AMDOINDET 12

1Ibwaat kogeny Yaindeng'ung' eng' peetuusyegap ming'inateng'ung',

kotom koit peetuusyek che yaach ak koriik kenyiisyek che imwae ile,

“Ma paibaitune chuuto,”

2kotom koimenit asiista anan lapkeiyet anan arawet,

anan kecheik ak koweek poolik ye kagorobon;

3eng' peetuut ye tuun potanso riibiigap koot

ak kong'uruugis che kiimeen

ak kosiisyo che ng'aisei amu ng'ering'

ak koimenitu che ititoi eng' tirisyok.

4Ye kageger kurgotik eng' ooreet,

ye ma kegasei ng'aiset

ak kong'eet chiito eng' kateetap toriityon

ak koming'in tiibiik tugul che po tyenwogik.

5Ye iywei chii kobun toroorinwek

ak kobiit kamuiset eng' ooreet,

ak koiyesyo taaptogap keetit ne kiguure almond

ak konyigiisit talamwet ak kobet mageet.

Amu wendi chiito koonnyi ne po koigeny

ak kobendat che riiryoti eng' ortinwek;

6kotom kitaach porowetap fedha

anan kotom ketui tereetap thahabu

anan kotom koiye tereet eng' kondametut

anan kotom koil tireet eng' ole kisiile peek,

7ak koweekyigei ng'ung'unyek ng'wony ko uu ye kinye,

ak koweekyigei saboondo Kamuktaindet ne ki koonu. 8Mwaei anyun Amdoindet kole: Puch tugul, ma tilei kiy! Puch tugul.

Ng'aleek che kigeesune

9Ago, amu ki utaat Amdoindet, kita koneeti piik naet; ko ki ibwaat, kocheeng' ak kotet kalewenaik che chaang'. 10Ki cheeng' Amdoindet ng'aleek che taachaksei ak chooto che ki kisir eng' lititindo ng'aleek che po iman.

11Uu kiplitok ng'aleegap piik che utaatiin ak uu kipchumarisyek che ki kigiich komyee, ng'aleegap kaneetigap tuiyosyek, che ki kigon kobun mestowot agenge. 12Kas anyun weeriinnyu kateunet. Ma mi ole igeesunegei sireetap bukuisyek che chaang'. Ak ng'etei poorto eng' somanutik che chaang'.

13Ara nguno ko kagogasak tugul, ni anyun ko kagesunetap tuguuchu: Iywei Kamuktaindet ak iriip ng'atuutikyik, amu nyoljin chiito poisyoniito tugul. 14Amu ipchin Kamuktaindet poisyet age tugul kapkirwooget, kobooto kiit age tugul ne ung'aat, ngo kiy ne myee anan ngo ne ya.

Currently Selected:

AMDOINDET 12: KAPR

Highlight

Copy

Compare