KALEWANAIK 13
13
1Epchin iit weeriit ne utaat katigonetap kwandanyi,
ago ma kasei kereetap kong' chotindet.
2Amei chiito ne myee eng' logoegap kutinnyi,
ago amei koroomnateet saboondo ne yaei kaberberisyet.
3Riibei saboondanyi ne riibei kutinnyi,
ago nyooru ng'emisyet ne yaatei kutinnyi miising'.
4Tinyei mageet saboondap ne choriren, ak ma nyooru kiy,
ago nerei saboondap ne igiilegei.
5Wechei chiito ne po iman lembechek,
ago samisitu chiito ne ya ak konyooru teweernateet.
6Imanda koriibei ineendet ne litit eng' ooreet,
ago igabui yaityet kiptengekyot.
7Mi ne yaegei koek mogoryo, ago ma tinyei kiy,
ak mi ne yaegei koek kibanania, ago tinyei mogornateet ne oo.
8Kityage saboondap chii mogornatosyekyik,
ago ma kasei kibananook kamuiset.
9Iluu miising' lapkeiyetap che po iman,
ago kimisi taitap kiptengeginik.
10Ibu `menoteet pooryeet kityo,
ago mi utaatyet kobooto icheek che ng'ategei.
11Ichuchugaksei mogornateet ne ki kinyooru eng' menoteet,
ago tesoksei che po chiito ne iyumi ko tutigin.
12Myani muguleldo eng' kamang'unet ne igaegei,
ago ye isulda ma konato koek keetitap saboondo.
13Age tugul ne sasei ng'olyoot koipchingei ng'emisyet,
ago kigoochin melekto chiito ne iywei kayomiset.
14Kondametutap saboon kaneetutigap che utaatiin,
imuktachin chii koistoegei mestonogap meet.
15Ibu chameet naet ne myee,
ago uui ooreetap kaberberik.
16Poisyee naet chiito age tugul ne ng'oom:
ago iseeri ne perber perberyo.
17Ibu kaimutyet kayooktoindo ne ya,
ago egu chametapkei tononjinindet ne kiyani.
18Nyooru pananda ak teweernateet ineendet ne eesyoi katigonet,
ago nyooru teegisto ineendet ne epchin iit kereetap kong'.
19Anyiny eng' saboondo mageet ne isuldaat,
ago wechei che perber ngo istoegei yaitwogik.
20Obendate ak piik che utaatiin asi iegu ne utaat,
ago nyooru nyalilda chiito ne pendoti ak che perber.
21Isubi `yaityet kiptengeginik,
ago kigeerchin che po iman myeeindo.
22Pagaakyin `chiito ne myee tuguukyik mochogoronikyik,
ak kigonorchin chiitap iman mogornateetap kiptengekyot.
23Mi amitwogik che chaang' eng' kabatisyetap kibananook,
ago mi ne keng'emei amu ma mi imanda.
24Wechei weeriinnyi ne ma pirei,
ago ineendet ne chamei weeriinnyi kotigoni ko uu ye nyolu.
25Amei ne po iman kot kobiyo saboondanyi;
ago ma nyooru kiptengeginik che yamei.
Currently Selected:
KALEWANAIK 13: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
