Mareko 2
2
Yesuŋo Ŋei Mane Kiye Metine Seuseune Ma Menaŋkake
1Yesu eŋe kaiwe mama karewe yewa geki qoekiso, Kapaneyam mat suwaino zinge ari lotkeke. Pakiso, naso yewao ŋei ŋerep edo don rau yau yaup ariki rakoi, “Yesu eŋe mo koso i sari matino metmaike.” 2Paki ŋei ŋerep eŋe esatka mat yewa wane kotino watke madetko so mat wazaino korop rokopke watkekoi. Kepe ameŋine mane yaup mi pake. Naso yewao Yesu eŋe kisi maep don edane okoraki, 3Ŋei etke so etke eŋe zoma ŋei kiye metine seuseune mane teweke sarikoi. 4Mat mo ŋei ŋerep edo watke warekoi wane eŋe dalino Yesu wane osino ma waurap. Ŋaŋae more, tiriwoka teweke wa mat bakino Yesu metke kutnoken yewa kito barake more ŋei etke so etke eŋe mulapkoka mau qoroŋ qoroŋ ket zoma ŋei eya teweinerop Yesu wane osino rasu pake. 5Yesu eŋe kaŋ qae wiye pore ŋei etke so etke, eŋe one more eŋane mali malipene detone more Yesuŋo zoma ŋei olale rake, “Medep, na geŋane masi qotkoine makone eya mo ma qeliŋ-kawe arimaike.”
6Yale ra olatkiso, Kaisale papa togon welaine ŋei natne, Skribe, eŋe Yesu wane osino mere detpi, dereretene mi kopkeke, 7“Dalino wane ŋei yewa eŋe don yaline ramaike? Eŋe Kaisale yuwanka more eŋane met met mayakane okanmaike me? Eŋe detki eŋine Kaisale yale okanmaike? Ŋei maneŋo mane wane sot maine mi qeliŋkayake, Kaisale wekuŋo ŋei mane wane sot turuŋ qotkoine eya makoke ma menaŋ ŋoniyake!” 8Yesu eŋe yewaka dereretene detone more, iwa yale edange, “Onoka wane ŋine dereret yaline detmami? 9Na zoma ŋei yewa don ewekine dalino yale olasikale? Na olale raikale, na sotŋone mo qeliŋgewe siukmaike, me ge wiye menage more uwamŋone ma more arinom? 10Eya wane ŋine na detluk nanbi, na Ŋei Wawainane Gipole. Na nae tunno kepeo ŋei ŋerep eŋane sotene eyamo qeligewe siukwaremaike.” Yesu eŋe yale ra more, zoma ŋei olale rake, 11“Wiye, uwamŋone ma more matŋono arinom!” 12Pakiso, zoma ŋei yewa eŋe ŋei ŋerep eŋane kaiteno ikopka wiye more, uwamine rutupke more, kolopke ket arike. Pakiso ŋei ŋerep eŋe korop oŋaene qaeki Kaisale wane eŋetine ora bukeu waki rakoi, “Sogino kine kine mane iwa yaline mi kakone, i midakaka!”
Yesuŋo Lewi Orake
13Yale rauso, Yesu eŋe koso Galili doku namuŋ mezeno zinge arike. Ariki ŋei ŋerep magu suwaine eŋe sari Yesu wano qeduguwi eŋe kisi maep don kito edange. 14Yesuŋo eŋe eya ŋine ari more, “Lewi eŋe takis mama mat koto metki ka more olale rake, Lewi ge ket ŋadeno mogatnane sarinom!” Raki, Lewi eŋe yewaka wiye more, wesi mama urataine eya qelige more, Yesu wane ŋadino mogatka arike.
15Pakiso, ŋado baŋ Yesu eŋe Lewi wane matko mere ŋara neke. Naso yewao takis mama ŋei loutne so ŋei sotenerop natne eŋe Yesu eŋine so dokoine eŋerop weneŋ mere ŋara nekoi. 16Ne metpi, naso yewao Kaisale wane papa togon welaine ŋei natne, Parisaiyo, eŋe Yesu kau takis mama ŋei so ŋei sot korop eŋerop weneŋ metki one more, Yesu dokoine qeson one more rakoi, “Eŋe eya mo onoka wane ŋei qotkoine eŋerop mere ŋara nemaike?” 17Rauso, Yesu eŋe detone more rake, “Maŋo mauluk mauluk ŋei eŋano ari okanmaike? Zomaenerop, me, zomaene midaineŋo? Na ŋei yaline eŋane ra more sarikole. Ŋei sotenerop zuwaŋone more ebu qesiŋ onikalane sarikole. Na ŋei dereretenane detpi koboine okanmaike, eŋe qesiŋ onikalane mi sarikole.”
