KIRWOOGIK 18
18
Kocheeng'ei piigap Dan poroteet
1Ki ma komi laitoryat Israel peetuusyechooto. Ak eng' peetuusyechooto ko ki cheeng'jigei pororyetap Danik ole menyei; amu agoi peetuusyechooto ko kitom konyoor porotennywa eng' ortinwegap Israel. 2Ki iyookto `lagogap Dan piik muut eng' ooreenywa, che kibunu koiitennywa tugul, che nyigoonen, che ki punu Sora ak Estaol, koba kosegei emet komarar. Ak ki leenji, “Oba, omarar emet.” Ak ki it emetap tuloonook ne po Ephraim, agoi kootap Mikah, ak kiruiyo yooto. 3Kingo mi ye neegitee kootap Mikah, konai kutitap murenonooto Lawindet. Kimasta koba yooto ak koleenji, “Ki imutun ng'oo inyoo yu? Iyae nee eng' oli? Itinye nee eng' yu?” 4Ki leenji `ineendet icheek, “Ki koyaiywo Mikah ko uu ni ak ni, ki koono ayachi poisyet, ak ki aegu tisiindennyi.” 5Ki leenji `icheek ineendet, “Kisoomin keele, teebwech ng'omnateet eng' Kamuktaindet, si kobiit kenai ngo mi kaberuret eng' pandanyo.” 6Ki leenji tisiindonooto icheek, “Oba eng' kaalyeet. Miitei taitap Kamuktaindet ne Toroor ooreet ne obune.”
7Ki pa anyun pichooto muutu, agoi koit Lais. Ki keer piik che ki mi yooto, kole meng'iisyei eng' kaalyeet, ko uu piteetap Sidonik, kosistos ak kotebyei eng' kaalyeet. Amu ki ma komi chii eng' emet ne ki nenyi pounateet, ne ki imuuchi koger kong' eng' kiy tugul, ak ki looen eng' Sidonik ak ki ma koting'egei kiy ak chii age tugul.
8Yeityo kobwa ole mi tupchosyekwak eng' Sora ak Estaol. Ki mwachi icheek tupchosyekwak koleenji, “Otinye ng'al nee?” 9Ak ki le, “Ong'eetyee keebe kebarge ak icheek, amu kogegeer emet, ak karaaran miising'. Ta osiistosi? Amochorirense, ago oba ochut emet ak onam. 10Ye oit olooto, onyooru piik che mi eng' kaalyeet, ak oo emet. Ki konde Kamuktaindet eung'wong' emonooto; ole ma mi kiy ne rartaat eng' kiy age tugul ne mi ng'wony.”
11Ki pa anyun eng' olooto piik pogolusyek lo, che ilaachi kariik, che po ooreetap Danik, eng' Sora ak eng' Estaol. 12Ki togosta icheek ak koteech Kiriath-Jearim, eng' Judah. Nooto anyun ne mi Kiriath-Jearim patai kogiguure icheek Maanedan agoi ra. 13Ki pun yooto kot koit emetap tuloonook ne po Ephraim, agoi koit kootap Mikah.
14Yeityo kowol pichooto muutu che ki pa kosegei emetap Lais, ak koleenji tupchosyekwak, “Ongen okweek ole miitei koorchu ephod, terapik, ak kanamwet ne ki kiwai, ak ne ki kitaany? Obwaat anyun nguno kiit ne kanyool oyai.” 15Ara ki wo yooto, ak ki it kootap murenonooto Lawindet, nooto kootap Mikah, ak kiteebe ineendet agobo chamennyi pogei. 16Kitononso eng' ye neegitee ye kibunei eng' ormariich pichooto pogolusyek lo che ki po lagogap Dan, kolaachi kariik. 17Ki togosta murenjoto muutu che kigaba kosegei emet, ak ki pa ko eng' olooto, ak ki ip kanamwonooto ki kiwai, ephod, terapik ak kanamwonooto ki kitaany. Ki tonon tisiindet eng' ye neegitee ye kibunei eng' ormariich kobooto pichooto pogolusyek lo kolaachi kariik. 18Kingo kagoba pichuuto kootap Mikah ak koip kanamwet ne ki kiwai, ephod, terapik ak kanamwet ne ki kitaany, komwachi tisiindet koleenji, “Oyae nee?” 19Ki leenji `icheek ineendet, “Siis, kere kutit eung'ung', ak inyoo keebe tugul, ak iegu kwandanyo ak tisiindet. Tos myee eng' inyee iegu tisiindetap kootap chiito agenge, anan iegu tisiindetap pororyet ak ooreet eng' Israel?” 20Ki paibait muguleldap tisiindonooto, ak ki ip ephod, terapik ak kanamwonooto ki kiwai, ak kwo kwenutap piik.
21Ki week anyun icheek, ak kigany kondo lagok ak tuuga ak tuguuk. 22Kingo kagoba ole machei ko loo kitigin eng' kootap Mikah, koyumgei murenik che ki mi kooriik che neegitee kootap Mikah, ak koon lagogap Dan. 23Ak kiwaage `icheek lagogap Dan. Ak kiguskong' ak koleenji Mikah, “Kaamin nee, kot inyoo kobooto pichu tee chu?”
24Ak ki wol kole, “Kaorep kanamonikyuk che ki ayai, ak koomut tisiindet ak kaobe. Ta atinye nee anyun? Ara omwaiwo eng' nee ole ‘Amin nee?’ ” 25Ak ki leenji `lagogap Dan ineendet, “Amengegas kuting'ung' eng' kwenunnyo, si ma parin piik che nereektos, ak ibeet saboondang'ung', kobooto saboonwegap piigap koong'ung'.” 26Ak ki pa anyun lagogap Dan. Kingo keer Mikah kole kiimeen eng' ineendet, koweek kwo kaa.
27Ki ip tuguuchooto kiyaei Mikah, ak komut tisiindet ne ki tinyei ak ki pa koit Lais, agoi ole mi piik che kisistos ak kotebyei eng' kaalyeet, ak ki par eng' rotwetap chok, ak ki peel nganaseet. 28Ki ma piit saruunindet, amu ki loo eng' Sidon ak ki ma koting'egei kiy ak chii age tugul. Ki mi nganasanooto atebweet ne neegitee Beth-rehob. Ki teech nganaseet ak komeny olooto. 29Kiguure icheek nganasanooto Dan, komwaitae Dan kwandanywa, ne kiga kisikyi Israel. Ago ki kainetap nganasanooto eng' tai ko ki Lais. 30Kilumdochigei `lagogap Dan kanamwet ne ki kiwai kotonon. Ki ek tisiigap pororyetap Danik, Jonathan weeriitap Gershom, weeriitap Musa, ineendet ak weeriikyik agoi peetuut ne ki kiluule emet. 31Ki lumda anyun kotonon kanamwet ne ki kiwai ne po Mikah ne kiyaei ineendet, eng' peetuusyek tugul ye ki mi kootap Kamuktaindet Shiloh.
Currently Selected:
KIRWOOGIK 18: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
