Matayu 28
28
Yesu Wisikae Wiyeke
1Qezareko taboŋ met met eya wane naso qoeki, kepe weleleke ketki, Sodao sakoka Mari Magdalena so Mariya mane ere deŋesere kaikeik wane arikoik. 2Eyaka memeya suwaine togoleka maki, Waom wane aŋelo maneŋo qeliwo ŋine ket more wesi, suwaine eya rodiŋgi masikane kereki, eya wane kutno pese metke. 3Eŋane kait toqaine qilap yale, ŋo takotine yemo libe libe ais yale. 4Kawali ŋei eŋe kaetongi zonomene oreki, seuke seuseune yale okane pakoi.
5Pakiso, aŋeloŋo ŋerep etane rake, ŋire mi kaetŋutkep, na detmaile, “Ŋire Yesu kibeŋ qabego rasukau seukike, eŋe kaikeik wane sarimamik. 6Eŋe yemo iwa midakaka, eŋe yemo mo ŋidange, yale mo wisikae wiyeke, iwa sariuk paki, numaine peke eya kauk. 7Ŋire ikopka ariuk paki, dokoine iwa yale edanbik, ‘Eŋe mo seuseuwo ŋine wisikae wiyike, wane eŋe mo lewine alakane Galili arimaike, ŋine eŋe baŋ eya kaikei!’ Na mo ŋidanile, eya desikei.”
8Eso ere deŋesere esatka qelige arikoik, kaetotke so wetetne oi bakomŋo watkeki, dokoine edangeik wane biririke arikoik.
9Ariuk, eyaka Yesuŋo numao marat ore more rake. “Peyamŋo ŋirano payake.” Ere eŋane osino ariuk paki, kine masatka more bakomine kitokoik. 10Pakiso Yesuŋo etane rake, “Ŋire misuk kaet ŋusiyake, ŋire ariuk paki, naŋane kimakopne edanbik, eŋe Galili ariu paki, na baŋ yewa marat nanikei.”
Kawali Ŋei Edo Donkisi Edangoi
11Ŋerep etke ere numaka ariuk, kawali ŋei natne deŋesereo diyam metkoi, eŋe mat suwaino zinge ariu paki, pris ŋetne tanik kine kine wakonge, yewa edan warekoi. 12Pakiso, pris ŋetne eŋe korop Yuda ŋei suwaine eŋerop don au ma togolekoi, eŋe wesi kakapa suwaine kawali ŋei ebongoi. 13Paki edane rakoi, “Ŋine rakei, ‘Ŋene kulu paŋem eŋine dokoine eŋe ruwoo sariu paki, pareŋine eya kobu ma arimi.’ 14So ware ware suwaine eŋe don kisi iwa mane desiyakeo, yemo ŋene don natne baŋ olatkene, ŋine eya wane dere mezet baŋ mi okanikei.”
15Kawali ŋei diyam metkoi, eŋe wesi yewa mau paki, so don mane mi ra qelaŋangoi. Don kisi eyaŋo Yuda ŋei edo rau suwa arike, so naso iwao eŋe eyaka ra gemami.
Yesu Eŋe Dokoine Wakonongi Paki Don Kisiine Ra Qelaŋanikei Wane Edange
16Dokoine 11 eŋe Galili meŋo mane, Yesuŋo arikei wane edange eya arikoi. 17Paki, eŋe Yesu kau paki, eŋane kaitko umi qeu paki, bakomine kitokoi, ŋo natne eŋe wet etkeka okangoi. 18Yale okanbi Yesuŋo osoeno sari edane rake, “Zonom kine kine qeli kotino so kepe kutno yemo korop na ninwareke. 19Eya wane ŋine kepe baŋem ariu paki, ŋei magune magune dokone ebukei, paki Magak so Gipole so Asu Koboboinane eŋetko doku tau onikei. 20So kito edanbi, eŋe don ra ŋidane okan gekole, eya tewek warekei. So ŋidanbe detpi, na naso baŋem ŋinerop ge magewe, kepe nasoine qoeyake.”
Currently Selected:
Matayu 28: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.