Sawe Gege Wane Yesu Qesonkakoi
18Naso maneo, Yohane doku tau tau wane dokoine so Kaisale papa togon welaine ŋei, Parisaiyo, eŋane dokoene eŋe ŋara sawe gekoi. Naso yewao ŋei ŋerep natne eŋe sari Yesu qesonka rakoi, “Yohane wane dokoine so Kaisale papa togon welaine ŋei, Parisaiyo, eŋane dokoene eŋe ŋara sawe gemami. Ŋo, daleo wane geŋane dokoŋone eŋe yale mi okanmami?” 19Yale rauso, Yesuŋo mainge more edane rake, “Ŋei mane eŋe zokit mayakane rayakeo, ŋei kimakoune, eŋe maine ŋara mire ne mere wiye oi bakom weneŋ mesikei so kima-koune eŋe ŋara wane sawe mane mi mesikei. Eŋe baŋ zokit ma more bira-one ariki, eya mo eŋe baŋ eŋane rau paki qom borik okane more ŋara wane sawe okanikei.” Yesuŋo rake. 20“Na ŋei qaluwit eŋane rokop. Baŋ, naso maneo ŋei edo na neuwi, ariwe dokone eŋe koso na mi nanikei, naso yewao eŋe maine ŋara wane sawe okane eŋe qom borik korop gekei.”
21Yesu eŋe koso takotke rokop don mane rake, “Takot mane toeki aŋaine okoraki laplap musele mane wane sisineŋo more maine mi qetusikene. Ŋo qetusikeneo, yemo lap lap sisine museleŋo tebakaki, takot sogine eya toe aŋap suwaine wakoniyake. 22Ŋo mane maŋo wain musele eya qeki koso nomare sogine yewao kesi-yakane. Eŋe yalewa okangi, yemo wainŋo ket qebinkaki, nomare sogine eya muzu-geyake. Pakimo, nomare so wain ere weneŋ mida lelekeik, eya wane wain musele eŋe eŋine nomare muselo qeu ketki, eyamo menageyake.”
Yesu Eŋe Qezarek Nasoo Ŋei Edo Qesonkakoi.
23Qezarek Naso maneo, Yesu eŋine so dokoine eŋe wit eu kotinoka ari more dokoine edo wit wele natne siwekoi. 24Pakiso, Kaisale papa togon welaine ŋei, Parisaiyo, edo one more Yesu qeson kakoi, “Ge onnom! Geŋane dokoŋone eŋe wit siwe nemami. Dokoŋone eŋe masi yewa ŋenane ra rokop dongo yemo okane more sot kaukmami. Qezarek Naso yewao mi maikei, yewa ŋenane ŋabozane rara togon don.” 25Yale rauso, Yesuŋo donene mainge edange, “Mo sogino asoze Dawit, Israel Ware Ware, eŋine so dokoine eŋe ŋaraenane seuke more 26ari Kaisale wane Bakom Urum koto waket more, kasap yewao ŋine mi mamaine, eyamo ra togoleke, eya ma nekoi. Kasap yewa Kaisale wane bakom kitokenane. Naso yewao, Abiyata, Kaisale wane mosop ŋei, eŋe lewet geke. Ŋenane ra rokop don ra togoleki mosop ŋei edoka kasap yewa ne okangoi, ŋo Dawit eŋe yewa ne more dokoine ebongi nekoi.” 27Yesu eŋe koso edange, “Kaisale eŋe mikepka ŋei so ŋerep ma wakonotki paki, erane ra more ŋadino Qezarek Naso yewa baŋ motke. Qezarekŋo mawakongi paki, ŋei so ŋerep mi ma wakonge, naso yewaŋo ŋei ŋerep qesiŋ osiyakane motke. Me naso yewaŋo ŋei ŋerep matali osiyakane mi motke. 28Eya wane, na Ŋei Wawainane Gipoleŋo yalewaka Qezarek Naso eya wane Waom, so noŋo eya wane welaine.”
Currently Selected:
Mareko 2: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.