Roma 13

Kepe Ware Ware Eŋane Bango Gekene

1Ŋei korop eŋe kepe ware ware eŋane bango geu paki, aŋaene tewekkei. Onokawane kepe ware ware eya Kaisale midaine mi wakonge. Kepe ware ware urata mama, eyamo Kaisaleŋo ma wakone, eya motke. 2Eya wane ŋei mane eŋe kepe ware ware eŋane don qeki paki, Kaisale wane don weneŋ qeyake, ŋei mane yale okaniyake, eŋe eya wane turuŋine mama eya maki kutino wayake. 3Ŋei tanik manik maine ma okanmami, eŋe ware ware eŋane mi kaeton okanmaike, ŋei borikine ma okanmami, edoka kaeton okanmaike. Ge ware ware wawaine gemami, eŋane kaetŋone midaine gekenane ganmaike me? Eya wane ge tanik maineka okannom, eŋe baŋ mawalak ganiyake. 4Eŋe Kaisale wane qelit ŋei, geŋone menage gekenane urataŋone mamaike ŋo ge borikine makeneo, yemo ge eŋane kaetganiyake, onoka wane eŋane borikinane turuŋine giniyakane zonom yemo welekatne. Eŋe Kaisale wane qelit ŋei, eya wane eŋe Kaisale wane busu yewa teweke ma geki paki, ŋei borikine ma okanmami, eŋe turuŋine ebon okanmaike. 5Eya wane, ŋine ŋei wawaine eŋane aŋaene tewekkei, Kaisaleŋo busuinane turuŋine ŋiboniyake, eya waneka mida, ŋinŋine wetŋineŋo ŋidaniyake, eya teweke okanikei.

6Kine weku eya waneka ŋine yaleka takis mot okanmami, onokawane kepe ware ware eŋe Kaisaleŋo ware ware urata makei wane ra ebongane, eŋe urataene ma okanmami. 7Eya wane ŋine qoleonbi, eŋane biŋek onokaka magemami, eya takis qoleongei wane raraine, eŋe takis qoleonbi, ewe kito kito wane, eŋe eweene kitokei, bakom kito kito eŋe korop bakomene kitokei.

Kima Kima Gemore Wet Maep Okannagukene

8Ŋei mane wano ŋine sota misuk okanikei, sota weku okanikei, yemo ŋine ŋidomka wet maep okan nagukei. Mane eŋe ŋei kimaine wet maep okan kayake, eŋe Mose wane ra rokop don korop eya tewekeyake. 9Ra rokop donŋo iwa yale ramaike, “Zokit misuk kitasikene, ŋei misuk qenom seukeyake, kobu misuk makene, ŋei mane wane toran aboŋinane qomŋone misuk riweyake,” don iwa korop, so don natne yewaŋo qepotkeki, ra rokop don weku okanmaike, yemo iwa yale, “Geŋonane simile ganmaike, yale waka ŋei kimakopŋone eŋane simile ganiyake.” 10Mane eŋe ŋei kimaine wet maep okan kayake, eŋe tanik worik mane mi okankayake. Wet maep okankayake, oŋo yemo ra rokop don korop tewekwareyake.

Kaiwe Suwaino Bororom Gekene

11Iwa ŋine okangei wane ramaile, yemo onoka wane mida, ma naso okanmaike, eya ŋine mo detmami. Ŋine kuluwo ŋine wisikae wiyekei wane naso mo kapele sarimaike. Ŋene musenka don maine detlukkone, yewao Kaisaleŋo baŋ ŋebuki menaŋgenane naso weti kiroine pake, wane iwa yemo mo osop osop bomile sarimaike. 12Ruwo mo mida leleyakane okangimo, kaiwe mo sirikeyakane okanmaike. Eya wane ŋine panaman wane aboŋ eya qeligeu paki, tebe ŋoroŋ qelaŋango yaku yaku eya ma wiye magekei. 13Ŋene ŋedomka numaze mauluke more, ŋei kaiwe qelaŋano gemami, eŋe yale gekene. Ŋene wawaine, me doku togole ne qelaŋ qeqe eya mi okanikene, wenip yau yaup, me bailalaŋ madoŋ madoŋine mi okanikene, kawali qeqe, me liya liyak mi okanikene. 14Ŋo Waom Yesu Kristo wano ŋine kawali wane aboŋ eyaŋo takotŋine okangi ma okorakei, paki solaŋinane dereret borikine eya wane simile misuk desikei.

Currently Selected:

Roma 13: onsNT

Highlight

Copy