KIRWOOGIK 20

Kebarei Benjaminik

1Ki manda anyun piigap Israel tugul, kobooch Dan agoi Beer-sheba, kobooto emetap Gilead, ak ki iyumgei tuiyet koigei chiichak, ki iyumgei eng' taitap Kamuktaindet ne Toroor eng' Mispa. 2Ki iyomechigei tuiyet taitap Kamuktaindet, kirwoogik tugul che punu pororyosyek tugul che po Israel, piik eliphuusyek pogol ang'wan che punei keelyek, che tinyei rotoogap chok. 3(Ki kas anyun lagogap Benjamin kole kagotogosta piigap Israel koba Mispa.) Ak ki le piigap Israel, “Omwaiwech, ki piitunda ano tengegi?” 4Ak ki wol Lawindet manong'otyotap kwonyooto ki kibarei kole, “Ki anyoo Gibea ne po Benjamin, anee ak chebaigeiyandennyu ale keru yooto. 5Ki ng'eetyo piigap Gibea kobwa koyiem koot ne ki ami kemoi. Ki machei kole kobara aneendet, ak kisuup chebaigeiyandennyu agoi kome. 6Ki anam chebaigeiyandennyu ak aton, ak ayookte keip koba emet tugul ne poroteetap Israel, amu ki koyai tengekto ak abusnateet eng' Israel. 7Ogeero, okweek piigap Israel, okweek tugul, omwa, ak orwooch kiit ne nyolu.”

8Ki ng'eetyo piik tugul koigei chiichak kole, “Ma wendi koweechigei chii age tugul eng' acheek emainnyi, anan koonnyi. 9Ago nguno ko ni kiit ne keyachini Gibea: kitogostoi kebendi yooto eng' seretap parbareek. 10Kinemu murenik taman eng' pogolut age tugul eng' pororyosyek tugul che po Israel, pogolut eng' eliphuut age tugul ak kinemu eliphuut eng' eliphuusyek taman, koba koipchi piik amitwogik, si ye iit Gibea ne po Benjamin koyai ko uu abusnateet tugul ne ki yai icheek eng' Israel.” 11Koyumjigei anyun tugul che po Israel nganasanooto, konamgei icheek koek agenge.

12Ki iyookto `ortinwegap Israel piik koba komoswek tugul eng' ooreetap Benjamin, kole, “Nee tengegi kogobiit eng' kwenung'wong'? 13Omong'u anyun pichooto yaacheen, weeriigap Belial, che mi Gibea, si kobiit kebar ak keiste yaityet eng' Israel.” Ago ma cham Benjamin kogas ng'aleegap tupchosyekwak piigap Israel. 14Ki iyumgei lagogap Benjamin che ki mang'une nganasook, koyumjigei Gibea ak koba kobargei ak piigap Israel. 15Ki kiit lagogap Benjamin peetuunooto che ki mang'une nganasook, koek murenik eliphuusyek tiptem ak lo che tinyei rotoogap chok, ama ki itito piik che ki menyei Gibea, che ki ek murenik pogol tisap che ki kilewen. 16Eng' kwenutap pichuuto tugul che ki kilewen ko ki mi murenik pogolwogik tisabu che po kaataam, che ki imuuchi age tugul kowiirtae porowet koita kowiir sumeiyot, ama ichilili. 17Ki ek murenigap Israel tugul che po lugeet eliphuusyek pogol ang'wan che ki kiit ama pooto Benjamin. Chuuto tugul ko ki murenigap lugeet.

18Ki ng'eetyo piigap Israel kotogosta Bethel, ole kiteebe Kamuktaindet kiit ne kanyool koyai. Ak ki le, “Ng'oo ne sip kotogostoi koba kobargei ak lagogap Benjamin?” Ak ki le Kamuktaindet ne Toroor, “Judah ne indoi.” 19Ki ng'eetyo anyun piigap Israel karon, ak koteech ye tokyingei Gibea. 20Ki manda piigap Israel kobargei ak Benjamin, ak kitet lugeet kotokyigei icheek eng' Gibea. 21Ki mong' lagogap Benjamin eng' Gibea ak ki par eng' peetuunooto murenik eliphuusyek tiptem ak aeng' kobutyi ng'wony che po Yahudik. 22Ki igimitkei piik, murenigap Israel, ak kotet lugeet kogeny eng' yu ki paregei eng' tai. 23(Ki togosta piigap Israel koba koriiryo eng' taitap Kamuktaindet ne Toroor agoi koskoleny, ak ki teebe `icheek Kamuktaindet ne Toroor kole, “Awe kogeny ayai lugeet ak lagogap Benjamin tupchennyu?” Ak ki le Kamuktaindet ne Toroor, “Togoste obargei ak ineendet.”)

