KIRWOOGIK 21

Kesaru Benjaminik koma ininda

1Kiga koyasyo piigap Israel eng' Mispa, kole, “Ma igoochin chii eng' acheek cheptonyi Benjamin kotun.” 2Ki pwa piik Bethel ak kotep ng'wony eng' yooto eng' taitap Kamuktaindet kot koit koskoleny, ak kowaach, ak koriiryo ne ng'waan. 3Ak kole, “Ee, Kamuktaindet ne Toroor, Kamuktaindetap Israel, amu nee si kobiit kii eng' Israel, kot koma komi rani ooreet age eng' Israel?” 4Ak ki eng' mutai kong'eetyo piik kota ko karon, ak koteech kaptisisyet eng' yooto, ak kogoito kagoochinoik che kibeelei ak kagoochinoigap kaalyeet. 5Ki le piigap Israel, “Mi ng'oo eng' ortinwek tugul che po Israel ne ma nyo kotogos tuiyet ole mi Kamuktaindet ne Toroor?” Amu kiga yai kayasyoet ne oo agobo ineendet ne ma nyo kotogos ole mi Kamuktaindet ne Toroor eng' Mispa, kole, “Kibarei ineendet iman.” 6Ago ki sich riirge piigap Israel agobo Benjamin tupchennywa, ak ki mwa kole, “Mi ooreet agenge ne kagobet ra eng' Israel. 7Kiyae nee si konyoor osotik icheek che kong'et, amu ki kiyasye eng' Kamuktaindet ne Toroor keele ma kigoochini icheek tiibiikyok kotun?” 8Ak ki le icheek, “Ng'oo ne po ortinwek eng' Israel ne ma nyo kotogos ole mi Kamuktaindet ne Toroor eng' Mispa?” Ak ogeero, Ki ma nyo chii agot agenge nganaseet ne ki punu Jabes-gilead konyo tuiyet. 9Amu ye kingo kagiit piik, ogeero, ki ma komi chii eng' piik che ki menyei Jabes-gilead. 10Ara ki iyookto `tuiyet piik eliphuusyek taman ak aeng' che po che nyigoonen eng' tugul, ak kong'at icheek koleenji, “Oba obar eng' rotwetap chok piik che menyei Jabes-gilead, kobooto kwonyiik ak lagok. 11Kiit ne obendi oyae ko ni; obare ogesu muren age tugul ak kwony age tugul ne ki koruiyo ak muren.” 12Ki nyoor eng' piik che ki menyei Jabes-gilead pergeinik pogol ang'wan che neranik, che ki tomo konai muren, ak ki imut icheek kobwa nganaseet eng' Shiloh, ne mi emetap Kanaan.

13Ki iyookto tuiyet komugul piik koba kong'alaalji lagogap Benjamin che ki mi rwandetap Rimon oriit, ak komwachi icheek kaalyeet. 14Ki week Benjamin eng' peetuusyechooto; ak ki igoochi icheek kwonyiik che ki sar kosapcho eng' che po kwonyiigap Jabes-gilead; ago ki ma yam icheek. 15Ki aragenso piik agobo Benjamin amu ki koyai Kamuktaindet ne Toroor koyaatak oldo age eng' ortinwegap Israel.

16Ki le anyun poisyegap tuiyet, “Ki yai nee si konyoor osotik icheek che kong'et, amu ki kibar kwonyiik eng' Benjamin?” 17Ak ki le icheek, “Ne matiny konyolu kobiit poroteet eng' icheek che kichililso che po Benjamin, si ma pet ooreet age eng' Israel. 18Ago ma kimuuchi kigoochi icheek osotik eng' tiibiikyok.” Amu kiga koyasyo piigap Israel, kole, “Chuboot ne igoochin osotyot Benjamin.” 19Ak ki le icheek, “Ogeero, miitei igoortap Kamuktaindet ne Toroor eng' kenyiit age tugul eng' Shiloh, ne miitei murot kaataam ne po Bethel, eng' komostap kong'asiis ne po ooreet ne oo ne togostoi eng' Bethel kowendi Shekem, ak eng' murot tai ne po Lebanon.” 20Ak ki ng'at lagogap Benjamin, koleenji, “Oba, oribisye eng' mbareenigap sabibuk, 21ak ogeer, ngot komong' tiibiigap Shiloh kobwa kourerenso eng' ureryosyek, omong'u anyun eng' mbareenigap sabibuk, konam chii tugul osotyonnyi eng' tiibiigap Shiloh, kobwa emetap Benjamin. 22Ak ye pwa kwanisyekwak anan ko tupchosyekwak koboljech, keleenji anyun, ‘Ogoonech icheek eng' myeeindo, amu ma kimutu chii tugul eng' acheek osotyonnyi eng' pooryeet, ama ogoochi okweek icheek. Amu nda ki koyai ko uu nooto, ta otinye tengekto.’ ” 23Ki yai ko uu nooto lagogap Benjamin, ak ki imutyigei osotik, che tee koiitennywa, eng' che kiuerendos che ki imut. Ki pa koweektagei ole kimi porotennywa, ak ki teech nganasook ak komeny. 24Ki pa piigap Israel eng' peetuusyechooto, kwo chii tugul pororyennyi ak ole kimi ooreennyi, kimanda eng' yooto chii tugul kwo ole mi porotennyi. 25#Kirw 17.6 Ki ma komi laitoryat Israel eng' peetuusyechooto. Kiyaei chii tugul ko uu ye kigeerei kole myee.

Currently Selected:

KIRWOOGIK 21: KAPR

Highlight

Copy

Compare