Roma 14

Kimaŋonane Kine Misuk Mapoke Desikene

1Ŋei mane mali malipine pelekakatne keu ŋino geyake, eŋeka kima okan kaikei, ŋo dereretine yeye natne eya wanemo misuk aŋa sorin okankaikei. 2Ŋei weku wane mali malipŋo raki, eŋe ŋara kine mane kine mane nemaike, ŋo ŋeiwa mali malipine pelekakatne, eŋe yemo zagukka weku ne okanmaike. 3Ŋei mane yeye kine kine yaup qazaŋ neyake, ŋo ŋeiwa titiinerop okane more zagukka neyake, eŋane mi detki kesiyake. Paki ŋeiwa zagukka weku ne okanmaike, oŋo ŋeiwa yeye kine kine yaup qazaŋ ne okanmaike, eŋane mi detki boriki kineine rapokeyake. Onoka wane Kaisaleŋoka ŋei eya mo weneŋ make so koboboine birakake, eya wane. 4Ge maŋo, ŋei mane wane qelit medep wane kisi maep ma gegeinane kine raikene? Eya yemo eŋine Suwaineineŋo desiyake, eŋe maine ma togole ma okorayake, me peleke qeligeyake. So eŋe baŋ ma togole ma okorayake, onoka wane Waomŋo eŋe qesiŋkaki togole okorayake.

5Ŋei maneŋo wetke rayake, kaiwe mane eyaŋo wele, ŋo natne yemo kaiwe yauwine. Raki ŋei maneŋo wetke rayake, kaiwe eya, korop kopene weku, soda peyada mida. Ŋei wet bonep bonep detlukeu paki, maine rau rap. 6Ŋei mane eŋe kaiwe mane wane detki wawaine okaniyake, eŋe Waom ewino kitoki paki okaniyake. Ŋo mane eŋe yeye kine kine yaup qazaŋ neyake, eŋe Waom ewino kitoki paki okaniyake, onoka wane eŋe ŋara wane Kaisale bakomine kitomaike. Mane eŋe yeye kine kine yaup qazaŋ neyakane walukmaike, eŋe Waom ewino kitoki paki okanmaike, paki eŋe Kaisale bakomine kitomaike. 7Ŋenano ŋine maneŋo eŋinaneka weku mi gemaike, ŋenano ŋine maneŋo eŋinaneka weku mi seukmaike. 8Ŋene gege gemaine, yemo Waom wane gemaine, so ŋene seuseu seukmaine, eya Waom wane seukmaine, ŋene gemaine me seukmaine, eya, yemo Waom wane ka okanmaine. 9Kristo eŋe seukke paki koso wisikae wiyeke, yemo eŋe wisikaune so seuseune ŋenane Waom okaniyakane. 10Pakimo ge onoka wane kimaŋonane kine wakoniyakane dongo birakamaine? So ge onoka wane kimaŋonane detnom ketkele okanmaike? Ŋene korop baŋ Kaisale wane kaitko okoraŋem, eŋe kineze mawakoniyake. 11Eya wane Kaisale wane ekapŋo iwa yale ramaike,

“Waomŋo ramaike, na gege kine welaine, ŋei korop naŋane kaitko wawetene qekei, so ŋei korop eŋe baŋ naŋane Kaisale raikei.”

12Eya wane korop ŋenano ŋineŋo baŋ weku weku gege magezane kine rapoke Kaisale olasikene.

Ge Kine Kine Mane Okannom Eyaŋo Kimaŋonane Wetne Mi Mataliyake

13Eya wane ŋene ŋedomka kine rapo rapok eyamo mi okanikene. Eya wane turuŋine yemo ge iwa yale maine okannom rap. Yeye mane okannom eyaŋo kimaŋone mapapkaki mi rasuyake, me waraŋkaki borikine mi mayake. 14Na Waom Yesurop gemaile, eyaŋo kine nolatki detlukmaile, yemo ŋara kine kine mane oŋomka diinerop mi okanmaike. Ŋo ŋei mane eŋe kine kine iwa qazaŋ ne more dirop okanikene, yale detlukki paki siluŋ neyake, eŋe welekatne ŋei eya eŋano dirop okaniyake. 15Ŋo ge kimaŋonane wetne matali kamaine, yemo onoka wane ge kine kine nemaine eyaŋo, eya wane ge koso wet maep numao mi gesoke okoramaine. Ge ŋara nekene eyaŋo, ŋeiwa Kristoŋo eŋane ra seukke, eŋane wetine mi matali kayake! 16Ŋine yeye wele ma gemami, eya ŋei natneŋo don wele eya, qotkoine orakeiwane warekau paki ma gekei. 17Ŋara nemaine so doku nemaine, eyaŋo Kaisale wane gege togon numa so gege eya wane wele mi okanmaike, Midakaka. Wele koboboine yemo, peyam, so oi bakom, eya Asu Koboboineŋo ŋebonmaike. 18So ŋei mane eŋe Kristo wane urata numa yewaokengo okora mamaike, yemo eŋe Kaisaleŋo ŋei eya wane kine detki siminkayake, so ŋeiŋo weneŋ eŋane masi kau paki, siminonikei.

19Eya wane ŋene tanik manik maine waraŋ kaki, peyam sari okanmaike, so kito qesiŋ okan nagukenane, ma togoleŋon okanmaike, eya wane korop naso baŋem wetze eyaka more gekene. 20Onoka wane ge ŋara wane ranom paki, Kaisale wane urata misuk matalikene. Ŋara korop eya maine nenineka, ŋo na siluŋ ŋara mane newe pakiso, ŋei kimane ka detki, wetine boriyake, na wet masiuk urata mamaile, so naŋane masi eya mi kopkemaike 21Masi maine okanikenane yemo ge soep mi nekene, walukkene, wain mi nekene, me kine kine natne okannom, yewaŋo maki kimaŋone baŋ rasuyake, eya misuk maikene. 22Eya wane ge mali malipŋone eya magekenane detmaine, yemo Kaisale wane kaitko magenom, geŋonoka payake. Ŋei mane eŋe yeye mane wane detki maine okangi, wetineŋo qeguŋ maguŋ mi okangi maineka mamaike, eŋe wet pesek detmaike! 23Ŋo eŋe kine kine ne okanmaike, eya wane wet etkeka okaniyakeo, eŋe koso kine kine eya neki, Kaisaleŋo detkaki sot korop okanmaike, onoka wane eŋe mali malip kutno eya mo okanmaike eya wane. So yeye kine kine natne mali malip kutno mo okan maine eya yemo borikine okanmaike.

Currently Selected:

Roma 14: onsNT

Highlight

Copy