24Ki riikyi `piigap Israel lagogap Benjamin eng' peetuut ne po aeng'. 25Ki manda Benjamin eng' Gibea ak kobargei ak icheek eng' peetuut ne po aeng', ak ki par kogeny murenik eliphuusyek taman ak sisiit kobutyi ng'wony; ki tinyei chuuto tugul rotoogap chok. 26Yeityo kotogosta lagok tugul che po Israel, ak piik tugul agoi koit Bethel. Ki riiryo, ak kotebi ng'wony eng' taitap Kamuktaindet ne Toroor, ak korugutkei peetuunooto agoi koskoleny, ak ki igoito kagoochinoik che kibeelei ak kagoochinoigap kaalyeet eng' taitap Kamuktaindet ne Toroor. 27Ak kiteebe `piigap Israel Kamuktaindet ne Toroor, (amu ki mi olooto moingetap arorutyetap Kamuktaindet eng' peetuusyechooto, 28ak kitonone taitap moingonooto Phineas, weeriitap Eleazar, weeriitap Aron, eng' peetuusyechooto,) koleenji, “Ta awe kogeny kebarge ak lagogap Benjamin tupchennyu, anan atebi?” Ak ki le Kamuktaindet ne Toroor, “Togoste, amu andoi ineendet eung'ung' mutai.”

29Ara ki inde Israel piik che ribistos koyiem Gibea koriip. 30Ki togosta Israel koba kobargei ak lagogap Benjamin eng' peetuut ne po somok, ak kotetkei kobargei ak Gibea ko uu peetuusyechuun alak. 31Ki manda lagogap Benjamin kobookyi pichooto, ak ki kireto koba ole loo eng' nganaseet. Ki toi kowiir ak kobar eng' pichooto ko uu peetuusyechuun alak, olo po piik sosom che po Israel, eng' ortinwek che eecheen. Kiwendi age Bethel, kowendi age Gibea, eng' mbareenik. 32Ki mwa lagogap Benjamin kole, “Kagibar eng' tainnyo ko uu eng' tai.” Ago ki le piigap Israel, “Ongemwee, ak kirete koba eng' nganaseet koba ortinwek che eecheen.” 33Ki ng'eetyo piik tugul che po Israel eng' komostanywa ak koba kotetkei eng' Baal-tamar. Ki mong' eng' komostanywa piik che kiribistos che po Israel, eng' Maaregeba. 34Ki pwa kobargei ak Gibea, murenik eliphuusyek tamanu che ki kilewen eng' Israel tugul, ak king'wanit pooryeet. Ago ki ma nai kole neegit yaityet eng' icheek. 35Ki par `Kamuktaindet ne Toroor Benjamin eng' taitap Israel. Ki par piigap Israel eng' peetuunooto murenik eliphuusyek tiptem ak muut ak pogol che po Benjamin. Ki tinyei chuuto tugul rotoogap chok. 36Ki keer lagogap Benjamin anyun kole kagebar. Amu ki istochigei piigap Israel Benjamin, amu ki imang'u piik che kiribistos koriipsei, che kiga konde icheek koriip Gibea. 37Kichaakta piik che karibistos korwai Gibea. Ki iseergei pichooto, ak kobar nganaseet tugul eng' rotwetap chok. 38Ki mi kaboorunet ne kiga kichop eng' kwenutap piigap Israel ak piik che kiribistos keele konaam iyeto ne oo kotogosta eng' nganaseet, 39ko nyolu koweek anyun murenigap Israel eng' pooryeet. Ki toi Benjamin kowiir ak kobar murenigap Israel olo po piik sosom, amu ki le “Kagibar iman, ko uu eng' pooryeet ne po tai.” 40Ago kingo toi kotogosta iyeto ne uu toloita eng' nganaseet, kogeer let Benjamin, ak ogeero, ki togostoi maat eng' nganaseet kowendi parak. 41Ki week anyun piigap Israel ak ki kwong'yo piigap Benjamin, amu ki keer kole kanyonji yaityet. 42Ki mweiso anyun icheek eng' taitap piigap Israel kotuktoochi patai, koba ooreetap surkwen, ago ki kibarat icheek; ak ki par pichooto eng' kwenunnywa piik che ki mang'une nganasook. 43Ki yiem `icheek Benjaminik konde kween, ki oon ak kotyegaat eng' ole imuung'ee kot koit ole tokyingei Gibea ole charunee asiista. 44Ki pek piik eliphuusyek tamanu ak sisiit che po Benjamin, chuuto tugul ko ki murenik che nyigoonen. 45Ki week ak komweiso kotokyigei surkwen kot koit rwandetap Rimon. Ak kikweat piik eliphuusyek muut eng' icheek, eng' ortinwek che eecheen. Ki oon kot koit Gidom ak ki par piik eliphuusyek aeng' eng' icheek. 46Ki pek anyun eng' peetuunooto piik eliphuusyek tiptemu ak muut che po Benjamin che ki tinyei rotoogap chok, chuuto tugul ko ki murenik che nyigoonen. 47Ago ki week piik pogolwogik lo, komwei kotokyigei surkwen kot koit rwandetap Rimon, ki meny rwandetap Rimon oriit arawek ang'wan. 48Ki weekyigei kogeny piigap Israel lagogap Benjamin ak kobar eng' rotwetap chok, nganaseet komugul, tuuga ak tugul che kinyoor. Ak ki peel kogeny nganasook tugul che kinyoor.

Currently Selected:

KIRWOOGIK 20: KAPR

Highlight

Copy

Compare