che nganda ingen ng'atuutyetap Kamuktaindet ne leen, nyoljin meet icheeget che yaei tuguuk che uu chuuto, koma yaei kityo che uu chuuto, ago chamyechin kobooto icheeget che yaei tuguuchuuto.

Currently Selected:

ROMANIK 1: KAPR

Highlight

Copy