KALEWANAIK 14
14
1Teechei koonnyi kwondo age tugul ne utaat,
ago putei ne perber eng' eunekyik.
2Iywei Kamuktaindet ne Toroor `ineendet ne wendote imanda,
ago sasei Kamuktaindet ne Toroor `ineendet ne imaasat eng' ortinwekyik.
3Miitei kutitap ne perber kirokto ne po menoteet,
ago riibei kutusweekwak che utaatiin.
4Tiliil piut ole ma mi tuuga,
ago ibu chaang'indap rurutik `kimnateetap eeik.
5Ma mwaei lembech paoryat ne kiyani,
ago mwaei lembech paoryat ne ma po iman.
6Cheeng'ei chotindet utaatyet ago ma nyooru,
ago nyumnyum naet eng' ineendet ne tinyei kaguiyet.
7Ui ole mi chiito ne perber,
amenyoorchini ineendet ng'olyootap naet.
8Utaatyetap chiito ne ng'oom ko koguiyo ooreennyi,
ago ng'aalseet perberindap che perber.
9Chotei che perber ng'oogisto,
ago mi myeeindo eng' kwenutap che po iman.
10Ingen muguleldo ng'wanindanyi,
ak ma tinyei toondet yamdao ak poiboiyennyi.
11Kigabui kootap kiptengeginik,
ago kiberuuri emaitap ne po iman.
12 # Kale 16.25 Mi ooreet ne leen chiito litit,
ago kagesunennyi ko ooreet ne tokyingei meet.
13Riirei muguleldo agot ngo roryei,
ak kagesunetap poiboiyet ko nyigiisindo.
14Ineendet ne ichuchuchegei eng' imanda kobiyonyi ortinwekyik,
ak che myach eng' muguleldo ko nyooru che nyoljin.
15Ne abusat koyani ng'olyoo age tugul,
ago ne ng'oom ko keerei komyee ole wendi.
16Iyweisyei chiito ne utaat ak koistoegei yaityet,
ago nereechi ne perber ak komeenei.
17Ineendet ne sip konereechi koyaei tuguuk eng' perberyo,
ak kiwechei chiito ne tinyei chobutik che yaacheen.
18Perperyo ko poroteetap che abusotiin,
ago ki laakyin che ng'oomen chepkuletap naet.
19Ing'uruuksei che yaacheen eng' taitap che myachen,
kong'uruuksei kiptengeginik eng' ormariichogap che po iman.
20Kiwechei kibananiat, wechei agot chiitap kokwennyi,
ago tinyei mogoryot choronok che chaang'.
21Yaei tengekto chiito ne sasei chiitap kokwennyi,
ago paibai ne riiree kibananook.
22Tos ma yaei chalwok piik che chobei yaityet?
Ago nyooru rireenet ak imanda che chobei myeeindo.
23Tinyei kelunet poisyet age tugul,
ago ibu pananda ng'aleek icheegei.
24Chepkuletap che utaatiin ko mogornatosyekwak,
ago perberindap che perber ko perberyo kityo.
25Saru saboonwek paoryat ne po iman,
ago ineendet ne mwaei lembech ko ng'wektoindet.
26Mi kamang'unet ne kiim eng' kaiyweisyet ne kiywei Kamuktaindet ne Toroor,
ak nyooru lagokyik ole mwechin.
27Kaiyweisyet ne kiywei Kamuktaindet ne Toroor ko kondametutap peegap saboon,
si keistoegei mestonogap meet.
28Toroornatetap laitoryat ko chaang'indap piikyik,
ago ng'emisyetap pounindet ko ng'ering'indap piik.
29Tinyei kaguiyet ne oo ineendet ne masartae nereek,
ago tesei perberyo ineendet ne sip konereechi.
30Saboondap poorto muguleldo ne tinyei chametapkei,
ago nunatetap kawek ng'etkonda.
31Iteweeri Yaindennyi ne usei kibananiat,
ago konyiti Yaindennyi `ineendet ne riiree ne ma tinyei kiy.
32Ki wiirchin ng'wony kiptengekyot amu poisyonikyik che yaach,
ago tinyei kamang'unet ne po iman eng' meennyi.
33Tebee utaatyet muguleldap ineendet ne tinyei kaguiyet,
ago king'aanyei che mi mugulelwegap che perber.
34Itoroori imanda poror,
ago iteweeri tengekto poror age tugul.
35Chamei laitoryat otwogindet ne poisyei eng' ng'omnateet,
ago nereekyik ko ityin ineendet ne ibu kalilanet.
Currently Selected:
KALEWANAIK 14: KAPR
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019
