ISAIAH 2
2
Zion Tulweetap Kamuktaindet ne Toroor.
1Ng'olyootap Isaiah weeriitap Amos, ne ki keer agobo Judah ak Jerusalem.
2Kimitu eng' peetuusyek che po let,
tulweetap kootap Kamuktaindet ne Toroor eng' tuloonook parak,
ak kitoroori kosiir tuloonook che mengeechen;
ak tuun pwaanjin olooto pororyosyek tugul.
3Tuun itendenjin olooto piik che chaang' koleen,
“Obwa, keebe ketogoste tulweetap Kamuktaindet ne Toroor,
agoi kootap Kamuktaindetap Jakobo;
si koneetech ortinwekyik,
si kebendatee ortinwekyik.”
Amu mang'une ng'atuutik Zion,
ak komang'une ng'olyootap Kamuktaindet ne Toroor Jerusalem.
4 # Joel 3.10; Mik 4.3 Ak korwooksechin `ineendet pororyosyek,
ak koger kong' piik che chaang'.
Ak kotany rotonikwak po chok koek mogomboik che po tuuga,
ak kotany ng'otwekwak koek chepkesok;
si ma kobaregei pororyosyek,
ama koneetegei lugeet kogeny.
5Ee kootap Jakobo,
obwa kebendatee lapkeiyetap Kamuktaindet ne Toroor.
6Amu ki ibagaakte piiguk, kootap Jakobo,
amu kigonyi icheek pitonwegap kong'asiis,
ak ki koek icheek chepsogeinik ko uu Philistiik,
ak konamgei eunek koyasyechigei ak lagogap toek.
7Nyiitaat emennywa kogeny fedha ak thahabu,
ama mi ole igeesunegei konoraikwak.
Nyiitaat emennywa kogeny paraisisyek,
ama mi ole igeesunegei kariisyekwak.
8Nyiitaat emennywa kogeny kanamonik;
ilasu poisyonigap eunekwak,
che kiyaei eunekwak.
9Ing'uruuksei chiito ne nyeraat,
ak kiming'ini chiito ne oo,
ko uu nooto anyun amenyochi kaat icheek.
10 # Ng'a 6.15; 2Thes 1.9 Chut rwandet,
ak iung'egei temburyek,
imwee kamuisetap Kamuktaindet ne Toroor,
ak eng' toroornatetap etunatennyi.
11Kinyeroti che ieetegei,
ak kiming'ini menoteetap piik,
Kamuktaindet ne Toroor ineegei ne tororitu eng' peetuunooto.
12Amu tuun piitu peetuutap Kamuktaindet ne Toroor ne po lugoosyek,
eng' icheek tugul che mendos ak che ieetigei;
ak eng' icheek tugul che itoroorigei,
ak kiming'ini tugul;
13eng' taragonik tugul che po Lebanon,
che torooreen ak koeetigei,
ak eng' keetiik tugul che po Bashan;
14ak eng' tuloonook tugul che kooen,
ak eng' tuloonook tugul che kitororitu;
15ak eng' teekseet age tugul ne kooi,
ak eng' irimeet age tugul ne ng'ootaat;
16eng' melisyek tugul che po Tarsis,
ak eng' itoonwek tugul che ki chamei.
17Kiming'ini kaeetetapkei ne po chiito,
ak kinyeroti menoteetap piik;
Kamuktaindet ne Toroor ineegei ne tororitu peetuunooto.
18Ak igeesugei kanamonik.
19Ak komwechi piik kebenonik che mi rwandosyek,
ak keriingonik che mi ng'wony,
komwee kamuisetap Kamuktaindet ne Toroor,
ak eng' toroornatetap etunatennyi,
ye kang'eet kotumdum ng'wonyuni eng' kimnateet.
20Eng' peetuunooto ko laktoi chiito kanamonikyik che po fedha,
kolaktoochi pung'ung'onik ak reresik
ak kanamonikyik che po thahabu,
che ki kiyachi ineendet si kosa,
21si komwechi kebenonik,
ak rwandosyek che kibetogis,
komwee kamuisetap Kamuktaindet ne Toroor,
ak eng' toroornatetap etunatennyi,
ye kang'eet kotumdum ng'wonyuni eng' kimnateet.
22Amomang'u chii,
ne tinyei kabuuset.
Amu tilei nee?
Currently Selected:
ISAIAH 2: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
