Mareko 1
1
Yohaneŋo Yesu Wane Ra Qelaŋange
1Ekap iwa oŋo, eŋe Kaisale wane gipole Yesu Kristo, wane kisi maep kiyeke ra wakonmaike. 2Mikepka, Kaisale wane qelit ŋei, Isaiyaŋo, Yesu Kristo wane kisi maep kiyeke iwa yale qeke,
“Kaisaleŋo rake, ‘Ge detnom! Na ŋei mane biraka more qebin-kawe, oŋo naŋane don kisi ra qelaŋaniyake, so geŋane numa maki wakoniyake, so alakane gine more urataŋone ma ewekeyake!’ 3Kepe yaup papaino didika, ŋeiine midaine, yewao ŋei yewa eŋe mere, ŋei mane wane aŋa, ŋei ŋerep boka edora more edane rake, ‘Ŋine Waom wane numaine mauluke more kito ma koboeu wesake digin qekep!’ ”
4Rakiso, naso kutno Yohane eŋe kepe yaup papaino didika, ŋeiine midaine yewao wakone doku tauone more don siron iwa yale boka edange, “Ŋine gege mage me masi tanik kine kine ŋine qotkoine korop qeligeu paki wet mainge more ŋadek-kau so na doku tauŋunikale. Paki so, Kaisale eŋe ŋinane borikine ŋine yewa yaleka qeliŋgi nigetkayake.” 5Yale raki dere more, ŋei ŋerep louloutne, Yuda kepeo ŋine so Yerusalem mat suwaino ŋine, warage Yohane wane don desikei wane arikoi. Eŋe dere more borikineene ra qelaŋane wet maingeuso, Yohane eŋe Yordan dokuŋo tauonge. 6Yohane eŋe iwa yale geokange. Takotine kamel eya wane zouneŋo mamaine, eya bira more so radeune kebaŋino makatake more, ŋaraine kubon so begok zikotno ŋine eyaŋoka nemaŋke. 7Yohane eŋe don siron ŋei ŋerep iwa yale edange, “Ŋei mane ŋadeno sariyake. Eŋane zonomineŋo yemo naŋane zonom yuwan-nanmaike. Na ŋei bile mida namde eŋane qelit qeqemeine, noŋo aboŋ kite umatne kutno motpe mi rokopkeyake. 8Ŋo noŋo yemo doku tauŋunmaile, oŋo yemo yalewaka Kaisale wane Asu Koboboineŋo tauŋuniyake.”
Yesu Doku Taukiso Ŋei Borikineŋo Liwekkake
9Naso maneo Yesu eŋe Nazaret mat qelige more, Galili kepeo ŋine Yordan dokuwo sari lotkeki, Yohaneŋo Yordan dokuŋo eŋe taukake. 10Taukaki Yesu eŋe dokuwo ŋine sa more, yewaka pore kaki, qeli aŋaŋgi Asuŋo naŋi baluse yale ket Yesu eŋine kutno kitoke. 11Pakiso, Waom wane boka woka mane qeliwo ŋine iwa yale bokaki ketke, “Ge naŋane gipon maepne, na wetneŋo lukgane malip ganlukmaile.”
Ŋei Borikineŋo Yesu Liwekkake
12Eso naso yewaka Asuŋo Yesu ma birakaki, ŋei midaine kepe yaup papaino arike. 13Ari more, eya ruwo kaiwe 40 geki, Ŋei Borikineŋo, sari Yesu liwekkake. Pakiso osom zubaine eŋerop geke. Pakiso aŋelo edo sari qesiŋka more qelitine qekoi. 14Yohane eŋe mulap urumgo waketke, naso yewao, Yesu eŋe koso zinge Galili kepeo sari more Kaisale wane kisi maep don ra edange. 15Eŋe iwa yale rake, “Kaisaleŋo Qeli ewe zonominane naso motke, mo iwa sarimaike. Ŋine borikine ŋine ŋadekka more, wetŋine maingeu paki, kisi maep don iwa dere malipkau!”
16Yesu eŋe Galili doku namuŋ wazaino ari more, Saimon so ŋole Andreya potki ariki otke. Ere zawon wane kamaga etne doku namuŋ wazaino bira okorakoik. Ere sola wane qesiŋ maratkakeik wane urataine yalewa naso baŋem togogoleka mamaŋkoik. 17Naso yewao Yesuŋo erano lotke mo etora etane more rake, “Ŋire sari naŋane ŋadeno mogat nanbik! Ŋire zawon ebu ebu wane kine det-lukkoik, pakimo, noŋo ŋei ŋerep ebu ebu wane kine kito ŋiponikale.” 18Rakiso, ere esatka kamaga qelige more, ŋadino mogare arikoik.
19Yesu eŋe nigatne eri eri ari more, eŋe Zebedi wane medewetkine, Yakop so ŋole Yohane otke, ere seki kutno mere kamaga maulukkoik. 20Yesu eŋe ore more boka etoraki, so ere magaetne, Zebedi so urata medewekopetne qeliŋ-onbik, seki kutno metpi, so ere sari more Yesu wane ŋadino mogare arikoik.
Yesu Eŋe Ŋei Mane Wano Ŋine Asu Qotkoine Mane Esopkake
21Pakiso, Yesu eŋine so dokoine ebuke, eŋe Kapaneyam matko ari metkoi. Sarere kutno, zonom mama nasoo, Yesuŋo Yuda eŋane lewa lewaŋ urumgo ari more, ŋei ŋerep kisi maep don kito edange. 22Ŋei ŋerep edo eŋane kisi maep kito ebo eboninane dere more, qisekoi so oŋaene qaeke. Eŋane kito ebon eboninane zonomineŋo kau, Kaisale papa togon welaine ŋei, eŋetene Skribe, eŋane kito ebo ebon eya manerop yuwan-onge.
