AMDOINDET 11

Atebeet ne koonu kaberuret

1Wiirchi amitwogiguk peek#11.1 Wiirchi amitwogiguk peek: Kergei niito ak ye kagimwa keele yai poisyetap mung'aaret asi inyooru keljiin eng' peetuusyegap let.;

amu tuun inyooru ko kagosiirto peetuusyek che chaang'.

2Pchechii kebeberta piik tisap, ee agot piik sisiit;

amu mengen yaityet ne piitu eng' ng'wony.

3Ngo nyi peek poolik, koroong'jigei ng'wony,

ak ngo luulji keetit murot tai anan ko murot kaataam,

ko komosta ne kaluulji, kotebee yooto.

4Ma kolsei ineendet ne riibei usoonet;

ama kesei ineendet ne keerei poolik.

5Ko uu ye mengen ooreetap usoonet anan ole nertoi kawegap lakweet eng' moetap ineendet ne managaat; uu nooto mengen poisyetap Kamuktaindet ne yaei tuguuk tugul. 6Koolse karon, amesiis koskoleny, amu mengen che rurtos, ngo ni anan ni anan ngo myagitu tuwai. 7Anyiny iman lapkeiyet, ak kiit ne karaaran asiista kegeerei. 8Ngo sap chiito kenyiisyek che chaang', ko ingobaibait eng' chooto tugul. Ago ingobwaat ineendet peetuusyegap mesundeito, amu chaang'. Puch tugul che pwoonei.

Katigonet koityi neranik

9Paibaitu murenoni, eng' peetuusyegap ming'inateng'ung', ak ingobaibain muguleldang'ung' eng' peetuusyegap ming'inateng'ung' ak isup ortinwegap muguleldang'ung' ko uu ye igeere. Ago nai ile, imutyinin `Kamuktaindet kirwooget amu tuguuchuuto tugul. 10Iste anyun arageneet eng' muguleldang'ung', ak iste yaityet eng' poortang'ung'. Amu puch peetuusyegap ming'inateng'ung' ak che po nerateeng'ung'.

Currently Selected:

AMDOINDET 11: KAPR

Highlight

Copy

Compare