KIRWOOGIK 17
17
Mikah ak kanamwennyi
1Ki mi chiito age ne po emetap tuloonoogap Ephraim, ne ki kiguure kainennyi Mikah. 2Ki leenji kamennyi, “Atinye robiinik eliphuut agenge ak pogol agenge che ki kiibenen ak ki ichubisye agobo chooto agase eng' itiikyuk, keero, atinye anee ne ki aip.” Ak ki le kamennyi, “Iberuurot weeriinnyu eng' Kamuktaindet ne Toroor.” 3Ki weekyi kamennyi fedhaisyechooto eliphuut agenge ak pogol, ak ki le kamet, “Katabaanji iman Kamuktaindet ne Toroor silingisyechu eng' eunnyu agobo weeriinnyu, si kobiit koyae kanamwet ne kiwaei ak kanamwet ne kitaanyi. Kaweegun anyun amu nooto.” 4Ak ye ki weekyi kamennyi fedhaisyechooto, konam kamet pogol aeng' ak kogoochi kitang'indet ne ki yai kanamwet ne kiwaei ak ne kitaanyi eng' fedhaisyechooto, ak ki tebee tuguuchooto kootap Mikah. 5Ki tinyei chiichito kiguure Mikah kootap kanamonik, ak ki yai ephod ak terapik, ak ki itabaan age eng' weeriikyik, koek tisiindennyi. 6#Kirw 21.25 Ki ma komi peetuusyechooto laitoryat eng' Israel. Kiyaei chii tugul ko uu ye keerei eng' konyekyik kole myee.
7Ki mi mureno age ne ki punu Beth-lehem-juda, ne po ooreetap Judah, ne ki Lawindet, ak ki meny olooto koek toondet. 8Ak ki wo chiichooto eng' nganasanooto, eng' Beth-lehem-juda, kwo kotebee ole kanyoorchi oldo koek toondet. Ki it emetap tuloonoogap Ephraim kootap Mikah, eng' pandanyi. 9Ki leenji Mikah, “Ibunu ano?” Kowol kole, “Aa Lawindet ne po Beth-lehem-juda, awendi ko aa toondet acheeng'oti ole amenye.” 10Ak ki leenji Mikah ineendet, “Ngemeny tuwai, si iegu kwanda eng' anee ak ko tisiindet, ak agoonin fedhaisyek taman eng' kenyiit, ngoroik ak amitwogiguk.” Kwo ko anyun Lawindet. 11Ki cham Lawindet anyun komeny ak chiichooto, ak ki igei murenonooto age eng' weeriikyik. 12Ki itabaan anyun `Mikah Lawindonooto koek tisiindennyi ak ki tebee kootap Mikah. 13Kole anyun Mikah, “Angen nguno ale yaiywo Kamuktaindet ne Toroor ne myee, amu atinye Lawindet ne tisiindennyu.”
Currently Selected:
KIRWOOGIK 17: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