23Naso yewao, ŋei mane asu qotkoineŋo kotino weneŋ metke, eyaŋo Yuda wane lewa lewaŋ urum koto saket more, oŋo togoleka boka rake, 24“Yesu, Nazaret matko ŋine, ge dalino okan ŋonikene? Ge ŋene ŋengu matali ŋonikenane iwa sarimaine? Na detluk ganmaile! Ge ŋei koboboine Kaisaleŋo uratainane ra matoke biragangi Kaisale eŋino ŋine sarimaine.”
25Yale rakiso, Yesuŋo asu qotkoine yewa don okanka more olale rake, “Ge aŋaŋone ma waluke more ŋei yewa qeliŋ kanom!” 26Rakiso, asu qotkoineŋo ŋei togoleka rapap qe pap-kaki paki, suwaine boka aro uŋalan suwaineka okane saket qeliŋka arike. 27Pakiso, ŋei ŋerep eŋe oŋaene qaeki, done done au more rakoi, “Iwa onokaka? Kito ebo ebon musele me? Eŋe zonominerop ra togole asu qotkoine edangi, eŋe aŋaine tewekmami.” 28Eya wane, Yesu wane don kisiŋo suwa ari more esatka Galili kepeo korop rokopkeke.
Yesuŋo Ŋei Ŋerep Loutne Ma Menaŋonge
29Yesu eŋine so Yakop so Yohane eŋe Yuda wane lewa lewaŋ urum qelige ket more Petoro so Andreya eretne matko koboine ari waketkoi. 30Simon wane sewenine eŋe zoma suwaine okane, papaino paki solaineŋo zok manerop gereune okangi, ŋei ŋerep edo ikopka Yesu olale rakoi, “Simon sewenine, eŋe zoma manerop okane, solaine wikile zok manerop wakonkamaike.” 31Yale rau, Yesu eŋe eyaka ari ŋerep metino ma qesiŋka more maki wiyeke. Paki ŋerep eya eŋe solaine momo qe more menaŋkaki, eŋe eyaka wiye eŋane ŋara doku mauluke ebongi nekoi. 32Rarapko kepe deine qoe, ruwo kereyakane okangi, ŋei ŋerep eŋe zoma ŋei, so ŋei asu qotkoinerop, eya Yesu wano ebu sarikoi. 33Mat suwaine yewa wane ŋei ŋerep magu suwaineŋo sari Simon wane mat tirino lewage qedugu metkoi. 34Metpi Yesu eŋe ŋei ŋerep zoma kine kineenerop ma menaŋone more, kotoeno asu qotkoinerop, eya esop-onge, esop-ongi asu qotkoine eŋe Yesu wane kineine detluk kakoi. Pakiso Yesu eŋe eŋane kine rau mi suwa ariyakane, rawotonge.
Yesuŋo Galili Kepeo Ra Qelaŋange
35Pakimo Yesu eŋe kepe qae qaewo, panaman weneŋ wiye ket, mat qeliŋka more, kepe ŋei midaine yewao ari mere meŋenkake. 36Meŋenka metki, Simon eŋine so kimakoune, eŋe baŋ ŋado zuwaŋka ari maratkakoi. 37Eŋe ari maratka more, iwa yale olale rakoi, “Ŋei ŋerep korop magu suwaine eŋe ge zuwaŋ ganmami!” 38Rauso, eŋe iwa yale mainge edange, “Iwamo ŋene mat suwaine natne osop osop pamaike, eya lolike arikene, na eŋano weneŋ kisi maep edanikalane nanmaike, so urata maikalane sarikole.” 39Yale ra edane so, eŋe Galili kepeo lolike ge mat baŋem Yuda wane lewa lewaŋ urum metke, rokop kisi maep edange, so asu qotkoine eya korop esoponge.
Yesuŋo Ŋei Mane Ma Menaŋkake
40Ŋei mane kubet togonineropŋo Yesu wano wawetine qe qesonka more rake, “Ge naŋane simile ganmaikeo, yemo ge maine naŋane kubetne iwa manom osiyake!” 41Yale rakiso, Yesu eŋe eŋane wet borik ma more metine bira solaino uwaka more olatke, “Na geŋane simile nanmaike, eya wane kubetŋone iwa osikep!” 42Olatkiso, esat naso yewaka kubet togonine eya osiki, solaine eya menage libe qeke. 43Pakimo Yesuŋo ŋei eya don kukka ra qebinka more, iwa yale olatke, “Ge detlukenom! Ge ari solaŋone menaŋmaike, eya wane donkisi ŋei mane misuk edanikene, asoze Moseŋo sogino iwa yale ra togoleke. Ŋei mane kubet togonine mo osi menaŋkakiso, eŋe mosop ŋei wano ari solaine sikankayake. Ge yalewaka mosop ŋei wano koboine ari more, solaŋone sikanka more bakom mannom paki arikene. Pakimo, ŋei ŋerep eŋe detgane raikei, eŋe solaine mo menaŋ kamaike.” 44Yale raso, Yesu eŋe don gereunerop olale qebinka birakaki arike. 45Ŋo ŋei yewa eŋe ari more, don kisi yau yaup ra edane ariki eŋane don kisi eyaŋo suwa korop kepe baŋem rokopkeke. Pakiso, Yesu eŋe mat suwaino ŋei ŋerep eŋane deeno koso mi ari lolikke, eŋe kepe ŋei midaino ari metke. Metkiso, ŋei ŋerep kepe baŋem ŋine edoka Yesu wano sarimaŋkoi.
Currently Selected:
Mareko 1: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.